LOOMƐITIƐ 4

Eeƃɔlɔhɛ̃ɛ ɣa ga po‐kɔ̃ɔ

1Zɛƃɛi sa da bo é vile Eeƃɔlɔhɛ̃ɛ va nii é ga de mama gwɔlɔi nu ƃuse ŋeteai mavele ma? 2È ɣɛ Eeƃɔlɔhɛ̃ɛ na tii‐ɣɛɛ vele ɣa Gala gɛ lɛ kɛɛ‐zɔgi vɛɛni la ba ga faa, a kɛ tii kɔ́wɔ lo‐su ɔ́ ɣɛ ma ga é yoka teve. Kɛ̀ ɛ́ lɛ ga é kɛ Gala gaazu. 3Zɛƃɛ ɣa Gala kɔlɔi bosu? Tɔ ɣɛɛzu tea, “Eeƃɔlɔhɛ̃ɛ laani ga Gala. Na wɔ ge kɛ Gala ge siɣi ga tele‐bo tuo‐wo nu.” 4Tɔwɔ nu ɣa tii ɣɛɛ na, fɔɔnɛi lɛ ɣɛɛ ga faa‐nɛɛ. Kɛ̀ towaa ɣe ga kui‐wuloa. 5A li na ga nui nii wɔ vele ɛ́ lɛ tii ɣɛɛzu, tɔwɔ dái ga Gala, ka ná zee‐la‐mai ziɣi zéea ga tele‐bo tuo. Na ɣa ga Galagi nii yá kɛ Gala tuo‐wo tala vea ɣɛɛ‐zɔgi lɛ vɛɛ te va ga faa. 6Vele nɔ na Deeve tuuyiɛ loozu la Gala kɔlɔi zu nui nii ma Gala ka siɣi ga tele‐bo tuo‐wo nu, malii wɔ kɛɛ vele laale bɛ́. Tɔ ɣɛɛzu tea, 7“Tuuyiɛ ɣa nui niitiɛ ma te luo vele yowũi zu ʋaa yɛgɛi, ta ʋaa yowũitiɛ ɣaazu vai. 8tuuyiɛ ɣa nui ma de maliɣii lɛ ná faa yowũi vɛɛ ba ga faa.” 9?Tuuyiɛi nii loovɛ nɔ numaitiɛ ʋaa ma te zeiyai kpoto ma, ƃaa toovɛ ƃalaa pɛ niitiɛ ma tɛ lɛ zeini kpoto ma? Da bosu ga Gala ge Eeƃɔlɔhɛ̃ɛ ziɣini ga tele‐bo tuo‐wo nu zee‐la‐mai ʋaa ma é ɣɛni zéea. 10Nii wɔ ge ɣɛɛni sa la ɣɛ le? ?Gala ge kɛɛni la tɔ teɣa ɣɛ seizu kpoto ma, ƃaa te seini kpoto ma pɛ ɔ́ teɣa ɣɛ ɣɛɛzu la? Ɛ́ lɛ ŋɛni zeini kpoto ma, ɣɛɛ la. Ɛ́ ɣɛɛni la pɛ tɔ teya ɣɛ seizu kpoto ma. 11Sei‐kpoto‐ma woni la ga é ɣɛ ba ga Gala zee‐wo tele‐bo tuoi wulu‐ƃaa ʋaa ma. Na ɣa ga tele‐bo tuoi nii é maa zɔlɔ woni zee‐la‐ma zaala zu kɛ́i ma dɛ ga nui nii ɛ́ lɛ ŋɛni zeini kpoto ma. Zaƃui nii ɣɛɛni la é ɣɛni ga numaitiɛ te Gala maʋaa ziɣia ga gaama tɔwɔ tɛ lɛ zeini kpoto ma, Eeƃɔlɔhɛ̃ɛ ɣɛ ga te pɛ te ɣeea. Te ɣɛ sa ga nui niitiɛ Gala ka te ziɣi ga tele‐bo tuo‐wo bea na mavele ma. 12Na ɣa wulo na su wɔnɔ é ɣɛ ga sei‐kpoto‐ma veaitiɛ te ɣeea. Na ɣa ga niitiɛ tɛ lɛ nɔ zeini kopoto ma ɔ́ wɛ̃ɛ na va, kɛ̀ te vilega zee‐la‐ma mawo‐kɔ̃ɔgi wulu. Na ɣa ga zee‐la‐mai nii é ɣɛni de mama gwɔlɔ Eeƃɔlɔhɛ̃ɛ ya tɔ teɣa ɣɛ seizu kpoto ma.

Eeƃɔlɔhɛ̃ɛ ki‐to maa zɔlɔ woni zee‐la‐ma zaala zu

13Ki‐togi é woni ga Eeƃɔlɔhɛ̃ɛ ta manu zuwuitiɛ ga te weli ka ɣɛ ga zuu pɛ, ɛ́ lɛ ŋɛni woni ga tiɛ Gala na tɔgi zaala zu. Kɛ̀ é woni ga tiɛ tele‐bo tuoi zaala zu maa zɔlɔ woga zee‐la‐mai ma‐vele ma. 14Ani taitiɛ te ɣatagɛi tɔgi zu ʋaa‐ɣɛɛ va ta ɣa te weli ge ga zui, a kɛ tii zee‐la‐mai ɣɛɛ‐zu lɛ ɣɛɛ ma, ki‐togi ɣa ɣɛ nɔ ga ƃɔɔvɛ ʋaa. 15Ƃɔvɛlaale tɔgi ɣa kɛ Gala na zii‐ɣaa‐wãlai ziiti nu ma. Kɛ̀ vɛ tɔ gɛ lɛ na tɔ‐kãla‐ŋala faa lɛ ɣɛɛ na. 16Na ɣa maʋai ɣaazɔ zɛlɛgɛi la ga zee‐la‐ma, kɛɛ ʋaa ma Gala na ki‐togi ɣɛ nɔ ga faa‐nɛɛ. Na ɣa ɣɛɛ na é yɛ laani laa‐zu Eeƃɔ‐lɔhɛ̃ɛ manu zuwui ɣaazɔ ʋaa ma. É mɛ lɛ nɔ ɣɛ niitiɛ ʋaa ma te ɣatagɛi tɔgi zu‐ʋaa‐ɣɛɛ va. Kɛ̀ é ɣɛ ƃalaa pɛ niitiɛ ʋaa ma te vɛɛ Eeƃɔlɔhɛ̃ɛ va zee‐la‐ma ɣɛ te ya, ƃɔvɛlaale tɔ ga de ɣaazɔ pɛ de ɣeea. 17È ɣɛ velei ponɛi la Gala kɔlɔi zu Gala giɛ ɣɛ Eeƃɔlɔhɛ̃ɛ ma, “Gà è ɣɛ ga zii lamaa keea.” Nii ɣɛɛni Galagi nii ɣaazu Eeƃɔlɔhɛ̃ɛ maʋaa ziɣini ga gaama, é ga Galagi nii yá saa vea yɛʋu loo te zu, na ya ɣɛɛ na ŋɛnii niitiɛ tɛ lɛ ŋetea yiɛ kɛ tiɛ ɣɛ na. 18Tei tɔwɔ Eeƃɔlɔhɛ̃ɛ ɣi‐to‐su ɣɛ ma é fai nii ziɣini ga gaama kpái ga nu ɣigi ɣɛ ba ga towaa ɣɛ bɛ́. Na ɣa ga é laani la ga towaa ɣɛ ga zii lamaa keea è ɣɛ velei Gala ge boni la ma yiɛ ɣɛ ma, “Vele ɣa na è mazuwui ɣa ɣɛɛ la.” 19Fii lɛ ƃɛɛni zee‐la‐mai zu tei é ɣi gaa ziɛni ƃalaa ƃɔɔ lɔtɔi nii zu maʋaa wuloai ɣɛ nɔ sa ga nu ɣa za, ƃɔvɛlaale kwena tiigoi é kɛɛni ŋetea ɔ́ zoo sa é ziiti wũ gila su. Fii lɛ wɔnɔ ƃɛɛni ƃalaa tei é ɣi gaa ziɛni ŋazai seelɔ na kubu‐ʋɔɔ vai zu. 20Suuvi‐zu ʋaa ta nɛpɛ gɛ lɛ kɛɛni sakpe gɔ vili zii zu Gala na ki‐togi ʋaa ma. Kɛ̀ su ƃaani ná zee‐la‐mai zaala zu yiɛ Gala daa maa lɛ. 21Dai ɣɛ la ga ƃɔɔƃɔɔ su ga fai Gala ge ki toni la towaa kɛ. 22Na ɣa é kɛɛni Gala ge zee‐la‐mai ziɣi zéea ga tele‐bo tuo. 23Kɛ̀ woi nii ga “É siɣini zéea ga tele‐bo tuo,” ɛ́ lɛ nɔ wonɛni Gala kɔlɔi zu tɔ ɣilekpu faa ma. 24Kɛ̀ ponɛvɛ de ʋaa ma ƃalaa pɛ. Da yee‐la‐mai ɣa ɣɛ ga tele‐bo tuo de ʋaa ma ƃalaa pɛ dai de nui nii maʋaa ziɣia ga gaama é Ziizɛ wu ziɣini saa ya, Ziizɛi nii é ga de maliɣii. 25Towa te paani da lɔ‐kãla‐ŋala fai ma, Gala ge bu ziɣi wɔnɔ saa ya kɛɛ ʋaa ma de ɣɛɛ‐zɔ yowũi mɛ lɛ vɛɛ de va ga faa.

Currently Selected:

LOOMƐITIƐ 4: DN1971

Highlight

Copy