Yos 9

Ŵandu ŵa ku Gibiyoni akumlambusya Yoswa

1Kupunda ngondo kwa Aisalaeli kwamanyice kwa ayimwene wosope ŵa kungapilo lyuŵa kwa Lusulo lwa Yolodani m'matumbi, mwiŵanda mwa matumbi, ni lilambo lyosope lya mungulugulu Nyasa ja Mediteleniyani mpaka kumpoto kwa Lebanoni; jemanjaji ŵaliji ayimwene ŵa Ahiti, Aamoli, Akenani, Apelesi, Ahifi ni Ayebusi. 2Wosope ŵene ŵayice ni kusongana pamo kwapwatikanya ŵa ngondo ŵawo kuti amenyane ni Yoswa pamo ni Aisalaeli.

3Nambo mtundu wa Ahifi ŵa ku Gibiyoni ŵapikene yiŵatesile Yoswa ku Yeliko ni ku Ai, 4ni ŵaganisisye yakuti amlambusye jwalakwe. Jemanjajo ŵajawile kukujigala yakulya ni kuyikwesya pa acibulu ŵawo ni misaku jepapuce kwisa misaku ja mapende ja finyo jana yigamba. 5Jemanjajo ŵawete yiwisa ya nguwo ni sapato syepapuce syetotelele yigamba. Mkate uŵajigele waliji wejumu soni wetande kucesuka. 6Kaneko ni ŵajawile ku cigono ku Giligala ni ŵatite kwa Yoswa, ni Aisalaeli, “Uwe tutyocele ku cilambo cakwakutalika. Tukusosa jemanja ni uwe tutende mkamulano wa mtendele.”

7Nambo Aisalaeli ŵatite, “Ligongo cici akusaka kuti tutende mkamulano ni jemanja? Mwine komboleka kuti akusatamaga pa kuŵandika.”#Eks 23:32; 34:12; Det 7:2

8Jemanjajo ŵatite kwa Yoswa, “Uwe tuli ŵamasengo ŵenu.”

Yoswa ŵawusisye jemanjajo kuti, “Jemanja ali ŵani? Ana akutyocela kwapi?”

9Kaneko jemanjajo ŵamsalile aji nganiji kuti, “Uwe tutyocele ku cilambo cakwakutalika, bwana, ligongo tupikene ya AMBUJE* Mlungu jwenu. Tupikene yosope yene yiŵayitesile mu Iguputo 10ni yiŵayitesile kwa ayimwene ŵaŵili ŵa Aamoli kungopoko lyuŵa kwa Lusulo lwa Yolodani: Mwenye Sihoni jwa ku Heshiboni ni Mwenye Ogi jwa ku Bashani, juŵatamaga ku Ashitaloti.#Num 21:21-35 11Ŵakulongolela ŵetu ni ŵandu wosope ŵakutama mcilambo cetu ŵatusalile kuti tujigaliletu yakulya ya pa ulendo ni kwawula kukuwonegana ni ŵalakwe. Uwe ŵatusalile kuti tuŵe ŵamasengo ŵa wawo ni kwaŵenda wawojo kuti atende mkamulano wa mtendele ni uwe. 12Alole mkate wetuwu. Pitwatyokaga ku musi ni mkatewu kutanda ulendo wa kukuwonegana ni wawojo, waliji wa mtukuta. Nambo alole! Sambano ujumwile soni utandite kucesuka. 13Pitwagumbasyaga misaku ja mapende ga finyoji, galiji gasambano, nambo alole! Gapapwice. Yakuwala ni sapato syetu yipapwice ligongo lya ulendo welewu.”

14Aisalaeli ŵapocele yakulya kutyocela kwa jemanjajo, nambo nginawusya kwa AMBUJE pa yeleyi. 15Yoswa ŵatesile mkamulano wa ulongo ni ŵandu ŵa ku Gibiyoni nipo ŵakundile jemanjajo kutama nawo. Ŵakulongolela ŵa likuga lya Aisalaeli ŵalumbile kuti tacisunga mkamulanowo.

16Gali gapite masiku gatatu citendekwele mkamulanowo, Aisalaeli ŵamanyilile kuti ŵanduŵa ŵatamaga pakuŵandika. 17Sambano Aisalaeli ŵatandite kuliŵicila cile nipo panyuma pa masiku gatatu ŵayice ku misinda kuŵatamaga ŵanduŵa: Gibiyoni, Kefila, Beeloti, ni Kiliyati Yelimu. 18Nambo Aisalaeli ngimkiniŵawulaga jemanjajo, ligongo ŵakulongolela ŵawo ŵaliji ali alumbile kwa jemanjajo mu lina lya AMBUJE, Mlungu jwa Aisalaeli. Ŵandu wosope ŵadandawile kwa ŵakulongolela ya celeci, 19nambo ŵajanjile kuti, “Uwe tuŵisile cilanga* mwakulumbila kwa jemanjajo mu lina lya AMBUJE Mlungu jwa Aisalaeli. Sambano ngakomboleka kuti uwe twapwetece jemanjajo. 20Tukuŵajilwa kwaleka aŵe cijumi ligongo lya cilanga cetu; naga ngatukutenda myoyo, Mlungu tacitutumbilila uwe. 21Ŵalece aŵe umi, nambo kuti jemanjajo taŵe ŵakutukatila sasu ni kututecela mesi uwe.” Ayi ni yiŵaganisisye ŵakulongolelawo.

22Yoswa ŵalamwile kuti ayice nawo ŵandu ŵa ku Gibiyoni kwa jwalakwe, ni ŵawusisye jemanjajo, “Ligongo cici mwatulambwisye uwe ni kutusalila kuti mkutyocela kwakutalika, kutendaga mli mkutama kunokuno? 23Ligongo lyakuti mwatesile yeleyi, Mlungu amlwesisye. Ŵandu ŵenu taciŵa acikapolo ndaŵi syosope, tacikatanyaga sasu ni kutwicila mesi ga ku nyumba ja Mlungu jwangu.”

24Jemanjajo ŵajanjile kuti, “Bwana, uwe twatesile myiyi, ligongo ŵatulondecesye cenenepe kuti yaliji yakuwona kusyesyene kuti AMBUJE Mlungu jwenu ŵamlamulile jwakutumicila jwakwe Mose* kuti ŵape jemanja cilambo cosope cene nipo kuti ŵawulaje pameso pawo ŵandu ŵakutama mwelemo. Twatesile yeleyi ligongo twakwete woga ni jemanja; twajogopecesyaga umi wetu mnope. 25Sambano tuli m'myala mwawo; atende ni uwe yakuganisya kuti yili yambone.” 26Myoyo ayi ni yiŵayitesile Yoswa: jwalakwe ŵacinjilicisye jemanjajo nipo nginiŵakunda Aisalaeli kuti ŵawulaje. 27Nambo soni ndaŵi jijojo jwalakwe ŵasandwisye kuŵa acikapolo, kuti akateje sasu ni kutwicila mesi ga Aisalaeli ni ga pa malo pakupelecela mbopesi pa AMBUJE. Mpaka lelo jino apitilisyeje kupanganya gele masengoga ku malo gasagwile AMBUJE kuti ŵalambilejeko.

Currently Selected:

Yos 9: YAWO

Highlight

Copy

Compare