LOOMƐITIƐ 2

Gala na tele‐bo faa‐wo gaa‐leʋeai

1Na ma goo‐zu‐wulo‐kɛɛ lɛ ɣɛɛ è la è ɣɛɛvɛ ƃalaa ga nu mazii ta nɛpɛ, ani nɔ yà ɣɛ na nu na faa‐wo gaa levezu. Toku ge zei ga yà ɣɛ na faa vɛɛzu manui va, faa ɣa na yà ɣɛ zɛsu ƃɔɔ ma. Ƃovɛlaale yài è ga faa‐wo‐bo nui, fai manui kɛɛzu maziitiɛ nɔ ɣa è te ɣɛɛzu. 2To mu de kwɛ̃ni ga taitiɛ ta nii ɣavele luoi wo Gala ka faa vɛɛ te va ga gaama vele. 3È ɣigi zu, numaitiɛ ta na ɣavele ʋaitiɛ ɣɛ yà ta ʋaa‐wo bo, fai wɔgi nɔ te kɛɛzu yìɛ na ɣɛ, Gala ge ƃe faa vɛɛzu è va? 4Ƃaa Gala na tuola nɛɛ ƃɔga zii‐lɔɔ ʋai yiɛ yii lɔ nu ɣɛɛ‐zɔ ga, yà te maʋai ziɣizu nɔ ga soloya ʋaa? ?Ɛ̀ lɛ kwɛ̃ni ga Gala na tuola‐nɛɛ ʋai ɣa è pele wulozu la ga yiɛ ga è wulu ɣaa ʋe faa yowũ va? 5Tɔwɔ è wui‐zu‐ƃɔlɔ pelei ma, ɛ̀ lɛ kɛɛzu ɔ̀ wulu ɣaa ʋe faa yowũ va. Yà zii‐ɣaa‐wãla ɣaa kpɔsu ba ƃɔɔ ʋaa ma zii‐ɣaa‐wãla voloi ʋaa ma. Na ɣa ga foloi Gala ka ná tele‐bo faa‐wo‐gaa‐leve ʋai maʋaa wulo la kɛnɛ ma. 6Ƃɔvɛlaale nii nɛpɛgi nu ɣa kɛ tɔ nɔ ɣa Gala ka su loo bɛ́. 7Niitiɛ ta ɣɛ saala‐mala mavele ɣaa ziɛzu ta wũfe‐ma é vɛɛ te yɛ fai va ŋetea wɔ, tie nii ɣɛ faa vagɔ‐ɣɛɛ vele ma te vɛ ga zii‐lɔɔ, zɛʋui nii kwɛ̃ɛ gɛ lɛ ba Gala ka fe te ya. 8Kɛ̀ taitiɛ te ƃalai nɔ ƃɔɔ ʋaa ma tɛ lɛ goo‐mɛni kuloa gaama ʋaa zu kɛni nɔ faa yowũ, zii‐ɣaa‐wãla ɣa ziiti te ma. Gala ka woei leve te ya. 9Faa ƃoei ƃɔga zii‐zuuli ƃakpa ta ɣɛ nu ƃusei niitiɛ ʋaa ma ta faa yowũ ɣɛ. Ta ziiti Dusiitiɛ ma ga maa wũ pa te ziiti wɔnɔ Geliikiitiɛ ma. 10Kè saala‐ma, wũfe‐ma é vɛɛ zii‐laa va ta ɣɛ nui nɛpɛ faa ma yá faa vagɔ ɣɛ. Ta ɣɛ Dusiitiɛ ʋaa ma ga maa wũ pa te ɣɛ wɔnɔ Geliikiitiɛ ʋaa ma. 11Ƃɔvɛlaale Gala gɛ lɛ nu zu yɛvɛga. 12Taitiɛ ɣaazɔ te faa yowũ ɣɛɛ tɛ lɛ kɛɛni Gala na tɔgi yee wu, te zu ɣa ƃɔnɔ wo tɔgi wɔɔ laa ziɣi ba. Na ɣa ɣɛɛ na niitiɛ ɣaazɔ te faa yowũ ɣɛɛ tɔgi yee wu, tɔgi laa woi ɣa ta ʋaa‐wogi ɣaa ɣa leve ma. 13Toku ge zei ga Gala na tɔgi laa woi mɛni bea lei tɔ ɣɛ ga tele‐bo tuo‐wo bea Gala gaazu. Kè tɔgi zu ʋaa‐ɣɛɛ veaitiɛ ɣa faa lɛ yɛga te ma. 14Ani zii ƃalaagitiɛ Gala na tɔgi lɛ te ya ta ɣɛ na ziɛzu ga daa woi zɛ pele ma te ɣigi zu te wulo la ŋetea, a kɛ tii ta ɣa te ga tɔgi ƃɔɔ ʋaa ma, velei ƃalaa Gala na tɔgi lɛ la te ya. 15Nii tɔgi boga ga nu kɛ ta dɛɛzu luo velei zu ga ponɛvɛ te yii zu. Ta ɣi‐gaa‐ziɛi ɣa ƃalaa pɛ seele woo ʋeezu ta ɣi‐gaa‐ziɛ wuulee‐wuuleegi ɣa te ɣɛɛ‐zɔgi lɛ ɔɔ ɣɛɛ ta é te woo zu wulo. 16na maʋoloi. Na ɣa ga foloi nii Gala ka nu ƃuse yaa ʋaa loowu faitiɛ maʋaa‐wogi ɣaa lɛve la Ziizɛ Kolai zaala zu. Nii ɣa ɣɛ ga velei gè wo ɣala bosu la woo niinɛ vagɔi zu

Dusiitiɛ ʋɛɛ Gala na tɔgi ʋa

17Ani kilaa ʋaa zu yà ƃɔɔ ziɣi na ga Dusi nu, yà yee la Gala na tɔgi ma yiɛ yoka teve wo yɔɔzuvɛ ʋaa ma wa Gala. 18Yà zii‐mai wɛ̃ɛ. Niitiɛ te vagɛi faa lɛ te va yà yee zei natiɛ te maʋaa wu toku ge zei ga kala‐bo ka wo ga yiɛ tɔgi zu. 19Yà laa la ga yà ga pele‐wulo nu ga numai niitiɛ tɛ lɛ wɛlɛɛ è ga ŋada wodoai niitiɛ ʋaa ma te kpidi zu. 20Yà kɔnɔ yà ɣɛ ga nui yá titi beaitiɛ vile pele va è ga kala‐mɔɔ lopaitiɛ ʋaa ma, toku ge zei ga kele‐ɣelegi pɛ gaamai pɛ ta ɣɛ tɔ kɔlɔi zu te ɣɛ è ya. 21?Ani tɔwɔ nii pɛ ka ɣɛɛ na è ya yiɛ numai zɔitiɛ ɣala bo, ɛ̀ lɛ kɛɛ ɔ̀ ƃɔɔ ɣala bo? ?Tei tɔwɔ yà ɣɛ bosu ga nu mɛ lɛ wũmɔ wo, yà ɣagi yà wũmɔ wo? 22?Yài yà ɣɛ bosu ga nu mɛ lɛ vile nu ŋaza wulu, yà ɣagi yà kɛ? ?Maa‐niini galaga maa yɛ̃ɛlɛvɛ è ɣaazu yìɛ wũmɔ wo ta ʋeli wɔta walaitiɛ wu? 23?Yài è Gala na tɔgi mayoka tevezu, yà wũfe‐ma lala luo wo ga Gala ná tɔgi ŋala‐ŋala pele ma yiɛ? 24Su‐wulo‐zuvɛ ɣa. Ponɛvɛ Gala kɔlɔi zu mawoi ga “Gala daa ŋala‐ŋalagɛ zii ƃalaagitiɛ zaama wo mazaƃu ma.” 25Sei‐kpoto‐ma zu lɔnɔi ɣa ɣɛ ba ga gaama ani yà ziɛ na ga Gala na tɔgi. Kɛ̀ ani yà tɔgi ŋala‐ŋala na, è maʋaa ɣa wulo è ɣɛ nui ɛ́ lɛ zeini kpoto ma. 26Na ma ani nui lɛ zeini kpoto ma towaa ɣɛ na ziɛzu ga tɔgi laa woi, kɛ̀bɛ nu ɣa siɣi ga nui nii seiyai kpoto ma? 27Kɛ dɔɔ mu numai niitiɛ sei‐kpoto‐ma lɛ woni ga tiɛ nu ɔ́ kwɛ̃ɛ ba te lɔtɔi ma ta faa vɛɛ wo va ga woo, wai tɔgi wonɛi é wo ya é vɛɛ sei‐kpoto‐ma ʋai va, tɔwɔ wiɛ tɔgi ŋala‐ŋala, 28Su‐wulo‐zu ɣa ga Dusi ƃɔɔƃɔɔgi lɛ nɔ ga nii maʋaa wuloai podo ɣala‐kala ga, ɔ́ nɔ ɣɛ ga sei‐kpoto‐ma ƃɔɔƃɔɔgi ɣe ga podo‐ɣala‐kala‐ga ʋaa ta nii ta kɛ ga nu lɔtɔi. 29Dusii ɣa ga nui nii é ga Dusi ga wuu zu vele. Na ɣa ɣɛɛ na sei‐kpoto‐ma ƃɔɔƃɔɔgi ɣa ga nu yii zu ʋaa ta nu na ki‐gaa‐ziɛi. Ɛ́ lɛ ga fai nii ta kɛ nɔ ga nu ga mawui ziɣi ma. Nui é ga Dusi nu ga wuu zu vele ta ná ki‐gaa‐ziɛi manui na daa‐maa‐lɛi lɛ wuloa nu ƃusea ya, kɛ̀ Gala ka a wulo zéea.

Currently Selected:

LOOMƐITIƐ 2: DN1971

Highlight

Copy