प्रस्थान 34
34
मेगु ल्वहंयागु पौ
1परमप्रभुं मोशायात धयादिल, “न्हापा थें ल्वहंयागु निपाः पौ हजि। अले जिं उकी छं न्हापा तछ्याःगु पौतय् च्वयातःगु हे खँ च्वयाबी।#व्य १०:१-५ 2छ सुथ न्हापां हे तयार जुयाः सीनै पर्वतया च्वकाय् जिगु न्ह्यःने थहां वा। 3छनापं सुं नं मनू मवयेमाः। उलि जक मखु पर्वतय् गन नं सुं मनू खने मदयेमाः। फैच्वलय् व सा द्वहं नं पर्वतया न्ह्यःने मज्वयेमाः।”
4अले मोशां न्हापायागु थें ल्वहंपौ निपाः चानाः दय्कल, अले परमप्रभुं आज्ञा बियादीगु थें सुथ न्हापां सीनै पर्वतय् थहां वन। 5अले परमप्रभु सुपाँचय् क्वहां झायाः व नापं अन दनाः थःगु पवित्र नां, “परमप्रभु” धकाः न्ववानादिल। 6अनंलि परमप्रभु वया न्ह्यःने झायाः थथे धकाः धयादिल, “परमप्रभु, परमप्रभु दयादुम्ह, सदां दयामाया यानादीम्ह, तंचायेत लिबाकादीम्ह व तसकं विश्वास याये बहःम्ह खः।#प्रस २०:५-६; गन्ती १४:१८; व्य ५:९-१०; ७:९-१० 7वय्कः द्वलंद्वःयात माया यानादीम्ह, अधर्म, अपराध व पाप क्षमा यानादीम्ह खः। अय्सां वय्कलं द्वंयाःम्हय्सित सजाँय मब्यूसे त्वःतादी मखु। वय्कः पुर्खाया अधर्मया सजाँय इमि छय् व छुइया पालय् तकं नं बियादीम्ह खः।”
8अले मोशां हथासं बँय्पाखे क्वछुनाः आराधना यात। 9वं धाल, “हे परमप्रभु, छिं जिमित धात्थे माया यानादियागु खःसा छि जिपिंनापं झासँ। थ्व छगू जिराहा जाति जूसां जिमिगु अधर्म व पाप क्षमा यानादिसँ, अले जिमित थःगु हे सम्पत्ति थें नाला कयादिसँ।”
10अले परमप्रभुं धयादिल, “स्व, जिं छनापं छगू बाचा चिने। पृथ्वीइ फुक्कं जातितय् दथुइ गुबलें मजूगु अजू चायापुगु ज्या जिं छिमि मनूतय् न्ह्यःने यानाक्यने। अले छिमिगु दथुइ च्वनाच्वंपिं मनूतय्सं परमप्रभुया ज्या खनी, छाय्धाःसा जिं छपाखें छगू तःधंगु ज्या याये।#प्रस २३:१४-१९; व्य ७:१-५; १६:१-१७ 11थौं जिं छन्त बियाच्वनागु उजंयात मानय् या। स्व, जिं छंगु न्ह्यःनें एमोरी, कनानी, हित्ती, परिज्जी, हिव्वी व यबूसीतय्त लिनाछ्वये। 12बांलाक होश यानाच्वँ, व देय्यापिं मनूतलिसें छं सन्धि याये मते, मखुसा इपिं छिमिगु निंतिं तक्यनीगु जाः जुइ। 13इमिगु वेदीत स्यंकाब्यु। इमिगु पवित्र ल्वहंत तछ्यानाब्यु, अले इमि अशेरा द्यःमय्जुयागु थांतय्त पालाः क्वथलाब्यु।#व्य १६:२१ 14छिमिसं मेम्ह सुं द्यःयागु पुजा याये मते। परमप्रभुया नां ‘नुगः मुइकादीम्ह’ खः। थ्व खनाः वय्कलं नुगः मुइकादी।
15“होश यानाच्वँ, व देय्यापिं मनूतलिसें सन्धि याये मते, मखुसा इमिसं थः द्यःतय्त बां बियाः पुजा यानाः भ्वय् न्याय्कीबलय् छिमित नं सःती अले छिमिसं इमिगु भ्वय् नइ। 16अले छिमिसं उपिं जातयापिं भौमचात हयाः इमिसं थः द्यःतय्गु पुजा याइबलय् छिमि काय्पिन्त नं अथे हे याकेबी।
17“छिमिसं थःगु निंतिं नाय्काः मूर्तित दय्के मते। #प्रस २०:४; लेवी १९:४; व्य ५:८; २७:१५
18“सोडा मतःगु मरिया नखः हनेगु या। जिगु उजंकथं आबीब लाया क्वःछिनातःगु इलय् न्हय्न्हु तक सोडा मतःगु मरि नयेगु या। आबीब लाय् हे छिपिं मिश्र देशं पिहां वःगु खः।#प्रस १२:१४-२०; लेवी २३:६-८; गन्ती २८:१६-२५
19“न्हापां बूपिं फुक्क काय्मस्त जिम्ह खः। अले सा द्वहं व फैच्वलय्तय् न्हापां बूपिं बाजात नं जिम्ह खः।#प्रस १३:२ 20न्हापां बूम्ह गधाया मचायात चिधिकःम्ह भ्याःचानापं लिफ्या, लिमफ्यायेगु जूसा वयागु गःपः त्वथुलाब्यु। छिमिसं न्हापां बूपिं काय् मस्तय्त नं लिफ्याना कायेमाः।
“सुं नं जिगु न्ह्यःने ल्हातय् छुं मदय्क खनेदः वये मते।#प्रस १३:१३
21“खुन्हु तक ज्या या, तर न्हय्न्हु खुन्हु आराम का। बुँ पुलेगु व छ्व लयेगु इलय् नं आराम का। #प्रस २०:९-१०; २३:१२; ३१:१५; ३५:२; लेवी २३:३; व्य ५:१३-१४
22“छिमिसं बुँइ न्हापां सःगु छ्व नापं सामाज्याया नखः हनेगु या। हानं न्हय्गूगु लाय् थथःगु फल खाये धुंकाः मुनेगु नखः हनेगु या।#लेवी २३:१५-२१,३९-४३; गन्ती २८:२६-३१ 23दँय् स्वक्वः फुक्क मिजंत परमप्रभु इस्राएलया परमेश्वरया न्ह्यःने खनेदय्कः वयेमाः। 24जिं छिमिगु न्ह्यःने जातितय्त लिनाछ्वये। देशया लागि लागा अप्वः यानाः बी। दँय् स्वक्वः छिपिं परमप्रभु छिमि परमेश्वरया न्ह्यःने वनीबलय् सुनानं छिमिगु बुँयात ल्ववंकी मखु।
25“जितः बलि छायेबलय् सोडा दुगु मरि छाय् मते। सुथ जुइ न्ह्यः तकं छुत्काराया बलिया ला फुकेमाः, ल्यंकातये मते।#प्रस १२:१०
26“छिमिगु बुँयागु दकलय् भिंगु न्हापां सःगु अन्न व फल परमप्रभु छिमि परमेश्वरयाथाय् हजि।#व्य २४:२१; २६:२
“सुं च्वलेचाया मचायात वया मांया दुरुइ दय्के मते।”
27अनं लिपा परमप्रभुं मोशायात धयादिल, “थुपिं वचन च्व, छाय्धाःसा थुपिं हे वचनकथं छ व इस्राएलीतनापं जिं बाचा चिनागु दु।” 28मोशा अन परमप्रभुनापं पिइन्हु पिइचा तक छुं हे नयेत्वने मयासें च्वन। वं उपिं ल्वहँपतिइ बाचाया झिगू उजं च्वल।
मोशाया ख्वाः ज्वल्ल थीगु
29बाचा चिनादीगु निपाः ल्वहंपौ ज्वनाः सीनै पर्वतं क्वहां वःबलय् परमेश्वर व नापं खँ ल्हानादीगुलिं थःगु ख्वाः ज्वल्ल थीगु दु धकाः वं मस्यू।#२ कोर ३:७-१६ 30हारून व फुक्क इस्राएलीतय्सं मोशायागु ख्वाः थियाच्वंगु खनाः इपिं वयागु न्ह्यःने वयेत ग्यात। 31अय्नं मोशां इमित सःतल, अले हारून व खलःया थकालित वयाथाय् वल, अले वं इपिं नापं खँ ल्हात। 32अनंलि फुक्क इस्राएलीत वया न्ह्यःने वल, अले इमित परमप्रभुं सीनै पर्वतय् बियादीगु फुक्क उजं न्यंकाबिल।
33इपिं नापं खँ ल्हाये धुंकाः थःगु ख्वाः गाबलं त्वपुल। 34मोशा परमप्रभुया न्ह्यःने वय्कः नापं खँ ल्हायेत वनीबलय् धासाः वं पिने पिहां मवतले थःगु ख्वाः उलिगु याइ। अले परमप्रभुं वयात छु उजं बियादी पिने वयाः वं इस्राएलीतय्त न्यंकी। 35अले इस्राएलीतय्सं मोशायागु ख्वाः ज्वाल्ल थीगु खनीगु। परमप्रभुलिसे खँ ल्हायेत दुने दुहां मवंतले हे थःगु ख्वाः त्वपुया तइगु।
Currently Selected:
प्रस्थान 34: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
