प्रस्थान 16
16
स्वर्गं मन्न व बत्ताइ झंगः बियादीगु
1इस्राएलीतय् फुक्क खलः एलीमं न्यासि वन। मिश्र त्वःतूगु निगूगु लाया झिंन्यान्हु खुन्हु इपिं एलीम व सीनैया दथुइ लाःगु सीनया मरुभूमिइ थ्यंकल। 2सकल इस्राएलीतय्सं अन मोशा व हारूनयात कचकच यात।
3इमिसं थथे धाल, “जिमित परमप्रभुं मिश्रय् हे स्यानादीगु जूसा ला ज्यूगु नि। मिश्रय् दुबलय् जिमिसं ला व मरि प्वाः जाय्क नये दु। जिपिं फुक्कसित नये मखंक स्यायेत छिकपिन्सं जिमित थ्व हे मरुभूमिइ छाय् हयादियागु?”
4अले परमप्रभुं मोशायात धयादिल, “स्व, जिं छिमिगु निंतिं स्वर्गं मरि गाय्काहये। मनूतय्सं न्हियान्हिथं पिने वनाः उखुन्हुयात थःत माक्व नसा मुनेमाः। थुकथं इपिं जिं धयाकथं जुइ कि मजुइ धकाः जिं स्वये।#यूह ६:३१ 5खुन्हु दुखुन्हु इमिसं मेबलय् स्वयाः निदुगं अप्वः हयाः ज्वरय् यायेमाः।”
6अले मोशा व हारूनं इस्राएलीत फुक्कसित धाल, “बहनी छिमिसं छिमित मिश्रं पित हयादीम्ह परमप्रभु हे खः धकाः सी। 7अले सुथय् छिमिसं परमप्रभुया महिमा खनी, छाय्धाःसा परमप्रभुयागु विरोधय् छिमिसं याःगु कचकच वय्कलं न्यनादीगु दु। जिपिं सु खः धकाः छिमिसं जिमित कचकच यायेत?” 8मोशां हानं धाल, “परमप्रभुं छिमित बहनिइ नयेत ला व सुथय् माक्व नसा बीबलय् छिमिसं थ्व फुक्क वय्कलं यानाच्वंगु खः धकाः सी। छाय्धाःसा वय्कलं छिमिसं वय्कःया विरोधय् याःगु कचकच न्यनादीगु दु। छिमिसं जिमिगु विरोधय् मखु, बरु परमप्रभुया विरोधय् कचकच यानाच्वंगु दु।”
9अले मोशां हारूनयात धाल, “इस्राएलीत फुक्कसित धयाब्यु, ‘परमप्रभुया न्ह्यःने वा, छाय्धाःसा वय्कलं छिमिगु कचकच न्यनादीगु दु।’”
10हारूनं इस्राएलया फुक्क खलःयात थथे धयाच्वंबलय् इमिसं मरुभूमिपाखे स्वल। अन सुपाँचय् परमप्रभुया महिमा खने दयाच्वन।
11परमप्रभुं मोशायात धयादिल, 12“इस्राएलीतय्गु कचकच जिं न्यनागु दु। इमित धा, ‘बहनी छिमिसं ला नयेखनी, अले सुथय् नसां प्वाः जाइ। अले जि परमप्रभु छिमि परमेश्वर खः धकाः छिमिसं सी।’”
13उखुन्हु बहनी बट्टाई झंगः वयाः ख्यः त्वपुक च्वन। सुथय् ख्यःया चाकःछिं सुति लः गायाच्वन। 14सुति लः तनेधुंकाः मरुभूमिइ न्यंक पुगाःगु थें च्वंक बजिपौ थें च्वंगु खनेदत। 15व खनाः इस्राएलीतय्सं थःथवय् धाल, “थ्व छु खः?”
व छु खः धकाः इमिसं मस्यूगुलिं मोशां धाल, “थ्व परमप्रभुं छिमित बियादीगु नसा खः।#१ कोर १०:३ 16परमप्रभुं आज्ञा बियादीगु दु, ‘सकसिनं थःत माक्व मुंकि। फुक्क पालय् च्वंपिं छम्ह छम्हय्सिगु निंतिं छगू छगू ओमेर#१६:१६ ओमेर छगू ओमेर धयागु २ लिटर खः, थ्व पद १८, ३२,३३ व ३६ नं दु। मुंकि।’”
17इस्राएलीतय्सं इमित धा थें हे यात। गुलिंसिनं यक्व गुलिंसिनं कम मुन। 18इमिसं व ओमेरं दाना स्वःबलय् अप्वः मुंकूपिनि अप्वः मजू, कम मुंकूपिनि मगाः मजू। फुक्कसिनं माःछि जक मुन।#२ कोर ८:१५
19अले मोशां इमित धाल, “सुनानं कन्हय् सुथय् तक छुं नं ल्यंकातये मते।”
20अय्नं गुलिं गुलिंसिनं मोशां धाःगु खँ मन्यंसे सुथय् तकं ल्यंकातल। सुथय् उकी त्वँ दायाः नवयाः च्वन। थ्व खनाः मोशा इपिं लिसे तंम्वल।
21सकसिनं सुथय् थःत माक्व मुनीगु। अले निभाः छाइबलय् ल्यं दुगु नायावनीगु। 22खुन्हु दुखुन्हु इमिसं निदुगं अप्वः मुन, अथे धयागु छम्ह छम्हय्सिगु निंतिं निगू निगू ओमेर#१६:२२ओमेर निगू ओमेर धयागु प्यंगू व बागू (४.५) लिटर खः। खः। अले खलःया फुक्क नायःतय्सं वयाः मोशायात थ्व खँ कन। 23अले वं इमित धाल, “परमप्रभुं थथे हे धयादीगु खः, ‘कन्हय् विश्रामबार खः। थ्व परमप्रभुया निंतिं पवित्र विश्रामबार खः। उकिं मनूतय् छु छुइ यः, व हे छु, छु दय्के यः, व हे दय्कि। ल्यंदुगु कन्हय् सुथय् तक तयाति।’”#प्रस २०:८-११
24मोशां आज्ञा ब्यू थें इमिसं सुथय् तक ल्यंकातल। उकी त्वँ नं मदाः, नँ नं मवः। 25मोशां कन्हय् सुथय्खुन्हु धाल, “थौं छिमिसं थ्व न, थौं परमप्रभुया विश्रामबार खः। थौं छिमिसं बँय् छुं नं लुइके फइ मखु। 26खुन्हु तक छिमिसं मुंकि, न्हय्न्हु खुन्हु विश्रामबार जूगुलिं छुं नं दइ मखु।”
27अय्नं गुलिं गुलिंसिनं न्हय्न्हु खुन्हु नं माः वन, अय्नं छुं लुइके मफुत। 28अले परमप्रभुं मोशायात धयादिल, “गुबलय् तक छिमिसं जिगु नियमयात मानय् मयायेगु? 29स्व, परमप्रभुं छिमित विश्रामबार बियादीगु दु। उकिं परमप्रभुं छिमिगु निंतिं खुन्हु दुखुन्हु निन्हुयात नयेगु नसा बियादी। न्हय्न्हु खुन्हु छिपिं सकलें थथःगु थासय् हे च्वनाच्वनेमाः सुं नं थःगु थासं पिहां वने मज्यू।” 30अथे जुयाः मनूतय्सं न्हय्न्हु दुखुन्हु झासु लन।
31इस्राएलीतय्सं व नसाया नां “मन्न” तल। व धन्यापु थें च्वं। उकियागु सवाः धाःसा कस्तिइ दय्कातःगु मरि थें च्वं।#गन्ती ११:७-८
32मोशां धाल, “परमप्रभुं आज्ञा बियादीगु दु, ‘छिमित मिश्रं पित हयाबलय् मरुभूमिइ गज्याःगु नसा नकागु खः, लिपा वइपिं पुस्तातय्सं नं खनेमा धकाः इमिगु निंतिं छगू ओमेर कयाः तयाति।’”
33उकिं मोशां हारूनयात धाल, “छगः थल कयाः उकी छगू ओमेर मन्न तयादिसँ। लिपाया पुस्ताया निंतिं ल्यंकातयेत उकियात परमप्रभुया न्ह्यःने तयादिसँ।”#हिब ९:४
34अले परमप्रभुं मोशायात आज्ञा बियादीगुकथं हारूनं बाचाया सनूया न्ह्यःने दयाच्वनेमा धकाः मन्न तल। 35इस्राएलीतय्सं बाचा चिनातःगु देशय् मथ्यंतले पिइदँ तक मन्न नयाच्वन। कनान देशय् मथ्यंतले इमिसं मन्न नयाच्वन।#यहो ५:१२
36छगू ओमेर धयागु छगू एपाया झिब्वय् छब्व खः।
Currently Selected:
प्रस्थान 16: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
