TE ƔƐƐ VAITIƐ 28

Pɔɔ ɣa Malata yiɛ ligi zu

1Tei sa gé wuloni su, gé kwɛ̃ɛni ga zui nii ɣɛni ga ziɛ li su ta na lili ga Malata. 2Ná veaitiɛ te faa vagɔ ɣɛɛni ga gíɛ nii kɛɛla lɛ nɛɛni. Te yee zeini gé ɣaazɔ wu te ŋabu loo, ƃɔvɛlaale tine vɛɛni sa ga pua kɔɔlɛi yìɛ va. 3Pɔɔ é gulu ƃulu‐kpulu gaa lɛɛni ba é pu ŋabui ɣa. Ŋabu wuigi zaƃu ma kaali wuloni su é laa ƃako zee va. 4Tei ná veaitiɛ te wɛlɛni ŋɛnii nii va zɛlɛni zee va, te ɣɛni ɣiini ma, “Sakpe gɛ lɛ ba. Zunui nii ɣa ga nu‐vaa nu. Velei ƃalaa ɛ́ lɛ yɛni la yuwu wu, gaama velei zu ɛ́ lɛ zolowoni ga é yɛ ŋetea.” 5Na ƃalaa ɣɛɛvɛ é yee ƃɛkpɛnɛni ŋɛnii nii wulo zee va é loo ŋabui ɣa. Faa ta nɛpɛ gɛ lɛ ɣɛɛni ga Pɔɔ. 6Te ná maa kpowũni te ɣi ge ba ga tɔ vaazu ʋesu ɔɔ tɔ vaazu loozu ga maa ʋilea sái. Kɛ̀ tei te ná maa kpowũni ga su woozaa tɛ lɛ faa yowũ ta nɛpɛ pɛtɛni ɔ́ ɣɛɛ la, te ɣigi maa ʋelini te bo ga Pɔɔ ɣɛni ga galagi ta.

7Minɛ ligi zu zuu ɣɛni na ga ziɛ‐ligi‐zu nu walai wo daa ɣɛ ga Pɔƃiliyiɛ. É yee zeini gé wu é gé ʋaa ɣɛ ga gaazu‐wodo vele folo saagɔ yee wu. 8Tɔwɔ Pɔƃiliyiɛ keea ɣɛni laani ga dɔtɔ‐zu ƃadi ta kuu‐zu woi. Pɔɔ li sa é laali ma. Tei é Gala felini, é yee vɛɛni ma é balo. 9Tei nii ɣɛɛni nu ƃusei mataitiɛ te ɣɛni ziɛ ligi zu niitiɛ seeƃɛ ɣɛni te va, te vaani ƃalaa pɛ, tɔwɔ te valo. 10Te faa‐nɛɛ lamaa ɣɛɛni gé vɛ. Tei siɛgi ziitini ga gé zei ziɛi ɣa gé li, nii nɛpɛ maƃala ɣɛ gé ma te puuni kẽegi zu.

Pɔɔ ɣa ziitizu Loomɛ

11Tei sa ɣalo saagɔ leveni, gé liini kẽe ta zu nii é yɛni tigi zu é yɛsu kɔɔlɛ‐vaa ziɛgi leve, é ga Alezãduiya ŋee ná daa‐zeigi ga yoo zinaa. 12Tei gé ziilini Sela‐kuu lai zu, gé kɛɛni na ga folo saagɔ. 13Gé wuloni minɛ gé ƃiinɛ gé ziili Luigiã lai zu. Tei sa folo gila ge wuloni su, fãgai wũ kuloni kpɛsɛ ga nu wɔwɔ yee‐su vele foloi ʋaa va. Na wulu ʋoloi gé vaani Putioli lai zu. 14Ná ɣa gé wɛlɛni na Kolai maa vea va. Te gé lili ga gá tiɛni gé folo lɔfela ɣɛ na. Gé Loomɛ vele wulo sa. 15Gé vaitiɛ te ɣɛni Loomɛ tei te gé maa woo mɛnini, te vaani ƃɔɔ é yɛsu te ziiti ŋada ta ta ná lili ga Apii‐fɔ̃lɔ, taniga te ziiti vɛ ta ná lili ga Tilii‐tɛɛvɔ̃ ga te gé luola wũi. Tei Pɔɔ wɛlɛni te va, é Gala mamani zii lɔ sa.

16Tei gé lɛɛni Loomɛ, te ʋaani bu ga Pɔɔ yɛ ƃɔɔ ŋada laa sɔdasi na ya gaazu ɣɛni ba.

Pɔɔ ɣa Gala goo wosu Loomɛ

17Tei folo saagɔ leveni, Dusi lo‐tuoitiɛ te ɣɛni na Pɔɔ te lilini ŋada ɣila. Tei te ɣaa lɛɛni ba, é ɣɛni te ma, “Nà numaa, velei ƃalaa gɛ̀ dɛ faa yowũ ɣɛɛni la ga da numaitiɛ ɔ́ nɔ ɣɛ ga gè de ɣeeani te ɣɛɛ ʋai ta ŋala‐ŋala, te kùloni Yɛlusulɛɛ ga pilisine te zèe la Loomɛitiɛ ya. 18Tei te gàa‐zaɣa kɛɛni sɛ‐sɛ, te ɣɛni wõizu te ƃe bà, ƃɔvɛlaale zaƃu ta nɛpɛ gɛ lɛ ŋɛni ba ga te tɔ kpɛ mà ga saa. 19Kɛ̀ tei Dusiitiɛ tɛ lɛ yee zeini bu, kɛni nɔ gɔ̀ nà faa‐wogi ʋe Siiza ya, velei ƃalaa nà numaitiɛ ɣɛɛ‐zɔ gɛ lɛ la kùu zu. 20Na ma nii mazaƃui ɣa gè boni la ga gè wõini gè wo vɛtɛ gè ƃɔɛ wo wɔ, tei tɔwɔ Yezɔi ɣi‐togi mazaƃu ɣa gìliai la ga yɔ̃wɔi nii.” 21Te ɣɛ ma, “Tɛ dɛ kɔlɔ wonɛni ga è laa ɔ́ wulo Yudiiya ɔ́ ziiti gíɛ. Na ɣa ɣɛɛ na da numaitiɛ te vaazu vɛ ta lɛ dɛ è ɣɛɛ‐zɔ daani gé vɛ ɔ́ nɔ ɣɛ ga te zɛpɛ yowũ wu é vile yìɛ. 22Kɛ̀ gé wõini nii é è la é vile ba gé mɛni. Nu ƃulugi nii ná dɛi é Kolai ma, gé kwɛ̃ni ga ta faa yowũ wosu yíɛ vile ba ŋadɛi ɣaazɔ.”

23Tei te kuu loni ma, te ƃɔni su ga tamaa te va pɔ́ vɛ daa‐zu vɛi ɣɛ na. É fai zu wuloni te ma é ziɣi subu ma é loo kpɔkɔ ma, yíɛ Gala na masadai mazeele woo ʋe yíɛ pele ɣaa ziɛ ga te la ga goi é vile Ziizɛ va nii kuloai ɣɛ Mooze na tɔgi zu ta Gala daa woo‐wo beaitiɛ ta wɔlɔi. 24Te taniga te laani la goi zaala zu é boni, zɔitiɛ wɔ tɛ lɛ siɣini ga gaama. 25Te woo lɛ ŋɛni laazu ma ta leelia te ziɣi na. Kɛ̀ Pɔɔ woo ŋɛɛ gila boni tɔ vɛɛ ziɣizu na é ɣɛ tea, “Gala baa ŋinɛgi woi ɣɛni ga gaama fai nii zu é puuni Gala daa woo‐wo nui Aizeea la ga é bo wo ɣeeani ma ga Gala ka ɣɛɛzu tea,

26‘Li numai niitiɛ wɔ vɛ è ɣɛ tea,

wa faa mɛni wo mɛni,

kɛ̀ wɛ lɛ wɔlɔ‐wɔlɔ gaa ɣaa.

Wa wɛlɛ wo wɛlɛ,

kɛ̀ wɛ lɛ wɔlɔ‐wɔlɔ ŋada maa ƃɛɛ.

27Ƃɔvɛlaale numai niitiɛ ta ʋaa ɣaa ɣaazu ƃaavɛ.

Te wui litigɛ, te ɣaazu laa wulugɛi.

Ɔ́ ƃe na ɣɛɛzu ga nà te ɣaazu ɔ́ ŋada maa ƃɛ,

te wui yìɛ faa mɛni.

Te ɣigi ɔ́ faa ɣaa ɣa,

na ɣa ɣɛɛ na tɔ lite wɔnɔ te va pɔ̀ vɛ gè te valo.’

28Ƃe ba mu nii ɣɛ ga wo wɛ̃ɛ faa ga Gala na balolai nii levegɛ sa zii ƃalaagitiɛ wɔ. Ta wui to.” [ 29Tei é woi niitiɛ woni, Dusiitiɛ te ziɣini ná tiɛ laaza ga tamaa ta letele.]

30É kɛɛni zeini na ga kwena felegɔ daa ʋegɛi yíɛ ƃɔɔ vaa ʋaa ɣɛ. Na ɣa ɣɛɛ na yíɛ yee zei nui ɣaazɔ wu ɔ́ va pɔ́ 31yíɛ Gala goi wo é vile Gala na masadai va yíɛ wɔnɔ kala‐bo bo é vile de maliɣii Ziizɛ Kolai va ƃɔɔ kɛnɛ ma. Nu ta nɛpɛ gɛ lɛ ŋɛni yee ƃesasu tuo.

Currently Selected:

TE ƔƐƐ VAITIƐ 28: DN1971

Highlight

Copy