Yos 8

Kusumulidwa ni konanjidwa kwa msinda wa Ai

1AMBUJE* ŵatite kwa Yoswa, “Mwajigale asilikali wosope ŵene pamo ni m'mwe ŵakwe ni mjawule ku Ai. Ngajogopa kapena kwasa mtima. Tinjimtendesya jemanja kumpunda mwenye jwa ku Ai; ŵandu ŵakwe; msinda, ni cilambo tiyiciŵa yenu. 2Jemanja mwutende msinda wa Ai ni mwenye jwakwe, yimwatesile ku Yeliko ni mwenye jwakwe, nambo aji ndaŵiji mkukomboleka kusunga katundu jwakwe ni yilangwa kuti tiyiŵe yenu. Mlilinganye kuwutanda msindawo mwakusisimusya kutyocela kunyuma.”

3Ni Yoswa ŵaliŵicile cile kwawula ku Ai ni asilikali ŵakwe wosope. Ŵajigele ŵa ngondo ŵakwadalila mnope ŵakwana 30,000 ni ŵatumisye cilo 4ni malamusi aga: “Jemanja mkajuŵe ku mbali jine ja msinda, nambo ngaja kuwutalicila mnope, mkaŵe ŵa cile kumenyana ngondo ni ŵandu ŵa mu msindamo. 5Une pamo ni ŵandu ŵangu tuciyika ku msindako. Ŵandu ŵa ku Ai pitaciyikaga kukututanda, uwe tucigalawuka ni kuwutukaga, mpela mutwatendele ndaŵi jandanda. 6Jemanjajo tacitukuya uwe mpaka tuli twakopwesye mu msindamo. Pelepo taciganisya kuti uwe tutenda kwatila jemanjajo, mpela mutwatendele kala. 7Myoyo jemanja tacikopoka kutacijuŵako ni kuwusumula msindawo. AMBUJE Mlungu jwenu taciwupeleka kwa jemanja. 8Panyuma pa kuwujigala msindawo, awujoce ni moto, mpela mwalamulile AMBUJE. Gelega ni malamusi gawo.” 9Nipo Yoswa ŵatumisye, nipo ŵajawile ku malo gawo gakuŵa ni kwembeceyaga kweleko, kungapilo lyuŵa kwa msinda wa Ai, pasikati pa msinda wa Ai ni Beteli. Yoswa ŵagonile ku cigono.

10Yoswa ŵalaŵilile kwimuka kundaŵindaŵipe ni ŵaŵilasile asilikali wosope pamo. Myoyo jwalakwe ni ŵakwalongolela Aisalaeli ŵalongolele ulendo wa ku Ai. 11Asilikali wosope pamo ni jwalakwe ŵajawile mbali jakulungama pa cipata cakwinjilila mu msindamo ni ŵataŵile matenti ca kumpoto kwakwe, ni ku ciŵata pasikati pa jemanjajo ni msinda wa Ai. 12Jwalakwe ŵajigele acalume ŵakwana ciŵandika 5,000 ni ŵaŵisile mwakwasisa kungapilo lyuŵa kwa msinda, pasikati pa Ai ni Beteli. 13Asilikali ŵala ŵasalile kuti aŵe cile kuputa ngondo ni likuga lyekulungwa lya asilikaliwo lilyataŵile malo ga yigono yawo kumpoto kwa msinda nipo acalume ŵane wosope ŵene kungapilo lyuŵa. Yoswa ŵagonile m'ciŵatamo. 14Mwenye jwa ku Ai piŵaweni acalume ŵa Yoswa, ŵajangwiye kwacingamila. Jwalakwe ni acalume ŵakwe ŵajile ku Ciŵata ca Yolodani kukuputa ngondo ni Aisalaeli pa malo galagala mpela mwakala, ngamanyilila kuti Aisalaeli tiŵatande jemanjajo kutyocela kunyuma. 15Yoswa ni ŵandu ŵakwe ŵawanicisye mpela akuwujila, ni ŵatililaga ku cipululu. 16Acalume wosope ŵa mu msindamo ŵaŵilasile pamo kuti ŵakuye jemanjajo, nipo piŵamtoposyaga Yoswa, ŵaliji mkupitilisya kutalikangana nawo msindawo. 17Jwamlume jwalijose jwa ku Ai ŵawutucile Aisalaeli, nipo msinda ŵawulesile uli wewugule, pali pangali jwalijose jwakuwucinjilicisya.

18Kaneko AMBUJE ŵatite kwa Yoswa, “Lanjilani lipanga lyenu ku Ai; ligongo tinawupelece msindawo m'myala mwenu.” Nipo Yoswa ŵatesile mpela muŵasalilemo, 19ni piŵagambile kunyakula ligasa lyakwe, acalume ŵiŵaliji mkuŵa ŵala ŵanyakwice mwacitema, ŵawutucile mu msindamo ni kuwusumula. Ndaŵi jijojo ŵawujocile moto msindawo. 20Acalume ŵa ku Ai piŵalolite kunyuma, ŵaliweni lyosi lilimkwela kwinani. Paliji pangali litala lyakuti jemanjajo atilile, ligongo Aisalaeli ŵiŵatililaga ku cipululu ŵala ŵagalawucile sambano ni kumenyana nawo. 21Yoswa ni acalume ŵakwe piŵaweni kuti acimjawo ŵala ajigele msindawo ni kuwujoca moto, ŵatandite kwawulaga acalume ŵa ku Ai. 22Aisalaeli ŵa mu msinda ŵala ŵatulwice sambano kukuputa nawo ngondojo. Myoyo acalume ŵa ku Ai ŵagambile kusisimucila kuti asyungulilidwe ni Aisalaeli, nipo wosope ŵene ŵawulajidwe. Pangali jumo juŵatisile, soni pangali jumo juŵakulupwice, 23akaŵe mwenyepe jwa ku Ai. Jwalakwe ŵamkamwile ni kwawula najo kwa Yoswa.

24Aisalaeli ŵamwuleje jwalijose jwa amagongo ku cipululu kuŵatopocesyaga kula. Kaneko ŵawujile ulendo kuja ku Ai nipo ŵamwuleje jwalijose kweleko. 25-26Yoswa ŵapitilisye kulosya lipanga lyakwe ku Ai nipo nginaliŵika pasi mpaka mundu jwalijose kweleko ali awulajidwe. Acalume ni acakongwe wosope ŵakutama mu msinda wa Ai ŵiŵawulajidwe pa lyele lisikulyo ŵakwanile 12,000. 27Aisalaeli ŵalisalacisye acimsyene yilangwa ni katundu juŵasumwile mu msindamo, mpela AMBUJE muŵamsalilile Yoswa. 28Yoswa ŵajocile msinda wa Ai ni kuwuleka msindawo wepasuce. Uli ciŵela myoyo mpaka lelo jino. 29Yoswa ŵamkolece mwenye jwa mu msinda wa Ai pa citela ni kucileka cilu cakwe papopo mpaka ligulo. Pilyakapilaga lyuŵa, Yoswa ŵalamwile kuti awutyosye mtembowo, ni ŵawugwicisye pasi pa cipata cakwinjilila mu msinda. Mtembowo ŵawuwunjicile liwunjili lya maganga gamakulungwa, liwunjililyo lili cimile papopo mpaka sambano jino.

Malamusi akugaŵalanga pa Litumbi lya Ebala

30Kaneko Yoswa ŵataŵile malo ga kupelecela mbopesi kwa AMBUJE, Mlungu jwa Aisalaeli petumbi lya Eba.#Det 27:2-8 31Malogo ŵagapanganyisye mpela muŵaŵecetele Mose,* jwakutumicila jwa AMBUJE, yiŵapele Aisalaeli, mpela mugakuŵecetela malamusi ga Mlungu kupitila mwa Mose: “Pakupelecela mbopesi pakulinganya ni maganga gangasepa ni yida ya yisyano.” Pelepo ŵapelece kwa AMBUJE mbopesi syakutinisya, nipo soni ŵapelece mbopesi syawo sya mkamulano.#Eks 20:25 32Pelepo, Aisalaeli ali mkulola, Yoswa ŵapanganyisye pa maganga kope ja Malamusi giŵalembile Mose. 33Aisalaeli, ni ŵakulongolela ŵawo, acakulungwa ŵa ngondo ni ŵakulamula, atamose acalendo wa pasikati pawo, ŵajimi mbali siŵili sya Libokosi lya Cilanga ca AMBUJE, kulolegana ni ŵakutaga mbopesi ŵa ci Lefi ŵiŵalinyakwilewo. Hafu ja ŵandu ŵajimi ali agalawucisye nyuma syawo ku Litumbi lya Gelisimu ni litika linelyo nyuma syawo sili sigalawucile ku Litumbi lya Eba. Mose jwakutumicila jwa AMBUJE ŵaliji ali ŵalamwile jemanjajo kutenda yeleyi pijayice ndaŵi jakuti apocele upile.#Det 11:29; 27:11-14 34Panyuma pakwe Yoswa ŵaŵalasile mwakwesya malamusi gosope gene, kupwatika ya upile mpaka ya kulwesa yakwe, mpela muŵagalembele m'buku ja Malamusijo. 35Lililyose lya Malamusi ga Mose lyaŵalanjidwe ni Yoswa ku msongano wosopewo, uwakwete acakongwe ni ŵanace mpaka acalendo ŵakutama pasikati pawo.

Currently Selected:

Yos 8: YAWO

Highlight

Copy

Compare