LOOMƐITIƐ 3

1Nu ɣɛɛ ʋai ga Dusi, zɛƃɛ mu ka sa a siɣi nu ma? Ɔɔ zɛƃɛ ɣa é ga sei‐kpoto‐mai mawulo‐nu‐mai? 2Tɔ ga faa ƃakpa pelei ɣaazɔ zu. Mamaa wũgi pa ka ga Dusiitiɛ ɣa Gala daa woi ziitini te ma ga te daa‐zɔ bo. 3Zɛƃɛ ɣa ɔ́ ɣɛ ani te taniga tɔ ɣɛ na ga zee‐la‐ma lala vea? ?Gala kɛɛ ʋai ga nui nu ɣa laa la ta yee‐la‐ma lalai ɔ́ na ziɣi ma? 4Ɛ́ lɛ wɔlɔ‐wɔlɔ ŋɛ na! Kɛni nɔ da ʋa bu ga Gala ka ga tɔyã nu, nu pɛ ge ɣɛɛvɛ ƃalaa ga zɛɛ ʋaa vea. È ɣɛ velei ponɛi la é vile Gala ba, mawoi ga

“È laa woi ɣa kɛ faa ziɣi è va,

ta yà ʋaa‐wogi wo na é nɛɛ è ma.”

5Kɛ̀ ani da luo velei yowũi ɣa ɣɛ na ga zaƃu Gala na tele‐bo tuoi maa wodo, zɛƃɛ ɣa da bo? ?Da bo ga Gala ka yii ɣaa wãla na de ma towaa ɣɛ woia tuo wosu? Gà ƃɔɛzu é vile ba è ɣɛ nu ɣa ɣe ƃɔɛzu é vile nu ƃuse va. 6Ɛ́ lɛ wɔlɔ‐wɔlɔ ŋɛ na! Toku ge zei ga ani Gala gɔ ɣɛ na ŋɛ na, ɔ́ zoo ɣɛ le é zui zu ʋaa‐wogi ɣaa leve? 7Kɛ̀ ani Ƃaa ƃakpa ɣa laa na Gala ma ná gaama ʋai wulo vele ma podo ɣala‐kala ga nà zɛɛ ʋai mavele ma, zɛƃɛi sa yá kɛ faa yɛ dɛ nɔ mà kɛ̀ɛ ʋai ma ga faa yowũ‐ɣɛɛ nu? 8Kɛ̀bɛ nu ɣa faa yowũ ɣɛ kɛɛ ʋaa ma faa vagɔ wulo su? Vele ɣa na nui taniga te gè laa ŋala‐ŋalasu la te ɣɛ gá ɣa gé na wosu. Tɔ pele ma ga faa yɛ numai natiɛ ma.

Nu ta lɛ ga tele‐bo tuo‐wo nu

9Zɛƃɛ mu be? Dai de ga Dusia a de ʋize wogɛ de vaa va? Ƃa. Ɛ́ lɛ ŋɛ na! De boga ga nu pɛ ka faa yowũ na gaa‐ƃai yee wu, na ɣa ga Dusia pɛ Geliikia pɛ. 10Ɛ ɣɛ velei ponɛi la Gala kɔlɔi zu mawoi ga,

“Nu ta nɛpɛ gɛ lɛ ga tele‐bo tuo‐wo nu,

nu gila kpalaa.

11Nu ta nɛpɛ gɛ lɛ faa ɣaa ɣaazu,

nu ta nɛpɛ gɛ lɛ Gala maa vele ɣaa ziɛzu.

12Nu pɛ ge ziɣia pele va, te pɛ te luo velei lɛ pele ma.

Nu ta nɛpɛ gɛ lɛ faa vagɔ ɣɛɛzu,

nu gila kpalaa.”

13Gala kɔlɔi ɣa ɣɛɛzu tea,

“Te wɔdavɛ wulovɛ ga kaba yeɣei daa laogɛi,

te laa ŋɛni ga gaa‐wɔlɔ‐boga.”

“Kaali wãla ɣa laani te laa wulugitiɛ zu.”

14“Koto ƃakpavɛ te la te wuu zu yowũai te ma.”

15“Te wɔwɔ maa ʋilevɛ mala wuu ziɛzu,

16ta leve peleitiɛ zu ŋala‐ŋala te va na ga zii‐zuuli.

17Nii é ga zii‐laa velei tɛ lɛ kwɛ̃ni.”

18“Duo‐ba nɛpɛ gɛ lɛ te ɣaazu Gala faa ma.”

19Tɔwɔ de kwɛ̃ni ga nii nɛpɛ Gala na tɔgi ɣa bo towaa ɣɛ numai niitiɛ ʋaa ma te tɔgi yee wu. Na ɣa ɣɛ kɛɛ ʋaa ma goo‐zu‐wulo‐kɛɛ mɛ lɛ ɣɛ nu ta nɛpɛ da, kuloai bu zii pɛ bɛ ga faa yɛ te ma Gala gaazu. 20Su‐wulo‐zu ɣa ga tei tɔwɔ tɔgi zaala zu ɣa da ɣele‐ɣele da faa yowũ maʋaa zu, faa lɛ ziɣia nu ta nɛpɛ ba Gala gaazu tɔgi zu ʋaa‐ɣɛɛ vele ma manui vɛ.

Tele‐bo tuoi ɣa ʋa zee‐la‐ma zaala zu

21Tɔwɔ Gala na tele‐bo tuoi maʋaa ɣaa wodovɛ sa ná tɔgi wɔɔ laa ƃalaa ziɣi ba. To mu Gala na tɔgi mawɔlɔi ƃoga Gala daa woo‐wo beaitiɛ ta wɔlɔi ta mazeele woo ʋeezu. 22Tɔ ga nu‐ɣɛɛ Gala ka bo ga nui kɛɛ‐zɔ yowũi lɛ vɛɛ ba ga faa. Towaa kɛ zee‐la‐mai mazaƃu ma yá ɣɛ nuitiɛ ɣaazɔ ya te Ziizɛ Kolai ʋaa ziɣia ga gaama. Te ta laa lɛ wuloni su ga tee. 23Tei tɔwɔ nu pɛ ge faa yowũ ɣɛɛ, na ɣa ɣɛɛ na te vala Gala na saala‐malai ma, 24ná gaazu‐maa‐wõi‐ɣaa ƃɔ‐bai mazaƃui nɔ ɣa ɛ́ lɛ te ɣɛɛ‐zɔ yowũi ɣɛɛ la te va ga faa. Towaa kɛ te vɛ ga faa nɛɛ wũ‐maa‐wogi zaala zu Ziizɛ boga ga nu ƃuse. 25Na ɣa ga Ziizɛ Kolai nii Gala ge teveni ga máŋamai é faa yowũ maʋaa zu ƃɛtɛ. Tɔwɔ zee‐la‐ma ɣa nu ɣa minɛ maa zɔlɔ wo da. Gala ge nii ɣɛɛni ga é ná tele‐bo tuoi lɛ, ƃɔvɛlaale faa yowũ maa wũgi nu ƃuse kɛɛni é laa wuloa su ná zii‐lɔɔ‐wuloai mavele ma. 26É kɛeni kɛɛ ʋaa ma é dɛ zai ŋɛ ni ga tɔ ɣagi tɔ ga tele‐bo tuo‐wo nu. É dɛ wɔnɔ ga nui dái ga Ziizɛ towaa kɛ manui ɣɛɛ‐zɔgi lɛ vɛɛ ba ga faa.

27?Da yoka‐teve ʋai na dɔ laa ɣa sa ga minɛ? Kɛɛ‐zu nɛpɛ gɛ lɛ ma. Zɛƃɛ ɣa ɛ́ lɛ kɛɛ‐zu ɣɛɛni ma? ?De ɣɛɛ ʋai mazaƃu ma? Ɛ́ lɛ ŋɛ na! Tɔ ga zee‐la‐mai mazaƃu. 28Ƃɔvɛlaale de laavɛ la ga zee‐la, ma ɣa yá kɛ nu ƃuse ɣɛɛ‐zɔ yowũi lɛ vɛɛ ba ga faa. Kɛ̀ tɔgi zu ʋaa‐ɣɛɛ vele laale. 29?Ƃaa Gala ka nɔ ga Dusiitiɛ ta ɣilekpu ta ɣala? ?Ɛ́ lɛ ga zii ƃalaagitiɛ ƃalaa ta Ɣala? Ɛ́ lɛ ŋe na! Tɔ zii ƃalaagitiɛ ʋaa ma ƃalaa pɛ, 30ƃɔvɛlaale Gala ka nɔ ɣilekpu. Niitiɛ te zeiyai kpoto ma, Gala gɛ lɛ te ɣɛɛ‐zɔ yowũi vɛɛ te va ga faa ta yee‐la‐mai mazaƃu ma. Niitiɛ wɔnɔ tɛ lɛ zeini kpoto ma, ɛ́ lɛ te ɣɛɛ‐zɔ yowũi vɛɛ te va ga faa toku ge zei ta yee‐la‐mai va. 31?A da sa mu da Gala na tɔgi maʋaa loo ya zee‐la‐mai nii maʋaa ma? Ɛ́ lɛ wɔlɔ‐wɔlɔ ŋɛ na! To mu a da tɔgi maʋaa zo kpãa.

Currently Selected:

LOOMƐITIƐ 3: DN1971

Highlight

Copy