1 TEMETE 5

Nu wutii numai zɔitiɛ ʋaa ma

1Mɛ lɛ yii ɣaa wãla zunui nii ya é ga nuwuti. Kɛ̀ zii‐lɔɔ woo wo ma è ɣɛ yà ɣɛ kɛɛzu ga è ɣeea. Yíɛ luo ga zolo‐poitiɛ è ɣɛ yà ɣɛ kɛɛzu ga è leɣeni ta è liɛni. 2Yíɛ luo ga ŋaza nuwutiitiɛ è ɣɛ numaa ta ɣɛ luozu ga te leeni yìɛ luo ga ŋaza lopoitiɛ è ɣɛ yà ɣɛ kɛɛzu ga yà zeelaa yìɛ kɛ maa‐wuo ʋaa ɣaazɔ zu.

3Wũfe po ŋazai niitiɛ ma zini gɛ lɛ te vɛ, na ɣa ga niitiɛ te ga po ŋaza ga ƃɔɔƃɔɔ su. 4Ani po ŋazai dea ta na ɔɔ duu dea ta ɣɛ na na, maa nɛɛvɛ maleaitiɛ ƃɔɔ te ta Ɣala tii maa wũgi ɣɛ ga te ƃɔɔ wɔ pɛlɛ wu veaitiɛ tiɛ te ɣaa veaitiɛ mɔɔlɛ‐zuvɛ ta wulo su te vɛ. Ƃɔvɛlaale nà zolowogɛ Gala gaazu. 5Po ŋaza ƃɔɔƃɔɔgi, tɔ ɣilekpu é zeini nɔ lekelẽi, kígi ɣa ɣɛ nɔ Gala ba kátagɛi Gala‐maa‐nɛɛnɛga va ta Gala‐felia kpidi vɛɛ folo va. 6Kɛ̀ po ŋazai zɔi é nɔ ƃɔɔ yii‐ma‐ɣɛɛ ʋaa wulu, zɛʋui ɣɛɛvɛ ƃalaa zéea, saavɛ sa. 7Te ɣala bo fai nii zu, kɛɛ ʋaa ma te mɛ lɛ ɣɛ ga numaitiɛ te ɣɛɛ‐zɔ yowũ ɣa ɣɛ te va. 8Nui nɛpɛ ɛ́ lɛ ɣɛ kɛɛni ɔ́ kaa yɔ̃wɔitiɛ vaa ʋaa ɣɛ, pɔ́ pɛlɛ wu veaitiɛ ta dɔ vele ƃɔɔƃɔɔ ma, manui ɣɛlɛ ɣa na é bosu zee‐la‐mai va. Na wɔ ka ɣɛɛ na ná ŋeteai ɣa yowũ é leve ƃalaa niitiɛ va tɛ lɛ Kolai ʋaa ziɣini ga gaama. 9Nui nɛpɛ kaa wenagi loai kwena zee lɔzita wu ta nii é zini kuloa ná leve gila ba, maa lɛ nɛɛni nà mazii laa ɔ́ ziɣi ga nui é ga po ŋaza. 10Na ɣa ɣɛɛ na kɛni manui ɣɛ ga ŋaza nui nii kɔ̃ɔ‐kɔ̃ɔgɛi kɛ́ɛ ʋaa vagɔitiɛ ʋaa ma. Na ɣa ga ani é lopaa wuloa su é ga nu ƃɔɔ nu, é ga nui zíi lai ga é ɣɛ ga Gala na dɔ numaitiɛ ta mɔɔlɛ‐wo nu, é ga nui é ƃɔga niitiɛ va te yɛga faa ƃoei zu, na ɣa ɣɛɛ na katagɛi faa vagɔ‐ɣɛɛ va pele mazii ɣaazɔ zu. 11Kɛ̀ mɛ lɛ kɛ ɔ̀ ŋaza lopoa laa ziɣi ga ta ga po ŋaza. Ƃɔvɛlaale siɛgi “gɛ̀‐lɛ‐ƃalani” ɣi‐gaa‐ziɛi ɣa vili da te ɣigi zu tiɛ maluo vele yowũ wulo ga Kolai, zini‐kulo yii ɣa yá vili te wu zu. 12Nà wɔ ka kɛ te loo faa‐yɛ‐ma ʋaa zu, toku ge zei ta woto‐leve maa wũgi va ta siɣi ma. 13Na ɣa wulo na ba ta fii‐ƃɛɛ‐wuloa maa woli tiɛ leve‐teve ta wulo nà vɛlɛ wu te lɔ zɔi wu. Tɛ lɛ nɔ ɣɛɛ ga fii‐ƃɛɛ vea ɔ́ wɛ̃ɛ minɛ, kɛ̀ ta ɣɛ ga daa‐wo‐bo bea te laa lɛ ziɣia te vaa ʋaa zu, fai niitiɛ maa lɛ nɛɛni tɔ bo tiɛ natiɛ wo. 14Na ma ŋaza lopoi niitiɛ te ga po ŋaza, gà wõi ɣɛ ga te zini kulo tiɛ duu ɣa tiɛ ta vɛlɛ wu veaitiɛ maazu ʋaa wo, na ɣa ɣɛɛ na te mɛ lɛ pele ta nɛpɛ kulo ga de wɔɔ yɔ̃wɔi ɔ́ de laa woo zu loo ga yowũa. 15Ƃɔvɛlaale te taniga te ɣakagɛ sa ʋɔlɔ te vile Seeta wulu. 16Ani ŋaza nui nɛpɛgi Ziizɛ ʋai ziɣiai bɛ́ ga gaama káa yɔ̃wɔa ta ɣɛ na na te ga po ŋazaa, pagɛ é ƃɔ te va. Maa lɛ nɛɛni te maʋai ɔ́ ɣɛ ga Gala pɛlɛi wũmɔ ɣasɔ, kɛɛ ʋaa ma pele ɣɛ na ga Gala pɛlɛi ƃɔ niitiɛ va te ga po ŋaza te wũ lɛ nu va ga ƃɔɔƃɔɔ su.

17Gala pɛlɛ lo‐tuoi niitiɛ ta maazu‐ʋaa‐wo bo ga pagɔ, pagɛ è te ziɣi ga numaitiɛ kuloai bu te vɛ ga ƃaa la te ma su ʋaa yìɛ ɣɛ te vɛ, niitiɛ ta ɣɛ mɔɔlɛzu Gala goo‐wogai zu ta kala‐bo‐bogai natiɛ ta dɔ vele ƃɔɔƃɔɔ ma. 18Ƃɔvɛlaale Gala kɔlɔi ɣa bosu yíɛ ɣɛ tea, “Mɛ lɛ nikɛ zine yɛ mɔlɔ ɣaa liɛsu ɔ̀ daa ɣili.” Tɔ wɔnɔ ɣɛɛzu tea, “Tɔ ga tii‐ɣɛɛ nu ná goo gaama ʋaa ga é ʋɔɔnɛi zɔlɔ wo.” 19Ta Gala pɛlɛ wũ‐tuo nu ɣɛɛ‐zɔ daa na yìɛ, mɛ lɛ wɔlɔ‐wɔlɔ laa zei bu kɛni ani seele felegɔ ɔɔ saagɔ ɣa ɣɛ na ba. 20Niitiɛ te ɣatagɛi faa yowũ‐ɣɛɛ va natiɛ ta dɛi, yà yii ɣaa wãla te ya nu pɛ gaazu ma, kɛɛ ʋaa ma nui matai zɔitiɛ te luo. 21Gà nii leʋezu gè da è ya Gala gaazu ta Ziizɛ Kolai é vɛɛ Gala ta ɣeelai niitiɛ va Gala zee ƃakogɛi te va. Na ɣa ga è ziɛ ga tɔgi niitiɛ zii‐ma‐ziɣi ʋaa mɛ lɛ ɣɛ ba, è mɛ lɛ ɣɛ kɛɛzu ga su‐yɛvɛ‐bo pele. 22Mɛ lɛ ƃolo ga yee‐vɛɛ nu wũmɔ ga è kulo ɔ́ nɔ ɣɛ ga è wɔɔ laa loo nu ƃɔnɔ na faa yowũ va. Ɣata ƃɔɔ ɣɛɛ va ga nui maa wuai. 23Mɛ lɛ sa ɣɛ nɔ ziɛ ƃoalezu, kɛ̀ yíɛ ŋasa vai mayiɛi ta wolo ƃoale è wuu‐zuvɛ ʋaa ma ta seeƃɛi zɔitiɛ yà bo ti‐ti.

24Nu ɣa zoo é wɛlɛ nui taniga ta ʋaa yowũ va ga faa ʋii‐ƃɛɛ yíɛ li ga te yee luo vele faa‐wo‐gaa‐leveai zu. Kɛ̀ taniga ta ʋaa yowũi ɣa wulo podo ɣa ga ná yee luo vele. 25Vele nɔ na é la ga nu ɣɛɛ‐zɔ pagɔi. Towaa ɣɛ ga fai nu ɣa pɛtɛ ga faa ʋii‐ƃɛɛ. Tɔwɔ ani ƃalaa wɔnɔ tɛ lɛ ɣɛ vɛtɛni ga faa ʋii‐ƃɛɛ, tɛ lɛ yɛga doowu velei zu wɔ.

Currently Selected:

1 TEMETE 5: DN1971

Highlight

Copy

Compare