2 TEMETE 1
1
Daali‐mai
1Nài gè ga Pɔɔ, gà ga Ziizɛ Kolai na keelai ta Gala zii‐mai mavele ma è ɣɛ velei zɛʋui maɣi‐togi la nii nu ɣa maa zɔlɔ wo te ɣɛɛ vele ma su ɣilekpu ta Ziizɛ Kolai. 2Gà kɔlɔi nii wonɛzu è wɔ, yài è ga ẁõila lui Temete. Kpɔ‐bai, maa‐wõi‐ɣai é vɛɛ zii‐lai va kuloai de ɣeea Gala zeea ta de maliɣii Ziizɛ Kolai ta ɣɛ è ʋaa ma fãa.
Mɛ lɛ wũfe
3È laa ɣi ka ɣɛ na loozu gà ti‐ti nà Gala‐feliai zu, nà Galagi nii gè tii ɣɛɛzu bɛ́ ga yii zu wodoa è ɣɛ velei màma gwɔlɔni te kɛɛni la, gà mama fe bɛ́. 4Kì ka loo na è ɣaazu maa yiɛi zu é looni yìɛ, gà ɣɛ ná maa‐wõi‐wõi kulozu kpidi vɛɛ folo va ga gè wɛlɛ yìɛ, kɛɛ ʋaa ma zii laa ʋe ga kuu‐zu‐nɛɛ. 5Kì toovɛ yà yee‐la‐mai ʋaa zu nii gaa‐wɔlɔ gɛ lɛ maʋaa zu è ya. Tɔ ga zee‐la‐mai nii é ɣɛni è maa Loowe ya ga maa wũ pa ta è lee Yunesi. Tɔwɔ dàavɛ la zai ŋɛ ni ga tɔ è ya. 6Na ma gà è ɣi toozu ná zu ga Gala na faa‐nɛi é è yii zu máʋai wu ziɣi wɔnɔ è yii zu. Na ɣa fa faa‐nɛi nii è maa zɔlɔ woni zèe‐vɛɛ vele ma è wũmɔ. 7Gala gɛ lɛ duo‐luo ki‐gaa‐ziɛ vilini de ma. Kɛ̀ gaa‐ƃaa ɣi‐gaa‐ziɛ ɣa é pilini de ma ta wõila é vɛɛ ki‐gaa‐ziɛi va yá ɣɛ nu ma kpɔɔ zu‐zo faa zu faa ma. 8Na ma mɛ lɛ wũfe ga è de maliɣii mazeele wo ʋɛ ɔ́ nɔ ɣɛ ga è màwũfe bo, nài gè ga ná pilisinei. Kɛ̀ yà laa ziɣi daa‐nɔwɔ‐wogi zu woo niinɛ vagɔi ʋaa ma yìɛ kɛ Gala na gaa‐ƃai zu. 9Towa é de valoni é de lili ga tili maa wua. Ɛ́ lɛ ga é kɛɛni da lii‐ɣɛɛ zaƃu ma, kɛ̀ é kɛɛni tɔ ƃɔɔ leʋei mazaƃu ma ta ná maa‐wõi‐ɣaa ɓɔ‐bai é boni wɔlɔ ga diɛ da Ziizɛ Kolaini de ɣɛɛ vele ma su ɣilekpu. 10Na ɣa ɣɛɛ na maʋai wuloni kɛnɛ ma Ziizɛ Kolai na kuloi é boni sáala zu. Towa é saa maʋaa ƃaleni gá, zɛʋui ƃɔga nu‐yɛ fai na wɔ é natiɛ maʋaa wulo kɛnɛ ma woo niinɛ vagɔi zaala zu. 11Woo vagɔi nii ɣa kùloai ga gè ɣɛ ga bo nu gè ɣɛ ga Ziizɛ Kolai na keela gè ɣɛ wɔnɔ ga kala‐mɔɔ. 12Daa‐nɔwɔ‐wogi zai ŋɛ ni gè bosu, nà malaa‐nɔwɔ‐wo ka gè bosu. Kɛ̀ gɛ̀ lɛ wũfesu. Toku ge zei ga nui máʋaa ziɣiai bɛ̀ ga gaama gè kwɛ̃ni. Nà wɔ dàavɛ la ga nii tògɛi maʋaa ƃawola towaa zoo é ƃaa ná maazu é yɛsu faa‐wo‐gaa‐leve ʋoloi ziiti. 13Woitiɛ è te mɛniga dà te maʋaa ɣaa wuai, ziɛ ga tiɛ yìɛ kɛ zee‐la‐mai zu ta wõilai yá ɣɛ nu ya te ɣɛɛ vele ma su ɣilekpu ta Ziizɛ Kolai. 14Ƃaa gaamãi maazu è logɛi maʋaa ƃawola. Yà nii ɣɛ Gala baa ŋinɛgi zaala zu é de yii zu.
15È kwɛ̃ni ga taitiɛ ɣaazɔ te Eezia te wulu ɣaa ʋega bà. Tɔwɔ Figɛlɛ ƃɔga Hɛmageni te vɛɛvɛ te va. 16De maliɣii ɣaʋa bu maa‐wõi‐ɣaa wo ga Oonɛsifɔlɔ wɔ pɛlɛ wu vea fãa. Ɔ́ tòo zu ti‐ti. Yɔ̃wɔi é ɣɛni bà nà mawũfe gɛ lɛ ŋɛni gáazu. 17Kɛ̀ tei é lɛɛni Loomɛ lai zu, é ɣɛni ƃɔɔ màʋaa wɔwɔ wo kulozu su maʋai wɔɔlɔi gáazu é yɛsu é pɛ̀tɛ sa. 18De maliɣii ɣa ʋa bu zéea fãa é maa‐wõi‐ɣaa maa zɔlɔ wo zéea ga faa‐wo‐gaa‐leve ʋoloi. Tiitiɛ ɣaazɔ é te ɣɛɛní Ɛfɛsɔ lai zu, è te maʋaa wɛ̃ni ga pagɔ.
Currently Selected:
2 TEMETE 1: DN1971
Highlight
Copy
Compare
Share
Want to have your highlights saved across all your devices? Sign up or sign in
Loma New Testament © British and Foreign Bible Society, 1971.
