LOOMƐITIƐ 5

Tele‐bo tuoi zu lɔnɔi

1Tei tɔwɔ Gala gɛ lɛ de ɣɛɛ‐zɔ yowũi vɛɛni de va ga faa da yee‐la‐mai mavele ma, zii laavɛ de ʋaa ma de maliɣii Ziizɛ Kolai zaala zu. 2Saala zu ɣa maa‐wõi‐ɣaa ƃɔ‐bai nii maa zɔlɔ wogɛi la de vɛ de malogi zu. Na ɣa‐ɣɛɛ na da wuu zu nɛɛ de ɣi kɛɛ ʋai ma ba ga de wɔɔ laa ɣe Gala na saala‐malai va. 3Ɛ́ lɛ nɔ wɛ̃ɛga na va. A da wuu zu nɛɛ da laa‐nɔwɔ‐wogi zu kwɛ̃ɛ pele ma de vɛ ga daa‐nɔwɔ‐wogi ɣa a va ga zii‐lɔɔ, 4zii‐lɔɔ wɔ ge nu zu ƃaa tuo vagɔ‐wogai zu, tuo vagɔ‐wogai kɛ nu ɣi‐to‐su ɣɛ ma. 5Tɔwɔ de ɣi‐to‐suvɛ lɛ wuloa de wu dɔ vɛɛ ya, ƃɔvɛ‐laale Gala ge ná wõilai wua de yii zu baa ŋinɛgi é tevega de wɔ sáala zu. 6Tei dɛ ƃɔɔ nɔ ɣɛɛ‐zu lɛ ŋɛni de vɛ Kolai zaani de ʋaa ma, dai de ga Gala tuo‐wo tala vea. É kɛɛni kɛɛ‐zu. 7Tɔwɔ ná ƃaavɛ ga nu za tele‐bo tuo‐wo nu ʋaa ma, velei ƃalaa nui nii é ga nu vagɔ nui ta yii ɣa lɔɔ la ga é za maʋaa ma ƃalaa siɛ ta zu. 8Tɔwɔ Gala ka wõilai lɛɛzu é zéea de ʋaa ma toku ge zei ga de ɣɛni nɔ ga faa yowũ‐ɣɛɛ vea Kolai za de ʋaa ma. 9Tei tɔwɔ maŋamai kɛɛ de ɣɛɛ‐zɔ yowũi lɛ ɣɛɛzu de va ga faa, vele nɔ na kɔnɔ Gala na zii‐ɣaa‐wãlai ɣa ʋoolo la de va sáala zu. 10To mu de yɛga ga Gala kɔɔ yɔ̃wɔa de yɔɔzu ƃɛtɛ da tiɛni dúi na saa ʋai zaala zu, kaalima teɣa sa a de yɔɔzu ƃetei da tiɛni a da valo dúi na ŋeteai zaala zu. 11Ɛ́ lɛ nɔ ga na. Kɛ̀ a da kuu‐zu‐nɛɛ wulo Gala maʋai zu de maliɣii Ziizɛ Kolai zaala zu. Towa é ɣɛɛ ga zaƃu a da Galani de yɔɔzu ƃɛtɛɛ.

Adã ƃɔga Kolai

12Na ma è ɣɛ velei faa yowũ vaani la zui zu nu ɣila daa‐zɔ su, saa wɔ ge va faa yowũ laa‐zɔ su, vele nɔ na saa ƃɔʋɔɔ la nu pɛ ma, ƃɔvɛlaale nu pɛ ge faa yowũ ɣɛɛ. 13Ƃɔɔƃɔɔ su faa yowũ ɣɛni zui zu Gala gɔ teɣa ɣɛ tɔgi laazu, kɛ̀ vɛ tɔ gɛ lɛ na faa yowũ lɛ ɣɛɛ na ga faa. 14Na ƃalaa ɣɛɛvɛ gaa‐ƃaa ɣɛni nɔ saa ya é ziɣi ƃɔ Adã na yɛmini su ma é loo Mooze na dɛi ma. Gaa‐ƃaa ɣɛni zéea ƃalaa pɛ niitiɛ maazu ta ʋaa yowũi lɛ ŋɛni ga Adã na tɔ‐kãla‐ŋala fai ɣavele. Na ɣa ga Adã nii é ɣɛni ga po‐kɔ̃ɔ nui nii ʋaa ma é ɣɛni vaazu vaazu.

15Kɛ̀ Gala na faa‐nɛi ƃɔga faa yowũ tɛ lɛ vɛɛni kii la. Toku ge zei ga velei ƃalaa Adã tɔ ɣilekpu na faa yowũi kɛɛ la nu lamaa za, Gala na maa‐wõi‐ɣaa ƃɔ‐bai ta ná faa‐nɛi é kɛɛ nu gilagi nii é ga Ziizɛ Kolai na kpɔ‐bai zaala zu gwala ƃakpavɛ nu lamaa ʋaa ma é leve faa yowũ na dɛi va. 16Gala na faa‐nɛi ƃɔga nu ɣilagi na faa yowũi zu mɔsɔgi tɛ lɛ ƃɔni. Ƃɔvɛlaale faa‐wo gaa‐leveai kuloai faa yowũ ɣilagi wulu vele zu towaa é vaa ga faa‐yɛ‐ma. Kɛ̀ faa yowũ lamaa ɣɛi ma, faa‐nɛi é ɣɛɛ tɔ ga nii yá kɛ nu ɣɛɛ‐zɔ yowũi lɛ vɛɛ ba ga faa. 17Tei tɔwɔ nu ɣilagi na faa yowũi mazaƃu ɣa gaa‐ƃaa ɣɛɛ la saa ya nu ƃuse maazu nu ɣilagi na laa‐zɔ su, taitiɛ kpɔ‐bai maa zɔlɔ wogɛi te vɛ ga kpakpaa ta tele‐bo tuoi Gala ge kɛɛ te vɛ ga faa‐nɛɛ, gaa‐ƃaa ɣa ɣɛ maveaitiɛ ya ta ƃalaa ʋululai zu nu ɣilagi zaala zu, na ɣa ga Ziizɛ Kolai. 18Na ma velei nɔ nu ɣila na faa yowũi kɛɛ la faa ɣɛ nu pɛ ma, vele nɔ na nu ɣila na tele‐bo tuoi ɣa ɣɛɛ la ga zaƃu nu pɛ kɛɛ‐zɔ yowũi lɛ vɛɛ ba ga faa é kɛ zɛʋu ɣɛ nu pɛ zeea. 19Ƃɔvɛlaale velei nɔ nu ɣila na goo‐mɛni talai kɛɛni la nu lamaa ɣɛ ga faa yowũ‐ɣɛɛ vea, vele nɔ nu ɣila na goo‐mɛni‐kuloai ɣa nu lamaa ɣɛɛ la ga tele‐bo tuo‐wo bea. 20Tɔgi vaani ga é faa yowũ zu wɔɔlɔ ma. Kɛ̀ vɛ nɛpɛ faa yowũi zu wɔɔlɔni na Gala na gaazu‐maa‐wõi‐ɣaa ƃɔ‐bai zu wɔɔlɔni na zee leve faa yowũi na dɛi va, 21kɛɛ ʋaa ma velei nɔ gaa‐ƃaa ɣɛni la faa yowũ ya de maazu saa zaala zu, gaa‐ƃaa ɣɛ ƃalaa wɔnɔ ŋɛ na gaazu‐maa‐wõi‐ɣaa ƃɔ‐bai ya tele‐bo tuoi zaala zu. Na ɣa ɣɛɛ na é va ga zɛʋui nii kwɛ̃ɛ gɛ lɛ ba de maliɣii Ziizɛ Kolai zaala zu.

Currently Selected:

LOOMƐITIƐ 5: DN1971

Highlight

Copy