1 PITE 4

Gala na kpɔ‐bai ƃawola nu vagɔi

1Na ma tei tɔwɔ Kolai laa nɔwɔ woni nu ƃuse ŋeteai zu, a kɔɔ‐wɔɔ maa‐ɣili bo na ga ki‐gaa‐ziɛ zii ɣilagi na nɔ. Toku ge zei ga nui nɛpɛgi é laa nɔwɔ woga nu ƃuse ŋeteai zu, manui ƃe ge levea faa yowũ va, 2kɛɛ ʋaa ma é mɛ lɛ sa ná ŋeteai matai ɣɛ nu ƃuse na ŋɛni‐wõi‐leve‐ma velei zu. Kɛ̀ towaa kɛ Gala zii‐mai mavelei ma. 3Siɛgi nii sa é levega kulo‐ɣɛɛ wogɛ bɛ nii ɣɛɛ ʋaa ma zii ƃalaagitiɛ te wõini tiɛ kɛ. Natiɛ ta ga ƃaa‐wulo‐ma luo‐woga, ŋɛni‐wõi‐leve‐ma, dɔɔ‐ƃakpa‐ƃoalea, zɔɔ‐zɔɔ gaa‐wo‐boga, dɔɔ‐ƃoale wuu‐ɣaa, é vɛɛ sa tɔ‐maazu‐vɛtɛ tala maa‐niini gala‐feliai va. 4Kulovɛ ga tiɛ ga tei wɛ lɛ sa vɛɛzu te va wɔ ɣɛ gaa‐vala‐ba wulozu ga wiɛ zii‐maa‐ɣɛɛ wo ga ƃaa‐wulo‐ma vele. Na ɣa ɣɛɛ na te vɛɛ sa ga wo laa ŋala‐ŋalaga. 5Tɔwɔ ta woo zu wulo nui nii ya kavele ƃɛtɛi ga ʋulu vea ta saa vea é ta ʋaa‐wogi ɣaa leve. 6Nii mazaƃui ɣa woo niinɛ vagɔi woni la saa veaitiɛ ma ƃalaa pɛ, kɛɛ ʋaa ma velei ƃalaa ta ʋaa‐wogi ɣaa leveni la nu ƃuse ŋeteai zu è ɣɛ velei yá ɣɛɛ la ga nu ƃuse, te ɣɛ ga nu ta te Gala ta ŋeteai ɣɛ. Na ɣa ga velei Gala na ŋeteai la.

7Faa pɛ mawɛ̃ɛ‐pele‐ma maa ƃuovɛ sa. A ɣata ɣɛɛ va ga nui gaazu lai ga daa vele wo ɣaa leiyai wa Ɣala‐feli ʋai ma. 8Tei tɔwɔ wõila ɣa faa yowũ lama‐lama maa ƃoale, nii é ga maƃigi tɔ ga wo mɛ lɛ ʋɛŋɛ wõilai zu é wo ya ɣiini faa ma. 9A gaazu‐wodo luo wo ga ɣiini wo wuu zu vagɛi ɣiini faa ma. 10È ɣɛ velei nu ɣile‐giledai zooda ʋaa maa zɔlɔ woga la, a tii ɣɛɛ la ŋɛ ni ɣiini faa ma. Gala na kpɔ‐bai é ga de zooda ʋaitiɛ máa ʋeli‐feligɛ. Na ma a de tii ɣɛ ga tiɛ ga velei ná tii‐ɣɛɛ vea vagɔa ta kɛɛ la. 11Nui nɛpɛ daa ɣa ʋa, pagɛ é ƃɔɛ è ɣɛ Gala daa woo‐wo nu. Nui nɛpɛ yá ɣɛ kpɔ‐ba wosu, pagɛ é kɛ è ɣɛ nu ɣa ɣɛ tii ɣɛɛzu ga su‐ƃai nii Gala ge pua dɔtɔ zu. Niitiɛ ta ɣɛ kɛɛ ʋaa ma daa‐maa‐lɛɛ wo ga Gala fai ɣaazɔ zu Ziizɛ Kolai zaala zu. Towa po ge ga saala‐malai ta gaa‐ƃai wɔlɔ‐wɔlɔ ta wɔlɔ‐wɔlɔ. Na nɔ yá ɣɛ.

Nu laa‐nɔwɔ‐wogai è ɣɛ Kolai maa nu

12Wõìla veaitiɛ, ŋabu ƃotoi wo vaazu siɣizu máʋaa mɛ lɛ wulo ga wiɛ yà ka è ɣɛ faa ta ɣa ɣɛɛzu ga wiɛ máʋai wo ma ga wɛ̃ɛ. 13Kɛ̀ a wiɛ kuu‐zu‐nɛɛ wulo ga velei wo wɔɔ laa zolowosu la Kolai na daa‐nɔwɔ‐wogi zu, kɛɛ ʋaa ma ná saala‐malai maʋaa ɣa wulo na kɛnɛ ma wo kuu‐zu‐nɛɛ ƃakpa wulo ƃalaa pɛ. 14Ani ta ɣɛ na faa wosu ga wo la Kolai na daa‐zeigi mazaƃu ma, tuuyiɛ ɣa ɣɛ wo ma. Ƃɔvɛlaale Gala na saala‐malai nii é ga baa ŋinɛgi tɔ wo zaama. 15Kɛ̀ a mɛ lɛ ƃe ba wo ta nɛpɛ gɔ daa‐nɔwɔ‐wogi nii wo pele‐ma lala luo‐wo nu ɣa bo. Natiɛ ta ga nu‐vaa nu, wũmɔ nu é vɛɛ kuu‐zu‐ƃɔlɔ nu va. 16Nà pɛ ge ɣɛɛvɛ, ani nu ta ɣa ɣɛ na laa nɔwɔ wosu kɛ́ɛ vele ma ga Kolai maa nu, pagɛ manui mɛ lɛ ɣɛ wũfesu. Kɛ̀ pagɛ yíɛ ƃaa la Gala ma Kolai na daa‐zeigi na yee wu. 17Ƃɔvɛlaale siɛgi ziitia ga faa‐wo gaa‐leveai lɔɔ zei Gala pɔ pɛlɛ wu veaitiɛ va. Tɔwɔ ani tɔɔ ɣa zei na de va, niitiɛ tɛ lɛ goo‐mɛni kuloni Gala na goo niinɛ vagɔi zu, zɛƃɛ mu ka sa a ɣɛ ga natiɛ ta dɛi laa‐wulo‐zuvɛ? 18Tɔwɔ ponɛvɛ Gala kɔlɔi zu mawoi ga,

“Ani tele‐bo tuo‐wo nui mu balozu ɣa ƃaa na,

nui nii sa é ga Gala tuo‐wo tala nui é ga

faa yowũ‐ɣɛɛ nu,

minɛ ɣa ná ɣa ɣɛ ga nà ɣɛɛ‐zuvɛ?”

19Na ma pagɛ niitiɛ ta ɣɛ laa nɔwɔ wosu Gala zii‐mai mavele ma tiɛ pele‐ma ʋaa ɣɛ, ŋɛni‐pɛ‐kpɛtɛ nui logɛi tiɛ te yɛʋui maʋaa ƃawola. Tɔ ga nui nu ɣa laa la.

Currently Selected:

1 PITE 4: DN1971

Highlight

Copy

Compare