1JƆ̃ 3

1A wɛlɛ velei va de wõiyai la de ɣeea Gala bɛ ga velei te de lilisu la ga déa. Tɔwɔ vele ɣa na de la. Zaƃui ŋeteai nii zu veaitiɛ tɛ lɛ de wɛ̃ni la tɔ ga tɛ lɛ ŋɛni Gala kagi wɛ̃ni. 2Wõìla veaitiɛ, a da sa ga Gala dea. Nii de vaazu ɣɛɛzu la ɛ́ dɛ wuloni kɛnɛ ma, kɛ̀ de kwɛ̃ni ga Kolai ɣa wulo na kɛnɛ ma da ɣɛ ga kavelei, ƃɔvɛlaale da sa da wɛlɛ ƃɔɔ bá ga velei tɔ ɣagi la. 3Tɔwɔ nui nɛpɛ kí togɛi bá nii mavelei ma, manui ɣa ɣɛ ƃɔɔ maa wuozu è ɣɛ velei tɔ ɣagi maa wuai la.

4Nui nɛpɛ yá faa yowũ ɣɛ, manui vaa ʋaa ɣa ɣɛ ga Gala na tɔgi maazu‐vɛtɛ tala ʋai. Faa yowũ ɣa ga tɔ‐maazu‐vɛtɛ talai. 5Wo kwɛ̃ni ga Kolai wuloni ga é faa yowũ maʋaa ziɣi gá. Tɔwɔ faa yowũ nɛpɛ gɛ lɛ máʋaa va. 6Nui nɛpɛgi ta tɔ ta yɛ su ɣilekpu ɛ́ lɛ ɣataga faa yowũ‐ɣɛɛ va. Nui nɛpɛgi katagɛi faa yowũ‐ɣɛɛ va ɛ́ lɛ dɛ pɛ́tɛni ɔ́ nɔ ɣɛ ga é kẃɛ̃ɛ. 7Dèa woloitiɛ, a mɛ lɛ ƃe ba nu ta nɛpɛ gɔ wo ɣaa wɔlɔ. Nui nii yá gaamai ɣɛ tɔ ga tele‐bo tuo‐wo nu è ɣɛ velei nɔ Kolai la ga tele‐bo tuo‐wo nu. 8Nui katagɛi faa yowũ‐ɣɛɛ va tɔ ga dɛvele na dɔ. Ƃɔvɛ‐laale dɛvele ɣɛɛvɛ nɔ faa yowũ ɣɛɛzu é ziɣi tɔɔ‐zei ʋolo ma. Zaƃui Gala dui wuloni ma é ɣɛni ga é dɛvele ɣɛɛ liitiɛ zu ŋala‐ŋala. 9Nui nɛpɛgi é ga Gala duu ɛ́ lɛ ɣataga faa yowũ‐ɣɛɛ va, ƃɔvɛlaale Gala na ŋeteai‐ƃɛtɛ velei ɣa ɣɛ manui yii zu. Na ɣa ɣɛɛ na ɛ́ lɛ zooga ɔ́ ɣata faa yowũ‐ɣɛɛ va, ƃɔvɛlaale tɔ ga Gala duu. 10Niitiɛ te ga Gala dea ta niitiɛ te ga dɛvele dea, nii ɣa nu ɣa te yɔɔzu maa ƃɛɛ la. Na ɣa ga nui ɛ́ lɛ gaama luo wosu ɛ́ lɛ ga Gala na dɔ, ɔ́ nɔ ɣɛ ga nui ɛ́ lɛ wõini ga bɔ́ɔ nu nà ɣɛ ga Gala na dɔ.

A wõi ga ɣiini

11Keela woi nii ɣa wo mɛnini ƃɔɔ ga tɔɔ‐zei ʋolo. Na ɣa ga a de wõi ga ɣiini. 12Kĩi nii é ɣɛni ga tuƃo‐vele‐yowũ‐wulo nui na dɔ, a de mɛ lɛ kɛ ga nà ná dɛi ɣavele. Towa é déɣei vaani. Zɛƃɛ wɔ ka é kɛɛni yíɛ nà vaa? Mazaƃui ɣa ga tɔ ƃɔwɔi kɛɛ‐zɔgitiɛ yowũai ɣɛ, déɣei wɔ ge ga tele‐bo tuo‐wo nu. 13Nà numaa, ŋeteai nii zu veaitiɛ zilii bogɛi ga wiɛ máʋai mɛ lɛ wulo ga wiɛ. 14De kwɛ̃ni ga de wuloa saa ya de zɛʋu maa zɔlɔ wo, ƃɔvɛlaale de wõini ga de vaitiɛ. Nui nii wõila lɛ zéea tɔ dɛ saa ya. 15Nui nɛpɛ yá zili ga bɔɔ nu, manui ɣa ga nu‐vaa nu. Tɔwɔ wo kwɛ̃ni ga zɛʋui nii kwɛ̃ɛ gɛ lɛ ba ɛ́ lɛ nu‐vaa nu ya. 16Nii ɣa da wõila wɛ̃ɛ da. Na ɣa ga Kolai yɛʋui yɛni de ʋaa zu. Tɔwɔ kɛni a da yɛʋui yɛ de vaitiɛ ʋaa zu. 17?Kɛ̀ ani ŋeteai nii zu ŋɛnii ɣa ɣɛ na nu ta nɛpɛ zeea, manui wɛlɛ bɔ́ɔ nu va kpalai, tɔwɔ é ɣi kpaa ma tuo, Gala na wõilai ɣa ɣɛ ɣɛ le kígi zu? 18Dèa woloitiɛ, a de mɛ lɛ wõila ɣɛ ga laa‐woo‐zu ʋaa ɔ́ nɔ ɣɛ ga de kɛ ga faa‐zu‐wuloa. Kɛ̀ a de kɛ de ɣɛɛ ʋai zu ta gaamai.

Duo lalai Gala gaazu

19Nii ɣa da kwɛ̃ɛ da ga da ga gaamai zu vea. Na ɣa ɣɛɛ na de mɛ lɛ luo Gala gaazu 20ani de ɣi ka vile na ɣɛɛ‐zɔ ba ga towaa vɛɛ de va ga faa, ƃɔvɛlaale Gala gwala levegɛ da ɣi‐gaa‐ziɛi va. Tɔwɔ é fai pɛ kwɛ̃ni. 21Wõìla veaitiɛ, ani de ɣi gɛ lɛ ɣɛni ɣɛɛ‐zɔ ba ga towaa vɛɛ de va ga faa, a da ɣɛ ga duo lala vea Gala gaazu. 22Na ɣa ɣɛɛ na nii nɛpɛ da feli ma da maa zɔlɔ wo, ƃɔvɛlaale da ɣɛ ziɛzu ga ná tɔgitiɛ, nii nɛpɛ yá zii la diɛ na ɣɛ. 23Tɔwɔ nii ɣa é ga ná tɔgi. Na ɣa ga a de dúi Ziizɛ Kolai na daa‐zeigi ʋaa ziɣi ga gaama de wõi ga ɣiini, è ɣɛ velei nɔ é deʋea la é da de ya. 24Taitiɛ nɛpɛ te ziɛzu ga ná tɔgitiɛ ta tiɛni ta ɣɛ su ɣilekpu wɔ. Na ɣa ɣɛɛ na towaa ɣɛ te yii zu. Nii wɔ ka da kwɛ̃ɛ da ga tɔ de yii zu. Na ɣa ga Gala baa ŋinɛgi é tevega de wɔ vɛ.

Currently Selected:

1JƆ̃ 3: DN1971

Highlight

Copy

Compare