Gianyuta 10

Malaika kede Itabu Adola Atitidi

1Di bobo ako neno malaika ace kame tek twatwal di ewok ki malo ebino piny. Oudo eumere kede edou, di etauloka tie i wie, nyime oudo cal bala ceng, kede tiene oudo cal bala mac kosipere. 2En oudo emako i cinge itabu adola atitidi kame koyabo. Oudo enyono nam adwong kede tiene tetu cam, do tiene tetu ngodal oudo onyono lobo kakatek, 3di en eko lwongere kede dwan amalo bala dorano me engu. Kakame elwongere kede, mor oko timere tien kanyaare kame cal bala me kot. 4Kakame mor otieko timere kede tien kanyaare kame cal bala me kot, oudo ango amito do cako iwandik, do ako winyo dwan kame wok ki malo di waco be, “Mung gikame mor kanyaare kame cal bala me kot owaco, kur iwandiko en.”

5 # Yai 20.11; Iswilia 32.40; Danieri 12.7; Amosi 3.7 Di malaika kame oudo ango aneno di tie cungo i nam adwong kede i lobo kakatek oko tingo cinge tetu cam malo, 6di en eko lairo i nying ngat kame bedo ikar kede ikar, ngat kocweo malo kede gikame tie iye, kocweo lobo kede gikame tie iye, kede kocweo nam kede gikame tie iye. En ewaco be, “Likame doko gal bino bedo tie. 7Do i ceng kame malaika me kanyaare bino kuto kede agwara mere, iik komungere ka Rubanga bino cobere, bala kame en ewaco ne kede inabin jotic mege.”

8 # Esekeri 2.8—3.3 Di ako winyo dwan kame oudo ageo winyo di wok ki malo nono bobo di waco na be, “Oti igam itabu adola koyabere nono ki cing malaika kame tie cungo i nam kede i lobo kakatek.”

9Ango ako ot but malaika nono ako waco ne pi mina itabu adola atitidi nono. En eko waco na be, “Tere di iko came; ebino bedo kec i yi, do emit bala mokic i dogi.”

10Ango ako gamo itabu adola atitidi nono ki cing malaika di ako came; oudo emit i doga bala mokic, do kakame atieko came kede, en eko mino yia odoko kec. 11Di oko yamo na be, “Miero bobo imurao kop ka Rubanga i kom jo atot, i kom atekerin, i kom leb apapat kede i kom abakai.”

Currently Selected:

Gianyuta 10: BILK13

Highlight

Copy

Compare