प्रस्थान 18
18
यित्रो व मोशा नापलाःगु
1परमेश्वरं मोशा व थः प्रजा इस्राएलया निंतिं छु छु यानादिल, गय् यानाः परमप्रभुं इस्राएलीतय्त मिश्रं पित हयादिल धइगु खँ मिद्यान देशयाम्ह पुजाहारी, मोशाया ससःबौ यित्रों न्यन।
2मोशां छुं ईया लागि थः कलाः सिप्पोरा व वया निम्ह काय्पिन्त थःछेँय् छ्वःबलय् वया ससःबौ यित्रों इमित लसकुस यात।#प्रस २:२१-२२ 3छम्ह काय्यागु नां गेर्शोम खः। मोशां “जि मेगु देशय् परदेशी जुयाच्वनागु दु” धकाः थथे नां छुना ब्यूगु खः।#प्रे ७:२९ 4मेम्हय्सिगु नां एलीएजर खः। थुकिया अर्थ “जिमि बौया परमेश्वरं जितः ग्वाहालि यानाः फारोया तरवारं बचय् यानादिल।”
5मोशाया काय्पिं व कलाःयात ज्वनाः यित्रो परमेश्वरया पर्वतया लिक्क मरुभूमिइ मोशा पाल ग्वयाः च्वनाच्वंगु थासय् वल। 6यित्रों मोशायात थथे धकाः बुखँ छ्वल, “जि छिमि ससःबौ यित्रो छिमि कलाः व छिमि निम्हं काय्पिन्त ज्वनाः छन्थाय् वयाच्वनागु दु।”
7मोशा थः ससःबौयात नापलायेत पिहां वल। वयात नाप लानाः भागि यानाः घय्पुल। इमिसं थःथवय् म्हंफु मफु न्यन। अले पालय् दुहां वन। 8मोशां थः ससःबौयात परमप्रभुं इस्राएलीतय्गु निंतिं फारो व मिश्रीतय्त यानादीगु फुक्क खँ, लँय् थःपिन्त जूगु दुःख व परमप्रभुं गथे यानाः इमित बचय् यानादीगु खः व फुक्क खँ कन।
9इस्राएलीतय्त मिश्रीतय्गु ल्हातं त्वःतकाः हयादीबलय् परमप्रभुं यानादीगु भिंगु ज्याखँ न्यनाः यित्रो तसकं लय्ताल। 10वं धाल, “छिमित मिश्रीत व फारोया ल्हातं त्वःतकादीम्ह परमप्रभुया जय जुइमा। 11मिश्रीतय्सं इस्राएलीतय्त क्वह्यंकूगुलिं परमप्रभुं इमित अथे यानादीगु दु। आः जिं परमप्रभु मेपिं द्यःत स्वयाः तःधंम्ह खः धकाः सिल।”
12अले यित्रों परमेश्वरया निंतिं होमबलि व मे मेगु बलि छाल। अले हारून व इस्राएलयापिं फुक्क थकालित मोशाया ससःबौ यित्रो नापं परमेश्वरया न्ह्यःने भ्वय् नयेत वल।
न्याय याइपिं ल्यःगु
व्य १:९-१८
13कन्हय् खुन्हु मोशा मनूतय्गु न्याय यायेत फ्यतुल। सुथंनिसें बहनि तक मनूत वयागु जवंखवं दनाच्वन।#व्य १:९-१८ 14यित्रों मोशां मनूतय्गु निंतिं यानाच्वंगु फुक्क ज्याखँ खनाः वयात न्यन, “छिं मनूतय्गु निंतिं यानाच्वनागु थ्व छु ज्या खः? छि याकःचा जक छाय् न्याय यायेत च्वनादियागु? थुलिमछि मनूत सुथंनिसें बहनी तक छिगु जवंखवं दनाच्वंगु दु।”
15मोशां धाल, “जिं थथे यायेमाः छाय्धाःसा मनूत परमेश्वरयागु इच्छा थुइकेत वइगु। 16इमि दथुइ छुं कचवं पिहां वल कि इपिं जिथाय् वइ, अले जिं इमिगु दथुइ न्याय यानाबीगु। अले इमित परमेश्वरयागु नियम स्यनेकने यायेगु।”
17यित्रों वयात धाल, “छिं यानादीगु थ्व ज्या पाय्छि मजू। 18थुकिं छि व छिथाय् वइपिं थुपिं मनूत नं त्यानुचाइ। थ्व छिगु निंतिं तसकं थाकुगु ज्या खः। छि याकःचां थ्व ज्या कःघाये फइ मखु। 19जिं छितः छुं बांलाःगु सल्लाह बी। अले परमेश्वर छिलिसे दइ। छि मनूतय्पाखें इमिगु ल्वापुख्यापु परमेश्वरया न्ह्यःने यंकेगु थिक जुइ। 20छिं इमित परमेश्वरया विधि व नियम स्यनेगु यानादिसँ। अले इपिं वनेमाःगु लँपु व इमिसं यायेमाःगु ज्या स्यनादिसँ। 21उकिं परमेश्वरया ग्याःभय काइपिं, मभिंगु ज्याखं लबः मकाइपिं, पत्याः यायेबहःपिं मनूतय्त ल्ययाः इमित झिम्ह, नेय्म्ह, सछिम्ह, द्वःछिम्हय्सिया नायः यानाब्यु। 22इमिसं हे न्ह्याबलें मनूतय्गु न्याय यायेगु यायेमाः। थाकुगु मुद्दा जक छिथाय् हय्केबियादिसँ। चिचीधंगु मुद्दा इपिं थःपिन्सं हे क्वःछीमाः। थुकथं छिगु ज्या इमिसं इनाकाइगुलिं छितः अपुइ। 23छिं थथे यानादिल धाःसा अले परमेश्वरं थज्याःगु आज्ञा बियादिल धाःसा छिं ताः ई तक ज्या यानादी फइ, अले मनूत नं लय्तायाः वने फइ।”
24मोशां थः ससःबौयागु खँ न्यनाः वं धाःथें हे फुक्क यात। 25वं इस्राएलीतय् दथुं व ज्या यायेफुपिं मनूतय्त ल्ययाः इमित द्वःछिम्ह, सछिम्ह, नेय्म्ह व झिम्ह-झिम्हय्सिया नायः यानाबिल। 26उबलय्निसें इमिसं मनूतय्गु न्याय यायेगु यात। थाकुगु थाकुगु मुद्दा इमिसं मोशायाथाय् हयेगु यात। चिचीधंगु खँय् इमिसं थःपिन्सं हे क्वःछिना छ्वइगु जुल।
27अले मोशां थः ससःबौयात बिदा बिल। यित्रो थःगु देशय् लिहां वन।
Currently Selected:
प्रस्थान 18: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
