1JƆ̃ 4

Gala nu na ki‐gaa‐ziɛi ta Kolai wɔɔ yɔ̃wɔ na dɛi

1Wõìla veaitiɛ, taitiɛ ɣaazɔ ta bo ga Gala baa ŋinɛgi ɣa é kɛɛzu tiɛ faa ta ɣɛ, a mɛ lɛ te maʋaa ziɣi ga gaama. Kɛ̀ a te wɔ̃ɔ‐kɔ̃ɔ wo wɛlɛ na va ga ani ta ɣi‐gaa‐ziɛi wulovɛ Gala zeea. Ƃɔvɛlaale zɛɛ ʋaa Ɣala daa woo‐wo bea lamaa te wulovɛ sa te vile zui zu. 2Nii ɣa wa ki‐gaa‐ziɛi nii wɛ̃ɛ da é ga Gala baa ŋinɛgi ɣɛɛ ʋaa. Ki‐gaa‐ziɛi nɛpɛ yá kɛ nu laa wu ziɣi ma é bo ga Ziizɛ Kolai vaani nu ƃuse lɔtɔ zu, maɣi‐gaa‐ziɛi wulovɛ Gala zeea. 3Ki‐gaa‐ziɛi‐nɛpɛ ɛ́ lɛ kɛɛ nu ɔ́ laa wu ziɣi Ziizɛ maʋai ma ɛ́ lɛ wuloni Gala zeea. Ki‐gaa‐ziɛi na ɣa é ga Kolai wɔɔ yɔ̃wɔi na ki‐gaa‐ziɛi nii wo mɛnini ga tɔ vaazu. Tɔwɔ tɔ sa ʋɔlɔ ŋeteai nii zu. 4Dèa woloitiɛ, wa ga Gala na dɔa, tɔwɔ fɔlɔ wo yee levega sa zɛɛ ʋaa Ɣala daa woo‐wo beai niitiɛ va. Ƃɔvɛ‐laale nui nii é wo yii zu gwala levega nui va é ŋeteai nii zu. 5Ta ŋeteai nii ʋaa ma. Na ma nii ta bo tɔ ŋeteai nii ʋaa ma. Tɔwɔ ŋeteai nii zu veaitiɛ ta wui to te woo ma. 6A da ga Gala na dɔa. Nui nɛpɛ é Gala kwɛ̃ni manui ɣa wui to de woi ma. Nii wɔgi lɛ ga Gala na dɔ ɛ́ lɛ wui toga de woi ma. Vele wɔ ka na a da gaama ɣi‐gaa‐ziɛi wɛ̃ɛ da ta ki‐gaa‐ziɛi nii lɛ pele ma.

Gala ka ga wõila

7Wõìla veaitiɛ, a de wõi ga ɣiini, ƃɔvɛlaale wõila wulovɛ Gala zeea. Na ɣa ɣɛɛ na nui yá wõi ga baa tɔ ga Gala duu, Gala kwɛ̃ɛgɛi bɛ́. 8Nui ɛ́ lɛ wõiya ga baa, ɛ́ lɛ Gala kwɛ̃ni, ƃɔvɛlaale Gala ka ga wõila. 9Nii ɣa é Gala na wõilai wuloa kɛnɛ ma. Na ɣa ga é duu ɣilekpugi leveni zui zu, kɛɛ ʋaa ma zɛʋu ɣɛ de ya saala zu. 10Nii ɣa é ga wõila. Ɛ́ lɛ ga de wõi ɣa de boni ga Gala, kɛ̀ to mu Gala ka é de wõini ɣɛ é dúi leve ga é ɣɛ ga da ʋaa yowũitiɛ zu‐ƃɛtɛ ŋɛni. 11Wõìla veaitiɛ, tei tɔwɔ Gala ge nà ɣavele wõi woga ga diɛ, tɔ de ma ga kui ga de wõi ga ɣiini ƃalaa pɛ. 12Nu ta lɛ dɛ wɔlɔ Gala pɛtɛni. Kɛ̀ ani da wõi na ga ɣiini, Gala ka yɛ de yii zu, na ɣa ɣɛɛ na ná wõilai yá ɣɛ de yii zu máʋai ɣa wolo wulu ma.

13Nii ɣa da kwɛ̃ɛ da ga de ɣatagɛ ɣɛɛ va su ɣilekpu da tiɛni, tɔ wɔ é de yii zu. Mazaƃui ɣa ga é ƃɔɔ vaa ŋinɛgi levega de wɔ vɛ. 14De wɛlɛɛ na va de mazeele woo ʋe ga de ɣeea Gala ge dúi levega ga zui‐wulo‐faa‐zu nu. 15Nui nɛpɛ yá laa wu ziɣi ma é bo ga Ziizɛ ɣa ga Gala duu, Gala ka yɛ manui yii zu ta tɔ te ɣɛ su ɣilekpu. 16Na ma wõilai nii é Gala zeea de ʋaa ma de kwɛ̃ni, síɣiai de vɛ ga gaama. Gala ka ga wõila. Nui wõila zíi zu wɔ towaa ɣata ta Gala te ɣɛɛ va su ɣilekpu, Gala pɔ ge yɛ zíi zu. 17Tei tɔwɔ velei Kolai la de ŋɛ na zui zu, na ɣa kɛ de wolo wulu ma wõila ʋaa ma é de ya, kɛɛ ʋaa ma de mɛ lɛ luo faa‐wo gaa‐leve ʋoloi ʋaa ma. 18Duo lɛ wõila zu. Kɛ̀ wõilai máʋaa woloai wulu ma towaa duo wulo nu yii zu. Ƃɔvɛlaale duo ƃɔga tɔ‐kpɛ‐ma ta ɣa te la. Na ɣa ɣɛɛ na nui yá ɣɛ luozu, maa‐wulo‐zu ɣa ɣɛ ná wõilai va. 19Zɔi é kɛɛ wõila ɣɛ de ya tɔ ga é ɣaʋuni é wõi ga diɛ. 20Ani nu nɛpɛ ka ɣɛ na tea, “Gè Gala wõini,” tɔwɔ é zili ga bɔɔ nui, a kɛ tii tɔ ga zɛɛ ʋaa nu. Ƃɔvɛlaale nui ɛ́ lɛ wõiya ga bɔɔ nui nii é wɛlɛɛ bá, ɛ́ lɛ zooga ɔ́ wõi ga Gala nii ɛ́ dɛ pɛtɛni. 21Tɔgi nii ɣa Kolai daa de ya. Na ɣa ga nui nɛpɛ é Gala wõini kɛni yá bɔɔ nu wõi ƃalaa pɛ.

Currently Selected:

1JƆ̃ 4: DN1971

Highlight

Copy

Compare