TE ƔƐƐ VAITIƐ 26

Pɔɔ ɣa woo zu wulozu Agilipa laa wu

1Agilipa ɣɛni Pɔɔ ma, “É ziitia yìɛ ga è ƃɔɛ ƃɔɔ ʋaa ma.” Pɔɔ yee zu zakpa sa é woo‐zu‐wuloa lɔɔ zei yíɛ ɣɛ tea,

2“Gà ƃɔɔ ɣaazu ga nui Gala ge bɛ́ tei gè vaazu woo zu wulozu za è ɣaazu, yài è ga masagi Agilipa, é vile nii ɣaazɔ va Dusiitiɛ te boga ga dàa. 3Ƃɔvɛlaale yà ƃɔɔƃɔɔ è Dusiitiɛ ɣɛɛ ʋai wɛ̃ni ta niitiɛ te zakpegɛi maazu. Na ma è veevɛ, wui to gòi ma ga zii lɔɔ.

4“Velei gè yɛga luozu la kpɔ̀ɔ yuu veaitiɛ zaama Yɛlusulɛɛ é ziɣi ƃɔɔ nà yãgbalai maziɛ su ma, Dusiitiɛ ƃɔgɔpɛ te kwɛ̃ni. 5Kwɛ̃ɛda zu woozagɛ te vɛ, ani te wõini te mazeele woo ʋe, ga gè luoni ga Favilesi nu luo vele, Favilesii niitiɛ te ga gá Ɣala zeke‐kɛɛ vele ƃɔɔƃɔɔgi zu nu ƃulugi. 6Gà sa loni vɛ faa‐wo ŋete ɣa kì kɛɛ ʋai ma ki‐togi va Gala ge boni ga gé ɣeeani 7ki‐togi nii gé mazii zei‐zu puugɔ kai felegɔitiɛ ta na Gala felizu ga kpaanaga kpidi vɛɛ folo va te ɣigi ba ga é leve ma te ya. Masagi, nii maɣi‐gaa‐ziɛi ɣa kɛ̀ɛ‐zɔ ge la Dusiitiɛ wuu zu. 8Aƃɛi yá kɛ wo ta nɛpɛ ge ɣi gaa ziɛ ga ɛ́ lɛ ga solowo faa ga Gala ge saa vea wu ziɣi saa ya?

9“Nà kagi fai ɣɛ bu ga maa nɛɛvɛ gè faa lamaa ɣɛ ga ŋapi‐wɔɔ kɛɛ ʋaa ma Nazɔi Yiizɛ na daa‐zeigi mɛ lɛ ziɛ. 10Gè kɛɛni ŋɛ na Yɛlusulɛɛ. Gɛ̀ lɛ nɔ Gala na dɔ numaitiɛ lamaa vilini kpidi vɛlɛ wu ga gaa‐ƃai nii ɔ́ wulo laa‐ʋaale gwalaitiɛ ya, kɛ̀ tɔ ɣɛ na te vaazu, niitiɛ tɔ ɣɛ te vaazu gɔ̀ lo te wulu. 11Gɔ̀ tɔ kpɛ tiɛ siɛ tamaa zu Gala‐feli wɔtai ɣaazɔ wu gìɛ ɣaa ƃaa ga gè kɛ te Ziizɛ laa ŋala‐ŋala. Goei‐leve maazu é leve kɛɛzu va te ya, gɔ̀ te ƃɔɔla ƃalaa zuu ƃalaagitiɛ te malaitiɛ zu.

Pɔɔ ɣa luo vele maa‐ʋeli pele zu wulozu

12“Nii mavele ma gè ɣɛni liizu Dimasikɔ ga laa‐ʋaale gwalaitiɛ ta ɣaa‐ƃai ta nii te deʋeni te da zèea ga gè kɛ. 13Tei foloi gaa lɔni, masagi, gè wɛlɛni ŋada wodoai va pelei ma é wuloni gee wɔlɔgi zu, maʋoloi levegɛi foloi va yíɛ ʋolo màa wodoai bɛ́ é vɛɛ niitiɛ va gá tiɛni gé ɣɛni liizu. 14Tei sa gé pɛ gé looni zui ma, gè woi mɛnini Hiiƃulu woi zu yíɛ ɣɛ mà, ‘Sɔɔ, Sɔɔ, zɛƃɛi é kɛɛ è kpɔ̀ɔlasu? Yà gulu ɣaa‐wulo‐wulo tuƃo na gáavɛ ga wɔwɔ, towaa ŋada zei yìɛ.’ 15Gè ɣɛ tea, ‘Ƃɛ ɣa ga yìɛ, màliɣii?’ De maliɣii ɣɛ mà, ‘Nài è kpɔ̀ɔlasu, nà ɣa gè ga Ziizɛ. 16Wu ziɣi è lo wɔwɔi ɣa. Ƃɔvɛlaale nii mazaƃu ɣa gè wuloa ma è ɣaazu ga gè yee ƃado yìɛ è tii ɣɛ bɛ̀, è fai niitiɛ mazeele woo ʋe è pɛtɛga ta kuloi nii gè vaazu bosu è ɣaazu. 17Gà è wulo faa zu yà numaitiɛ ya ta zii ƃalaagi niitiɛ gà è leve te wɔ 18ga è te ɣaazu lao, kɛɛ ʋaa ma te wulu ɣaa ʋe kpidii va te va ŋada wodoai zu, te wulu ɣaa ʋe wɔnɔ Seeta na gaa‐ƃai va te va Gala pɔ, kɛɛ ʋaa ma te su‐ʋaa‐yɛgi maa zɔlɔ wo faa yowũ ʋaa ma. Na ɣa ɣɛɛ na te ɣɛ niitiɛ zaama te wuloai su ga tee zee‐la‐mai zaala zu é te ya é vile bà.’

Pɔɔ na seele woi Dusiitiɛ ɣaazu ta zii ƃalaagitiɛ

19“Na ma, masagi Agilipa, gɛ̀ lɛ goo‐mɛni tala wuloni Gala ta ʋai nii zu ná wuuni gàazu. 20Kɛ̀ mamaa wũgi pa gè boni niitiɛ ma te Dimasikɔ, na wulu gè bo Yɛlusulɛɛ, gè bo kɔnɔ Yudiiya yui wɔlɔ‐kɔlɔ ma ɣaali, gè bo ƃalaa pɛ zii ƃalaagitiɛ ma. Gè boni te ma ga te wulu ɣaa ʋe ta ʋaa yowũitiɛ va te va Gala pɔ, na ɣa ɣɛɛ na te tuoi nii wo yá te wulo bu ga te wulu ɣaa ʋega ta ʋaa yowũi va. 21Nii mazaƃui ɣa Dusiitiɛ te sòga ma Gala‐feli wɔta walai wu tiɛ ɣaa ƃaa ga te pàa. 22É yɛga su é ziiti za ʋoloi ma, kɛ̀ɛvɛ kpɔ‐ba maa zɔlɔ wosu Gala zeea. Na ma gà loni vɛ gìɛ seele woo ʋe nu vɛlɛ‐vɛlɛ kpɔga maƃaaza te ɣaazu. Gɛ̀ lɛ faa ta ƃɔnɔ bosu é wulo nii wulu Gala daa woo‐wo beaitiɛ ƃɔga Moozeni te boni ga tɔ vaazu ɣɛɛzu. 23Na ɣa ga kɛni Kolai ɣa laa‐nɔwɔ wo. Na ɣa ɣɛɛ na tei tɔwɔ é ga nu maa wũ ga é wu ziɣi saa ya, towaa yá ŋada wodoai maʋaa wo gá numaitiɛ ma é vɛɛ zii ƃalaagitiɛ va.”

Pɔɔ ɣa Agilipa lɛnɛsu ga é Ziizɛ ʋaa ziɣi ga gaama

24Tei é ɣɛni woo zu wulozu ŋɛ ni, Fɛsɛtɔ boni ga woo wala é ɣɛ tea, “Pɔɔ, è ɣigi lɛ è woba. Yà wɔlɔ‐ƃakpa‐wɛ̃ɛgai ɣa é è ɣigi ziɣizu è woba.” 25Kɛ̀ Pɔɔ ɣɛni tea, “Nu walai Fɛsɛtɔ, kìgi lɛ ziɣini kòba. Kɛ̀ gà gaama wosu ga ɣi‐daa‐wodo vele. 26Masagi Agilipa faa wɛ̃ni é vile fai niitiɛ va. Towaa gè laa wu ziɣizu te ma gìɛ bo ma. Dàavɛ la ga fai nii ta nɛpɛ gɛ lɛ leveni ba, ƃɔvɛlaale ɛ́ lɛ ɣɛɛni soku su. 27?Masagi Agilipa, Gala daa woo‐wo beaitiɛ ta wɔlɔi zu woi ziɣivɛ yìɛ ga gaama? Gè kwɛ̃ni siɣivɛ yìɛ ga gaama.” 28Agilipa ɣɛ Pɔɔ ma, “Yà dɔ wuu zu yà kɛ gè ɣɛ ga Kolai maa nu ga maa ʋilea!” 29Pɔɔ ɣɛ tea, “Su ƃuoni‐oo ƃaa su woozani‐oo, gà Gala felizu ga é mɛ lɛ nɔ ɣɛ ga yìa, kɛ̀ taitiɛ ɣaazɔ ta gòo mɛni za ʋoloi te ɣɛ ga kàvelei ƃalaa pɛ, é mɛ lɛ ɣɛ ga yɔ̃wɔi niitiɛ te bà.”

30Masagi wu ziɣini sa ta gɔmɛti nu walai é vɛɛ Bɔniisi va ta niitiɛ ɣaazɔ te ɣɛni zeini ta tiɛni. 31Tei te ziɣini na, te ɣɛni ɣiini ma, “Zunui nii lɛ faa ta nɛpɛ kɛɛzu ɔ́ kulo‐ɣɛɛ wo ga é za su ɔɔ é ɣɛ su kpidi vɛlɛ wu.” 32Agilipa ɣɛni Fɛsɛtɔ ma, “Zunui nii ɔ́ zoo é ɣɛ ƃɔɔ yee ma è ɣɛ lɛ boni ga Siiza ɣa yá ná faa‐wogi wo.”

Currently Selected:

TE ƔƐƐ VAITIƐ 26: DN1971

Highlight

Copy