1 TEMETE 6

1Taitiɛ ɣaazɔ duo ɣalu te wɔ ba, maa nɛɛvɛ te ta nu kɛɛ veaitiɛ ziɣi ga numaitiɛ kuloai bu te vɛ ga ƃaa zii ɣaazɔ la te ma, kɛɛ ʋaa ma Gala tɔwɔi ƃɔga kala‐bogi te mɛ lɛ wu. 2Niitiɛ ta nu kɛɛ veaitiɛ Kolai ʋaa ziɣiai te vɛ ga gaama, maa lɛ nɛɛni tɔ masa natiɛ ɣɛɛ ʋai ma ga te vaani tɔ ɣɛ ga wũfe‐ma lala vea. Kɛ̀ to mu maa nɛɛvɛ te tii vagɔ mazii ɣaazɔ ɣɛ, toku ge zei ga taitiɛ te wulozu ta lii zu nu ma ta ga numaitiɛ Kolai ʋaa ziɣiai te vɛ ga gaama te ga te wõila vea.

Gala tuoi zu yii‐lai

Te ɣala bo è te lɛnɛ ga te wutii niitiɛ ɣaazɔ ɣɛ. 3Nu ta nɛpɛ ka kala‐bo bo na ɛ́ lɛ vɛɛni nii va, manui lɛ yee zeini de maliɣii Ziizɛ Kolai laa woitiɛ wu te maʋaa ɣaa wuai tɔwɔ te ga kala‐bogi nii solowogɛi Gala tuoi ma. 4Manui ɣa ɣɛ ƃɔɔ ƃokolosu ga kpɔɔ ʋaa wɔɔlɔ gaazu. Ɛ́ lɛ ɣɛɛ ga faa ta nɛpɛ kwɛ̃ɛga. Ki‐gaa‐ziɛi yá ɣɛ manui ma máʋaa ɣa wɔvɛ yíɛ nii maa‐wõi‐wõi kulo sakpe ka loo maazu ta daa‐za é vile wooniga ʋaa va. Nii ɣavele ʋaitiɛ wɔ ka ta va ga kuu‐zu‐yowũ‐ma, gaa‐wɛɛ ʋaa, daa‐ŋala‐ŋala kpɔɛ, nu‐vɛnɛ zuuvi maʋaa, 5doba‐zii‐ɣaa‐wãla‐woga numai niitiɛ vɛ te yii ɣa ŋala‐ŋala te wuu zu te valagɛi gaamai ma ta ɣi‐gaa‐ziɛi ga Gala tuoi ɣa pele wulo ga nu ga é ŋɛni zɔlɔ wo. 6Kulo‐nu‐ma ʋaa wala wɔɔlɔvɛ Gala tuoi zu, zii‐laa su. 7Ƃɔvɛlaale a dɛ lɛ vaani ga ŋɛni ta nɛpɛ zui zu. Dɛ lɛ wɔnɔ wuloa ga ŋɛni ta nɛpɛ zui va. 8Ani daa‐mii ŋɛni ɣa ɣɛ na de ya ta seɣe natiɛ ta de yii la. 9Kɛ̀ taitiɛ kpɛtɛ ʋaa mayii te wuu zu, tɛ‐ga ɣa wo ga tiɛ te wɔ ga sɛlɛ. Ŋɛni lamaa mayii ɣa vili te wuu zu wũ gɛ lɛ ɣɛɛ ba te ga ŋada‐zei‐nu‐va ŋɛnia. Niitiɛ ta numaa ŋala‐ŋala te zu ƃɔnɔ wo. 10Ƃɔvɛlaale naʋolo‐wõi ɣa faa yowũ ɣaazɔ wɔwɔ vilegɛi ba. Ŋɛni‐wõi‐kuloai nii ɣa é ɣɛɛ ga zaƃu nu taniga te ɣaka te ziɣi zee‐la‐mai wulu. Ta ƃɔɔ te kɛ sa zii‐zuuli ƃakpa vili te yii zu.

Nii de lai la maŋapi‐ʋagɔ‐wɔi

11Kɛ̀ yà dɛi, tei è ga Gala nu, ɓe teve nii ɣaazɔ va. Niitiɛ maa vele ɣaa ziɛ. Natiɛ ta ga tele‐bo tuo, Gala tuo, zee‐la‐ma, wõila, nu‐lo fai kpãa é vɛɛ sɛ‐sɛ‐bo tuo‐woga va. 12Kolai maʋai nii è siɣia ga gaama, ŋapi wɔ ga è maluo wo ga pagɔ. Zɛʋui nii kwɛ̃ɛ gɛ lɛ ba, siɣi ga wó. Nii ɣa è liligɛi ma. Yà wɔ è laa wu ziɣini Kolai maʋai ma è bo nu lamaa ɣaazu te ɣɛ ga mazeelea. 13,14Gà bosu yìɛ ga è ziɛ ga tɔgi è mɛ lɛ ŋada ta nɛpɛ zɛ ba, è mɛ lɛ wɔnɔ ƃaa‐wulo‐ma ʋaa ta nɛpɛ kɛ é yɛsu de maliɣii Ziizɛ Kolai wulo nu pɛ gaazu. Gà fai niitiɛ wosu yìɛ Galagi nii ɣaazu é zɛʋu ʋeezu ŋɛni pɛ zeea, gìɛ kɔnɔ bo yìɛ Ziizɛ Kolai ɣaazu. Na ɣa ga Ziizɛ Kolai nii é laa wu ziɣini faa vagɔ ma é bo seele‐woo‐ʋeeai zu Pãtia Paila ɣaazu. 15Ziizɛ vaa ʋai ɣa wulo kɛnɛ ma ga siɛgi solowogɛi maʋaa ma. Nui nii ɣa a kɛ. Na ɣa ga nui tɔ ɣilekpu nɔ é ga ɣalaso, saala wala lai má é ga ɣalasoga ta ɣalaso, taitiɛ te ga numaa te maliɣia é ga natiɛ te maliɣi. 16Tɔ ɣilekpu nɔ ɣa saa ʋaa lɛ wɔlɔ‐wɔlɔ ba. Tɔ ŋada wodoai nii zu nu ƃuse lɛ zooga ɔ́ lɔtɔ na va. Towa nu lɛ dɛ wɔlɔ‐wɔlɔ pɛtɛni, nu wɔ gɛ lɛ wɔnɔ zooga ɔ́ pɛtɛ. Towa ƃaa ɣa la ma, gaa‐ƃai nii maʋaa wɛ̃ɛ gɛ lɛ ba nà ɣɛ zéea. Na nɔ yá ɣɛ.

17A lii na ga ŋeteai nii zu ƃɛtɛ veaitiɛ ta dɛi wɔɔ laa vele, bo te ma ga te mɛ lɛ gaazu‐lɛɛ wulo ɔ́ nɔ ɣɛ ga te ɣi to kpɛtɛ ŋɛnii niitiɛ va nu lɛ laa ga tiɛ. Kɛ̀ te ɣi to Gala ba. Towa é ŋɛnii ɣaazɔ wuloa de vɛ ga su wɔɔlɔ vele ga a de yii‐ma ɣɛ ga tiɛ. 18Bo te ma ga te faa vagɔ ɣɛ te ɣɛ ga kpɛtɛ vea te ɣɛɛ‐zɔ pagɔi zu te ɣɛ ga faa‐nɛɛ‐ɣɛɛ vea te ɣaazu wodoai. 19Na ɣɛɛ vele ma te vɛ ta ɣɛ ŋɛni vagɔ laa‐zu ƃɛtɛzu ƃɔɔ ʋaa ma ga ná yee luo vele, kɛɛ ʋaa ma te zɛʋui nii ziɣi é ga zɛʋu ƃɔɔƃɔɔgi.

20Ee Temete, ƃaa ŋɛnii nii maazu è loga maʋaa ƃawola. Ƃɔɔ ƃe teve Gala tuo‐wo tala ƃɔɛ‐wote‐wote‐boga va ta nu tɔ ƃɔɔ woo‐wulo‐ga ʋai nii te siɣizu ga zɛɛ ʋaa vele ga tɔ ga kele‐ɣele. 21Ƃɔvɛlaale siɣi vele ma nui taniga vɛ é kɛɛ te ʋoola nii va pagɛi te sɔlɔ wo zee‐la‐mai mavele ma.

Gaazu‐maa‐wõi‐ɣaa ƃɔ‐ba ɣa wo ga wiɛ fãa.

Currently Selected:

1 TEMETE 6: DN1971

Highlight

Copy

Compare