प्रस्थान 17
17
ल्वहँतं लः पिहां वःगु
गन्ती २०:१-१३
1परमप्रभुया आज्ञा कथं इस्राएलीतय् फुक्क खलः सीन धयागु मरुभूमिं वनाः थाय् थासय् जुयाः रपीदीमय् थ्यंकाः पाल ग्वयाः बाय् च्वन। अन धाःसा त्वनेत लः हे मदु।#गन्ती २०:१-१३ 2अथे जुयाः मनूतय्सं मोशायात कचकच यानाः धाल, “जिमित त्वनेगु लः बियादिसँ।”
अले वं इमित धाल, “छिपिं जिलिसें छाय् कचकच याः वयागु? छिमिसं छाय् परमप्रभुयागु मन स्वयागु?”
3मनूतय्सं प्याः चाःगुलिं मोशालिसे कचकच याना तुं च्वन। इमिसं धाल, “छिं जिमित छाय् मिश्रं पित हयादियागु? जिमित जिमि मचाखाचा व पशुनापं लः त्वने मखंकाः स्यायेत ला?”
4अले मोशां परमप्रभुयात थथे धकाः इनाप यात, “जिं थुपिं मनूतय्त छु यायेगु? थुमिसं ला जितः ल्वहँतं कय्के त्यंगु दु।”
5परमप्रभुं मोशायात धयादिल, “इस्राएलीतय् छम्हनिम्ह थकालितय्त ज्वनाः मनूतय् न्ह्यः न्ह्यः हुँ। छं थःनापं नील खुसिया लखय् दाःगु कथि नं ज्वनाः हुँ। 6जि होरेबया ल्वहँतय् छंगु न्ह्यःने दंवये। छं ल्वहँतय् कथिं दा, अले अनं मनूतय्सं त्वनेगु लः पिहां वइ।” अले मोशां थकालितय्गु न्ह्यःने अथे हे यात।
7परमप्रभु जिमिगु दथुइ दी कि मदी धकाः इस्राएलीतय्सं परमप्रभुयात जाँचय् याःगु व कचकच याःगुलिं मोशां व थाय्या नां “मस्साह”#१७:७ मस्साह थुकिया अर्थ परीक्षा खः। व “मेरीबा”#१७:७ मेरीबा थुकिया अर्थ ल्वापु खः। तल।
रपीदीमय् अमालेकीतय्सं हमला याःगु
8रपीदीमय् च्वनाच्वंबलय् अमालेकीतय्सं वयाः इस्राएलीतय्त हमला यात। 9मोशां यहोशूयात धाल, “कन्हय् वनाः अमालेकीतलिसें ल्वायेत छं मनूत ल्य। परमप्रभुं जितः बियादीगु कथि ज्वनाः जि गुँच्वकाय् दने।”
10मोशां धाःथें यहोशू अमालेकीतलिसें ल्वाः वन। अले मोशा, हारून व हूर गुँच्वकाय् वन। 11मोशां थःगु ल्हाः ल्ह्वनाततले इस्राएलीत त्याइगु, वं ल्हाः क्वकाल कि अमालेकीत त्याइगु। 12मोशाया ल्हाः त्यानुयावसेंलि हारून व हूरं ल्वहं छगः हयाः उकी फ्यतुकल। अले निभाः मब्युतले हारूनं छखे व हूरं मेखे वयागु ल्हाः बल्लाःक ज्वनाः ल्ह्वनातल। 13थुकथं यहोशूं तरवारं अमालेकीतय्त बुकल।
14अमालेकीतय्त बुके धकाः परमप्रभुं मोशायात धयादिल, “थ्व खँयात लुमंका तयेत छगू सफुलिइ च्व। अले जिं अमालेकीतय्त पृथ्वीं भज्यंक नाश यानाबी धकाः यहोशूयात धा।”#व्य २५:१७-१९; १ शमू १५:२-९
15मोशां अन छगू वेदी दय्काः उकिया नां “परमप्रभु जिगु ध्वाँय्” धकाः तल। 16वं धाल, “परमप्रभुं पुस्तां पुस्ता तक अमालेकीतलिसें ल्वानादी धकाः वय्कलं पाफयादीगु दु।”
Currently Selected:
प्रस्थान 17: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
