1 PITE 3

Ŋaza kɛɛ vea ƃɔga zini‐bɛ vea te luo velei

1Vele nɔ na é la ga wiɛ, wai wo ga zini‐bɛ veaitiɛ. A wolo wo zinigitiɛ vɛ, kɛɛ ʋaa ma velei ƃalaa te taniga tɛ lɛ goo‐mɛni kulozu la Gala daa woi zu, wo te maa zɔlɔ wo ga de ta, woi‐wo fai te ma nà ƃalaa ziɣi ba. Nii ɣa ɣɛ te ŋazaitiɛ luo velei zaala zu. 2Na ɣa ga ta wɛlɛ na velei va wo maa wuai la wo luo velei zu ta wũfe‐mai wa bo ga Gala. 3A mɛ lɛ wa dɛi ɣɛ nɔ ga podo ɣala‐kala‐ga maa‐ɣili‐boga wiɛ maa ɣili nɔ ga wũ‐taali‐taali‐fɛlɛɛ wiɛ kɛ wɔnɔ nɔ ga zɛni ta seɣe. 4Kɛ̀ a ɣɛ ga nu ƃusei nii máʋai lɛ nɔ podo ɣala‐kala ga. A ɣɛ ga nui nii máʋai ga nu yii zu vele wiɛ maa ɣili ga tɔnɔ‐ba ŋɛnii nii ɛ́ lɛ ŋala‐ŋalaga. Na ɣa ga nii é ga sɛ‐sɛ‐bo‐bo ki‐gaa‐ziɛi gaa yiiyai. Towa é Gala gaazu ga tɔnɔ‐ba ŋɛni ƃakpai. 5Ŋazaitiɛ te wuloai ɣɛ su ga Gala na dɔa te ɣigi wɔ ge Gala ba, vele ɣa na wɔlɔ te maa ɣilini la. Te woloai ɣɛ te zinigitiɛ vɛ. 6Na ɣa ga velei Seelɔ goo‐mɛni kuloni la Eeƃɔlɔhɛ̃ɛ ya yíɛ tili ga máliɣi. Tɔwɔ wa ɣa wo ga Seelɔ deaitiɛ, ani wa nɔ pele‐ma luo wosu wɛ lɛ ƃesu ba faa ta nɛpɛ gɔ duo ƃakpa vili wo ma.

7Vele nɔ na é la ga wiɛ, wai wo ga ŋaza kɛɛ veaitiɛ. A ŋeteai ɣɛ ga wo ɣi‐gaa‐ziɛ vele wo ŋazaitiɛ ʋaa ma. A wiɛ ƃaa la ŋazaitiɛ ma ga velei te la ga numaitiɛ zobo gɛ lɛ te vɛ ga velei wo la, toku ge zei ga wo ƃɔgɛ wa tiɛni wo weli ge ga zɛʋui maƃɔ‐bai. Wa nii ɣɛ kɛɛ ʋaa ma ŋɛni ta mɛ lɛ ƃesa wa Ɣala‐feliai luo.

A laa nɔwɔ wo tele‐bo tuoi wulu vele zu

8Na pɛ ka wulo na ba, wo pɛ a ɣɛ su ɣilekpu wa ɣi‐gaa‐ziɛi zu, nu maa‐wõi ɣɛ wo ma, wiɛ wõi ga wo vaitiɛ, wiɛ sɛ‐sɛ‐bo tuo wo wiɛ zii‐wɔɔlɔ lala luo wo. 9A mɛ lɛ faa yowũ woto kulo ga faa yowũ ɔ́ nɔ ɣɛ ga wo daa‐woo‐zu‐loo woto kulo ga daa‐woo‐zu‐loo. Kɛ̀ to mu a faa woto kulo ga tuuyiɛ‐loa. Ƃɔvɛlaale nà ɣa wo liligɛi ma, kɛɛ ʋaa ma wo tuuyiɛ maa zɔlɔ wo. 10Ƃɔvɛ‐laale ponɛvɛ Gala kɔlɔi zu ga

“Nui nɛpɛ é wõini ga zɛʋu yíɛ wõi ɣɛ ga ŋetea

nɛɛ ma,

kɛni yá laavɛ zo ga @ê mɛ lɛ faa yowũ wo.

Kɛni wɔnɔ yá laa wulu zɛɛ‐ʋaa‐woga va.

11Pagɛ manui wulu ɣaa ʋe faa yowũ va yíɛ tele‐bo

tuo wo.

Pagɛ manui zii‐laa ɣaa ziɛ yíɛ pele ɣaa ziɛ

ga é sɔlɔ wo.

12Ƃɔvɛlaale de maliɣii ɣaazu vagɔ wulovɛ tele‐bo

tuo‐wo bea ma,

gui laa laogɛi ta ʋeli woi luo.

Kɛ̀ de maliɣii ɣaazu yowũ wulovɛ niitiɛ ma

te faa yowũ ɣɛɛzu.”

13Tɔwɔ ƃɛ ɣa é na yá faa ɣɛ ga wiɛ ani wo wɔɔlɔvɛ gaama ʋaa‐ɣɛi zu? 14Anɛɛ ƃalaa wo laa nɔwɔ wo tele‐bo tuoi mazaƃu zu, tuuyiɛ ɣa ɣɛ wo ma. A mɛ lɛ luo te va ɔ́ nɔ ɣɛ ga wo yii zɛlɛ. 15Kɛ̀ a wiɛ wũfe Kolai ma ga kpakpaa ga towaa é ga de maliɣii. A ɣɛ ga nui kavele ƃɛtɛi ɣee nɛpɛ ga wo woo zu wulo nui nii ya yá wo lili ga wo goo‐zu‐wulo bo ki‐togi nii ʋaa ma é wo ɣigi zu. Nà pɛ ge ɣɛɛvɛ, a wiɛ kɛ ga sɛ‐sɛ‐bo pele ta wũfe‐ma‐woga ga Gala. 16Na ɣa ɣɛɛ na a ɣɛ ga nui kí gɛ lɛ ɣɛɛ ɣɛɛ‐zɔ ba, kɛɛ ʋaa ma ta wo zo pele yowũ na, niitiɛ ta ɣɛ wo laa woo zu loozu ga yowũa tuo vele vagɔi ʋaa ma é wo ya wo ɣɛɛ vele ma su ɣilekpu wa Kolaini, wũfe ge vili te ma. 17Toku ge zei ga ani wo laa‐nɔwɔ‐wo fai gaama‐ɣɛɛ ʋai ma towa é ga Gala zii‐mai, nà vagɛ é leve wo laa‐nɔwɔ‐woga va pele‐ma lala luo‐wo faa ma. 18Ƃɔvɛlaale Kolai ƃalaa zaani faa yowũ ʋaa ma. É na ɣɛɛni wo ʋaa ma, nà wɔ ge kulo‐ɣɛɛ wo. Na zu‐wulo‐zu ɣa ga nii mugi é ga tele‐bo tuo‐wo nui é zaani de ʋaa ma dai de ga tele‐bo tala luo‐wo bea. É nii ɣɛɛni ga é va ga wiɛ Gala pɔ. Yá li na ga nu ƃuse ŋeteai wɔɔ laa vele, te páani. Kɛ̀ yá li na ga Gala ta ŋeteai wɔɔ laa vele, é zɛʋu zɔlɔ woni. 19Nii mavele ma é liini é Gala goi wo gɔʋɛi niitiɛ ma te kpidi vɛlɛ wu. 20Tei gɔʋɛi niitiɛ te ɣɛni nu ƃuselaa zu, tɛ lɛ goo‐mɛni kuloni Gala zeea siɛgi na zu Gala ge ɣɛni te maa kpowũsu la ga zii‐lɔɔ vele. Na ɣa ga siɛgi na zu Nowa ɣɛni kẽe gwalai ƃɛtɛzu la. Kẽegi nii zu nu lɔsava nɔ ɣa ziɛi ɣɛni ga zaƃu te wulo su. 21Bataizei solowogɛi fai nii ma towaa é wo valozu. Ɛ́ lɛ ga nɔwɔ ɣa é guozu wo lɔtɔi ma. Kɛ̀ tɔ ga faa‐laa Gala bɛ ga é kɛ wo ɣɛ ga nui kí gɛ lɛ ɣɛɛ‐zɔ ba. Towaa nii ɣɛ bu‐ziɣi zaala zu Ziizɛ Kolai boga saa ya. 22Na ɣa ga Ziizɛ Kolai nii é lɛɛ Gala ta é ga Gala zee za‐su vele. Gala ta ɣeelaa, taitiɛ gaa‐ƃaa te ya é vɛɛ zee‐zu‐ƃaa vea va ta bú.

Currently Selected:

1 PITE 3: DN1971

Highlight

Copy

Compare