प्रस्थान 37
37
बाचा चिनादीगु सनू
1बजलेलं खयःसिँयागु १.१ मि. हाकः, ३३ से.मि. ब्या व ३३ से.मि. तःजाःगु छगः सनू दय्कल। 2उकियागु दुने व पिने भिंगु लुं भुनाबिल। अले उकिया प्यखेरं लुँया बाला दय्कल। 3उकिया निंतिं लुँयागु प्यचाः चाः दय्काः उकियात सनूया प्यंगू ख्वःलय् तयाबिल। छखे निचाः व मेखे निचाः तयाबिल। 4अले खयःसिँयागु निपु न्वः दय्कल अले उकियात लुं हिनाबिल। 5सनू क्वबीत न्वःत निखें दुगु चालय् तयाबिल।
6वं भिंगु लुँयागु १.१ मि. हाकः व ३३ से.मि. ब्या दुगु छगू प्रायश्चितया कृपा-आसन दय्कल। 7मुगलं दायाः लुँया निम्ह करूब दय्कल। 8करूबतय्त प्रायश्चितया कृपा-आसन नाप छधी हे लुं दय्काः निखेंपाखे तयाबिल। 9उपिं करूबतय्सं थथःगु पपू च्वय्पाखे चक्कंकाः प्रायश्चितया कृपा-आसनयात त्वपुयातःगु दु। इमिगु ख्वाः चूलाकाः प्रायश्चितया कृपा-आसनपाखे स्वय्का तयातःगु दु।
छायेहःगु मरि तयातःगु तेबिल
10वं खयःसिँयागु ८८ से.मि. हाकः ४४ से.मि. ब्या व ३३ से.मि. तःजाःगु छगू तेबिल दय्कल। 11उकियात भिंगु लुं भुनाः प्यखेरं लुँया बाला दय्कल। 12उकिया प्यखेरं प्यलांगु ब्या दुगु बाला दय्कल। अले प्यखेरं लुँयागु मेगु बाला दय्कल। 13तेबिलया निंतिं लुँयागु प्यचाः चाः दय्कल। अले उपिं चाःतय्त प्यंगू तुति च्वय् प्यखें कुन्चाय् तयाबिल। 14तेबिल ल्ह्वनीगु न्वःत कताकेत चाः बालाया लिक्कसं तयाबिल। 15थ्व न्वःत खयःसिँयागु दय्कल, अले लुं भुनाबिल। 16वं उकियागु पाःचागु थल, आम्खुरा व त्वँसाबलि प्वंकेगु करुवा व ख्वल्चा भिंगु लुँयागु दय्कल।
त्वाःदेवा
17बजलेलं भिंगु लुँयागु छगू त्वाःदेवा मुगलं दायाः दय्कल। उकियागु लिधंसा, चु, स्वां थें च्वंगु ख्वल्चा, चुलि व स्वांफ्वः फुक्कं व छगू हे लुँ कुचां दय्कल। 18बजलेलं भिंगु लुँयागु छगू त्वाःदेवा मुगलं दायाः दय्कल। उकियागु लिधंसा, चु, स्वां थें च्वंगु ख्वल्चा, चुलि व स्वांफ्वः फुक्कं व छगू हे लुँ कुचां दय्कल। 19छगू कचाय् मर्स्या बरांयागु स्वांफ्वः थें च्वंगु स्वंगः ख्वल्चा व नापं मुखू वयाच्वंगु स्वां व स्वांफ्वः दय्कल। अले मेगुपाखे थथे हे स्वपु कचात पिहां वल। थथे यानाः अन खुपु कचा दय्कल। 20त्वाःदेवालय् मर्स्या बरांया स्वां थें च्वंगु प्यंगः ख्वल्चात, अले मुखू स्वां व स्वांफ्वःत नापं दुगु खः 21अले चुं पिहां वःगु स्वज्व कचातय् चुया स्वांफ्वःया क्वय् निपु निपु कचातय् दथुइ छगः छगः ग्वः चुनापं दय्कल। 22त्वाःदेवा, उकियागु मुखू व कचात मुगलं दायातःगु भिंगु लुँयागु छगू हे कुचायागु जुल।
23इमिसं भिंगु लुँयागु न्हय्पाः पाल्चा, इताः कुलेगु चिम्ता व किस्ति दय्कल। 24इमिसं स्विन्यागू ति किलोग्राम भिंगु लुं त्वाःदेवा व उकियात माःमाःगु ज्वलं दय्कल।
गुँगू थनेगु वेदी
25बजलेलं खयःसिँयागु गुँगू थनेगु वेदी दय्कल। व ४५ से.मि. ताहाकःगु, ४५ से.मि. ब्या दुगु अले ९० से.मि. तःजाःगु व प्यकुंलाःगु जुल। उकिया नेकूत नं छस्वा यानाः दय्कल। 26उकिया च्वय्, प्यखेरं व नेकूतय्त भिंगु लुं भुनाबिल। अले उकिया प्यखेरं लुँयागु बाला दय्कल। 27वेदी क्वबीगु न्वः तयेत बालाया क्वय् निखेंपाखें निचाः चाः दय्कल। 28न्वः खयःसिँयागु दय्काः लुं भुनाबिल।
29बजलेलं अभिषेक यायेगु पवित्र चिकं व अत्तर दय्के सःम्हय्सिनं थें नस्वाःगु भिंगु गुँगू दय्कल।
Currently Selected:
प्रस्थान 37: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
