Shpricha 16
16
Es 16. Gabiddel.
1Vass da mensh im sinn hott fa du kumd fumm mensh,
avvah sell es di zung sawwa soll kumd fumm Hah.
2Ebbah mecht denka es sei vayya sinn recht,
avvah da Hah veekt da geisht fumm mensh.
3Gebb ivvah zumm Hah sell es du du vitt,
un du zaylsht dei eahvet recht ausdrawwa.
4Da Hah hott en uahsach fa alles es eah dutt,
even fa di gottlohsa am dawk funn fadauves.
5Ebbah mitt en shtols hatz is grausam zumm Hah,
un eah zayld geviss nett unkshtrohft gay.
6Deich shtandhaftichi-leevi un voahheit vadda sinda fagevva,
un deich di furcht fumm Hah hald en mann sich vekk funn evil.
7Vann en mann sei vayya kfellich sinn zumm Hah,
dann macht eah even sei feinda in fridda layva mitt eem.
8Es is bessah fa vennich havva mitt gerechtichkeit,
es vi feel havva es uneahlich grikt voah.
9En mann macht aus vass eah du zayld,
avvah da Hah fiaht sei shritt.
10Em kaynich sei leftz shvetza fa Gott;
sei maul dutt nett letz richta.
11En eahlichi vohk un gvichtah sinn fumm Hah,
eah is bekimmaht veyyich awl di gvichtah im sakk.
12Kaynicha hassa leit es unrecht doon,
fa deich gerechtichkeit vatt iahra kaynich-shtool fesht gmacht.
13Kaynicha henn blesiah in eahlichi leftz,
si leeva en mann es di voahret sawkt.
14En kaynich sei zann is vi en gebodda-drawwah funn doht,
avvah ebbah mitt veisheit zayld broviahra een abkeela.
15Vann en kaynich sei ksicht freindlich is, dann bringd's layva.
Sei gnawt is vi en reyya-volk im free-yoah.
16Es is bessah fa veisheit greeya es vi fa gold havva,
un's is bessah fa eisicht nemma es vi silvah.
17Da vayk funn di ufrichticha drayt vekk funn evil,
un veah sei vayk vatsht hald sei layva.
18Di shtolsheit gayt fannich's fadauves heah,
un da hohchmoot fannich em fall.
19'Sis bessah fa daymeedich sei mitt di oahma,
es vi fa kshtohla shtoft fadayla mitt di shtolsa.
20Veah-evvah es acht gebt vann eah ebbes dutt, zayld goot du,
un ksaykend is sellah es sei fadrauwa in da Hah dutt.
21En mann mitt veisheit vatt ohksenna es aynah mitt eisicht,
un leeblichi vadda macht leit noch may eisayna mitt eem.
22Di veisheit is en shpring funn layva zu selli es veisheit henn,
avvah dummi leit sinn kshtrohft bei iahra dumhayda.
23Es hatz funn en mann mitt veisheit veist sich in seim kshvetz,
un vass eah sawkt macht leit eisayna mitt eem.
24Blesiahlichi vadda sinn vi hunnich,
si sinn sees zu di sayl un hayla di gnocha.
25Es hott en vayk es recht seemd zu en mann,
avvah's end funn sellem vayk is da doht.
26En shaff-mann sei abeditt shaft fa een,
sei hungah dreibt een on.
27En nix-nutzichah mann hott evil im sinn,
un sei kshvetz is vi hays feiyah.
28En gottlohsah mensh shtroit shtreit,
un aynah es kshvetzah drawkt kumd zvishich leit es freind sinn.
29En mann es gvald yoost fafiaht sei nochbah,
un fiaht een in en vayk es nett goot is.
30Veah vinkt mitt sei awwa, hott nix goodes im sinn,
un veah mohshend mitt di leftz hott evil in meind.
31Veis-grohwi hoah is vi en krohn funn hallichkeit,
un is fadeend bei en gerecht layva fiahra.
32Es is bessah fa nett kshvind bays vadda es vi fa mechtich sei,
un veah sei zann meishtaht, is bessah es aynah es en shtatt ivvah-nemd.
33Es lohs vatt gezowwa bei's in en shohs shmeisa,
avvah's fald vi da Hah es havva vill.
Currently Selected:
Shpricha 16: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
