TE ƔƐƐ VAITIƐ 27

Pɔɔ ɣa liizu Loomɛ

1Tei te deʋeni ga gé zei yuwu ɣa gé li Etali yui zu, te Pɔɔ leveni é vɛɛ pilisinei zɔi taniga va sɔdasi wũ‐gila wũ‐tuo nui nii wɔ daa ɣɛ ga Juulia é sɔdasi ƃulugi nii zu daa ga Ɔgɔsitɛ̃. 2Tei sa gé lɛɛni Adelametiã ŋee gwalai nii zu é ɣɛni vaazu liizu kẽe pile‐suvɛtiɛ yuwu wukũigi va Eezia ʋaa va, gé ɣɛni sa yuwu ɣa gíɛ li. Nui é wuloni Tɛsɛlonaika, Masadoonia ʋaa va daa ga Aluisitakɔ pɛi ɣɛ gé va. 3Na wulu ʋoloi gé vileni Saidɔ̃ lai zu. Juulia Pɔɔ ɣaazu‐maa‐wõi ɣaani é ƃe ba é li ná siɛ‐puluitiɛ wɔ vɛ ga te baa ʋaa ɣɛ. 4Tei sa gé zeini yuwu ɣa, gé liini vɛ vele fãgai zu lɛ ŋɛni ƃaani la Saipɔlɔ ʋaa va, ƃɔvɛlaale fãgai ɣɛni zeizu gé zu. 5Tei gé ziɛi nii leveni é Seliisia ƃɔga Pãfelia te ɣeeɣi daavɛ, gé vaani Maila lai zu Lesia ʋaa va. 6Ná ɣa sɔdasi wũ‐gila wũ‐tuo nui wɛlɛni na Alezãduiya ŋee gwala ta va yíɛ li Etali é gé vili su. 7Gé liini ga kɔwɔ‐maa‐nɛkɛ pele folo lii ka na yee wu. Gé ziitini Senaidɔ lai ɣeeɣi daavɛ faa ƃaanaga maazu. Na ɣa ɣɛɛ na tei tɔwɔ fãgai lɛ ʋaani bu gé ya gɔ́ li ga luo lete, gé liini ga vɛ vele fãgai zu lɛ ŋɛni ƃaani la Kiliti yui ʋaa va Samoone lai ɣeeɣi daavɛ. 8Faa ƃaanaga maazu gé ɣɛni Kiliti yuwu wukũigi va gíɛ li. Gé ziiti ŋada ta ná laa ga Fɛɛheevɛ̃ vɛ Lasia lai ɣɛni ná woba.

9Tei tɔwɔ folo lamaa ŋala‐ŋalagɛi sa ɣɛ gíɛ, ziɛ‐ɣa ziɛi ɣɛni sa ga faa ƃoei é zɛlɛni gé wũ maazu, ƃɔvɛlaale zi‐dɔɔ ziɛgi leveni sa. Na ma Pɔɔ te lɛnɛni 10yíɛ ɣɛ tea, “Kèeani, gè wɛlɛɛ na va ga ziɛ‐ɣa ziɛi nii ɣa ɣɛ ga daa‐nɔwɔ‐wo siɛ é ŋala de ma ga kpakpaa. Ɛ́ lɛ nɔ ɣɛɛ ga sɔɔlai ƃɔga kẽe gwalai, kɛ̀ de yɛʋui ƃalaa pɛ.” 11Kɛ̀ sɔdasi wũ‐gila wũ‐tuo nui wui toni kẽe‐siɛ veaitiɛ maazu nui ƃɔga kẽe keea nui te woo ma é leve nii va Pɔɔ boni. 12Tei tɔwɔ kẽe pile‐suvɛ lɛ ŋɛni vani ga kẽegi yɛ na fãga ƃakpa vaa ziɛgi zu, nui bɔɔlɔ zu te tɛnɛ boni ga te zei yuwu ɣa te ziɣi na, ta ɣi‐gaa‐ziɛi ga ɣee ta ta zoo te ziili Fiinɛsi te kɔɔlɛ‐vaa ziɛgi ƃea na. Fiinɛsi lai ɣa ga kẽe pile‐suvɛ gaa wotegɛi yuwu ma ga nu yee za‐su vele ƃɔga nu wɔwɔ yee‐su vele folo wulo‐zu vele ʋaa va.

Yuwu‐ɣa ʋãga ƃakpai vaa ʋai

13Tei fãgai ziɣini ga nu wɔwɔ yee‐su vele foloi ʋaa va yíɛ va nɛlɛ‐pɛpɛ tiɛ ɣi gaa ziɛ ga nii te ɣɛni pulu é zolowoga su, te kẽegi wu ziɣini te li Kiliti wukũigi va kakei wobavɛ. 14Kɛ̀ su lɛ woozani fãga ƃakpai nii daa ga Yulakuilo é ziɣini kakei ɣaa vele é va. 15Tei é ziitini kẽegi ma, gɛ́ lɛ ƃega zoo gɔ́ siɛ vele ɣa fãgai vɛ. Gé laa wuloni su é li ga gíɛ. 16Tei sa fãgai leveni ga gíɛ vɛ vele fãgai zu lɛ ƃaani na ziɛ li koloi nii maʋaa va ta tili ga Kɔɔda, gé kavele ɣaa ziɛni faa ƃaanaga maazu ga gé kẽegi mavɛnɛ kelegi ɣili kpãa. 17Tei sa te kẽe koloi lɛɛni su, te kẽe gwalai zaama ɣilini. Na ɣa ɣɛɛ na tei tɔwɔ te ɣɛni luozu kẽegi‐ziɣe ʋai va kakei na va é ɣɛni yuwu wu daa ga Siyete, fãga‐zo seɣei kẽegi ʋaa va te maa yiini. Vele ɣa na fãgai liini la ga gíɛ. 18Tei tɔwɔ fãga ƃakpai gé lubu‐lubuni ga ŋapi na wulu ʋoloi, te vɛɛni ga sɔɔlai wuloa kẽegi zu tiɛ pili ziɛi wu. 19Foloi sava kelei te kẽegi mayeke kɛɛ zɔɔlaa ta wuloni ga ƃɔɔ yee te pili ziɛi wu. 20Tei foloi lɛ wuloni ɔ́ nɔ ɣɛ ga sɔmɔ dekaitiɛ folo lamaa yee wu, na ɣa ɣɛɛ na fãga walai é ɣɛni vaazu maʋai lɛ ŋɛni ga soloya gé ʋaa ma, gé yee wuloni ki‐gaa‐ziɛi nii ɣaazɔ zu é ɣɛni gíɛ ga gá valo gaa‐ƃela‐suvɛ sa.

21Tei tɔwɔ su woozani daa‐mii fai lɛ ŋɛni tiɛ, Pɔɔ vaani te zaama é ɣɛ tea, “Nà numaa, maa nɛi ɣɛ wo wui to gòo ma. Maa lɛ ŋɛni nɛɛni a dɔ wulo Kiliti va, na ɣa ɣɛɛ na de ƃɔɔ vili daa‐nɔwɔ‐wogi nii zu diɛ vala weliga ma. 22Na ma gà sa wo lɛnɛsu ga wo yii lɔ, ƃɔvɛlaale nu ta nɛpɛ gɛ lɛ vaazu valasu yɛʋu ma de zaama, kɛni kẽe gwalai nɔ ɣa da vala ma. 23Ƃɔvɛlaale za ƃidii ƃɔɔƃɔɔ, Galagi nii pó ge gàazu nii gè felizu, ná keelai loni kòba. 24É ɣɛni mà, ‘Pɔɔ, mɛ lɛ luo. Kɛni yà lo Siiza laa wu. Wɛlɛ. Yà ɣa Gala ge ʋaa bu ga niitiɛ ɣaazɔ wa tiɛni wo ziɛi ɣa wo liizu te yɛʋui ɣa yɛ te ya è zaƃu ma.’ 25Na ma, nà numaa, a yii lɔ, ƃɔvɛlaale zèe laavɛ Gala ma ga towaa ɣɛ ƃɔɔ nɔ è ɣɛ velei bogɛi la mà. 26Kɛ̀ kɛni dɛ de ziɣe kake va ziɛ li ta zu.”

27Tei sa folo puugɔ kai naa kelei maƃidii vɛɛni, fãgai yiɛ sa Eeduiya yiɛi leve ga gíɛ kpidi zaama laa yɔɔzu, kẽe‐siɛ veaitiɛ te zuuvini ga gá maa ƃuozu kake ta va. 28Na ma te ziɛi ƃo‐ma zɛligoi wɔ̃ɔni te wɛlɛ na va ga é ɣɛni ga nu yee zakpa‐zu zee felegɔ. Tei te liini ga ta wolo, te ziɛi ƃo‐ma wɔ̃ɔni wɔnɔ te wɛlɛ na va ga é ɣɛni ga nu yee zakpa‐zu puugɔ kai loolu. 29Tei tɔwɔ te ɣɛni luozu ga gé mɛ lɛ va ziɣezu kwɔti va, te kẽegi‐lo kolu naagɔi wuloni kẽegi ƃogi ma te zii te pile ziɛi wu, tiɛ gela‐boga maa‐wõi‐wõi kulo. 30Tei tɔwɔ kẽe‐siɛ veaitiɛ te ɣɛni pele ɣaa ziɛzu ga te vela te wulo kẽegi zu, na ɣa ɣɛɛ na tiɛ kẽe koloi yii te sei ziɛi ɣa tiɛ ƃɔɔ wulo ga ta vaazu kẽegi‐lo koluitiɛ vilisu kẽegi wũ tuovɛ, 31Pɔɔ boni sɔdasi wũ‐gila wũ‐tuo nui ma ta sɔdasiitiɛ é ɣɛ tea, “Kɛni numai niitiɛ te yɛ kẽe gwalai zu, na laale wɛ lɛ wuloa su.” 32Sɔdasiitiɛ te galui leve sa kẽe koloi va é yii ga ziɛi.

33Tei sa gela ɣɛni vaazu bosu, Pɔɔ te ɣaazɔ yii lɔɔni ga te laa mi yíɛ ɣɛ tea, “Za ɣa ga foloi puugɔ kai naa kelei ga wo ɣiliai nɔ ɣɛɛ va zii‐zɛlɛ su, pului wiɛ, ŋɛni‐mii ʋaa lɛ ba. 34Na ma gà wo lɛnɛsu ga wo daa‐mii ŋɛni ta mi. Pagɛ wo yɛʋui ʋaa ma, tei tɔwɔ wũ deɣai ta ƃalaa lɛ vaazu ŋala‐ŋalasu wo ta nɛpɛ wũmɔ.” 35Tei é nii woni, é kpoolo‐ʋɔɔ ziɣini. Na ɣa ɣɛɛ na tei sa é mama feeni Gala bɛ nu pɛ gaazu ma, é su ɣale‐ɣaleni é vɛɛ ga mia. 36Te pɛ te yii lɔɔni sa te daa‐mii ŋɛni ta mi ta ƃɔɔ. 37Gé ɣaazɔ gé wuai kii ma gé ɣɛni ga nu wũ felegɔ zee lɔfela kai lɔzita kẽegi zu. 38Tei te laa miini te vile, te mɔlɔi wuloni kẽegi zu te pili ziɛi wu, kɛɛ ʋaa ma te kɛ peea.

Kẽegi‐wuu ʋai

39Tei gela boni, tɛ lɛ zui wɛ̃ɛni. Kɛ̀ te wɛlɛni ŋada ta va ziɛi vai na kakei zu suu, yãaze ge kukũi ba, vɛ te deʋeni ga ani ɔ́ zolowo na te va na ga kẽegi kakei ɣa. 40Na ma te kẽegi‐lo koluitiɛ wuloni ba te te yɛ ziɛi wu. Te ɣɛni nɔ na ɣɛɛzu tiɛ wɔnɔ galui ʋũi kẽegi‐ziɛ ƃaa‐lowagitiɛ va. Tei sa te fãga‐zo seɣei lɛɛni gee zu, fãgai zeini su é li ga gíɛ yãazegi maa vele. 41Kɛ̀ tei sa kẽegi zeini kpasaɣagi ma, é ɣatani zuu ma. Mawũgi ɣatani ɛ́ lɛ ƃega lubu. Na ɣa ɣɛɛ na maƃokpoi wolo‐wologɛi ɣɛ ziɛi nii vɛ é ɣɛ fala‐falasu. 42Sɔdasiitiɛ ta leʋei ɣɛni ga te pilisineitiɛ vaa, kɛɛ ʋaa ma te mɛ lɛ va lasesu tɔ vela. 43Kɛ̀ tei tɔwɔ sɔdasi wũ‐gila wũ‐tuo nui ɣɛni wõi ɣɛɛzu Pɔɔ yɛʋui yɛ zéea, ɛ́ lɛ ƃeni te va tɔ ziɛ ga ta leʋei. É niitiɛ leʋeni tɔ zoo te lase ga te wulo kẽegi zu te vili ziɛi wu ga maa wũ pa te li kakei ma. 44Na ɣa ɣɛɛ na mataitiɛ te yɛ gulu zɛvɛitiɛ ma ɔɔ kẽegi mawulu ƃulu‐kpulugitiɛ. Vele ɣa na te ɣaazɔ te wuloni la su te lɛ kake ɣa.

Currently Selected:

TE ƔƐƐ VAITIƐ 27: DN1971

Highlight

Copy