Yos 10
10
Aamoli apundidwe pa ngondo
1Adonisedeki mwenye jwa Yelusalemu, ŵapikene kuti Yoswa ŵaliji ali asumwile ni kuwujonanga mnope msinda wa Ai nipo ŵaliji ali amwuleje mwenye jwakwe, mpela muŵatendele ni Yeliko ni mwenye jwakwe. Jwalakwe ŵapikene soni kuti ŵandu ŵa ku Gibiyoni ŵakamulene ya mtendele ni Aisalaeli nipo ŵaliji mkutama pasikati pawo. 2Ŵandu ŵa ku Yelusalemu ŵajogwepe pacele cinduci ligongo Gibiyoni waliji umo wa misinda jajikulungwa uwakwete mwenye; waliji wawukulungwa kupunda Ai, nipo acalume ŵakwe ŵaliji ŵakumanyilila kuputa ngondo. 3Myoyo Adonisedeki ŵatumisye mtenga wakuyicisyawu kwa Mwenye Hohamu jwa ku Hebuloni, Mwenye Pilamu jwa ku Yalamuti, Mwenye Yafiya jwa ku Lakishi, ni kwa Mwenye Debili jwa ku Egiloni: 4“Ayice angamucisye kumenyana ni Gibiyoni, ligongo ŵandu ŵakwe apanganyisye mtendele ni Yoswa ni Aisalaeli.” 5Ŵele ayimwene msano ŵa Aamoliŵa, ayimwene ŵa ku Yelusalemu, Hebuloni, Yalamuti, Lakishi, ni Egiloni, ŵapwatikenye ŵa ngondo ŵawo, kuwusyungulila msinda wa Gibiyoni, ni kumenyana nawo.
6Acalume ŵa ku Gibiyoni ŵatumisye maloŵe kwa Yoswa ku cigono ku Giligala: “Akasatuleka uwe, bwana! Ayice mwakwanguya nipo atukamucisye! Atukulupusye uwe! Ayimwene wosope wene ŵa Aamoli ŵakutama ku cilambo ca kwitumbi apwatikenye ŵa ngondo nipo atutandite uwe!”
7Myoyo Yoswa ni ŵa ngondo ŵakwe wosope, ni asilikali ŵakumanyilila mnope ngondo ŵakwe, ŵawutandite ulendo kutyocela ku Giligala. 8AMBUJE* ŵatite kwa Yoswa, “Mkasimwajogopa jemanjajo. Une nimpundisye kalape mwakuti timwapunde. Pangali jumo jwa jemanjajo jutacipakombola kwima pasogolo penu.” 9Cilo cosope cene Yoswa ni asilikali ŵakwe ŵajesile kutyocela ku Giligala kwawula ku Gibiyoni, ni ŵajile kukwatanda Aamoli mwakwasisimucisya. 10AMBUJE ŵatendesye Aamoli woga ni kubalalika pameso pa ŵangondo ŵa ku Isalaeli. Aisalaeli ŵawuleje ŵane ŵa jemanjajo ku Gibiyoni, ni kwatopocesya ŵanewo kwiŵanda kwa litumbi pa cikwesya ca Beti Holoni, kupita mcimenyana nawope mpaka ca kum'mwela ku Aseka ni Makeda. 11Aamoli piŵawutukaga kuselelecela mwiŵanda mwa litumbi kupitila ku Beti Holoni kwatila ŵa ngondo ŵa ku Isalaeli, AMBUJE ŵagatendesye maganga gamakulungwa ga matalila kutyocela kwinani kuti gagwile jemanjajo mwitala mosope mpaka ku Aseka. Ŵajinji gawuleje magangago kupunda ni ŵele ŵakuwulajidwa ni Aisalaeli.
12Pa lisiku liŵapundisye AMBUJE acalume ŵa ku Isalaeli kwa Aamoli, Yoswa ŵaŵecete kwa AMBUJE. Pameso pa Aisalaeli jwalakwe ŵatite,
“Lyuŵa, liŵe cimile penani pa Gibiyoni;
Mwesi, ujime penani pa Ciŵata ca Aiyaloni.”
13Lyuŵa lyaliji cimile nipo mwesi nganiwujenda mpaka mtundu wa Aisalaeli piŵapundile amagongo ŵawo. Ayi yilembedwe mu Buku ja Yasala. Lyuŵa lyaliji cimile pa cilikati kwinani nipo nganilikapila kwa lisiku lyosope.#2 Sam 1:18 14Nganilipagweje lisiku mpela lyele ni kala kose nambo soni kutandila pelepo, pangali piŵajanjile AMBUJE lipopelo lya mundu camti myoyo. AMBUJE ŵaliji mbali jimo ni Aisalaeli pakuputa ngondo!
15Panyuma pa kwapunda Aamoli, Yoswa ni ŵa ngondo ŵakwe ŵawujile ku cigono ku Giligala.
Yoswa akukamula ni kwawulaga ayimwene msano ŵa Aamoli
16Ayimwene msano ŵa Aamoli ŵala, ŵaliji ali atisile nipo ŵaliji mkuŵa mu mbanga ku Makeda. 17Mundu jwine ŵasimene jemanjajo, nipo ŵamsalile Yoswa kuŵajuŵagako. 18Jwalakwe ŵatite, “Agundumucisye maganga gamakulungwa pa mlango wa mbangajo. Ŵaŵice alonda ŵane pelepo, 19nambo jemanja mkatama pelepo. Ŵatoposyeje amagongo ŵawo nipo ŵatandeje kutyocela kunyuma ngakunda kutilila ku misinda jawo! AMBUJE Mlungu jwa Aisalaeli ŵapelece amagongowo m'myala mwa jemanja.” 20Yoswa ni acalume ŵa ku Isalaeli ŵasikite jemanjajo, atamose kuti ŵane ŵapakombwele kupata kwakutilila mkati mwa mapupa ga msinda nipo nganiŵawulaga. 21Kaneko acalume wosope ŵa Yoswa ŵawujile cenenepe kwa jwalakwe ku cigono ku Makeda.
Pangali jumo mcilambomo jwakawanicisye namuno kuŵeceta yakusisyana ni Aisalaeli.
22Kaneko Yoswa ŵatite, “Awugule pakwinjilila mu mbangapo, ni ŵakoposye ayice nawo ayimwene msanowo kwa une.” 23Myoyo mbangajo ŵajiwugwile nipo ayimwene ŵa Yelusalemu, Hebuloni, Yalamuti, Lakishi ni Egiloni ŵakopwesye 24ni kwajigalila kwa Yoswa. Myoyo Yoswa ŵaŵilasile acalume wosope ŵa ku Isalaeli ni ŵalamwile acakulungwa ŵa ngondo ŵiŵapite ni jwalakwejo kuti ayice ni ngosi sya ayimwenewo. Ni ŵatesile myoyo. 25Myoyo Yoswa ŵatite kwa acakulungwa ŵa ngondo ŵakwe, “Akajogopa kapena kwasa mtima. Aŵe ŵamacili ni ŵakulimba mtima ligongo ayi ni yitaciyitenda AMBUJE pa amagongo ŵawo wosope.” 26Kaneko Yoswa ŵawuleje ayimwene ŵala ni kwakoleka pa yitela msano, piyatemi yilu yawo mpaka ligulo. 27Pilyakapilaga lyuŵa Yoswa ŵalamwile kuti ŵatulusye ayimwenewo pa yitelapo, nipo yilu yawo ŵayitulwisye ni kuyiponya mu mbanga mulamula muŵajuŵile pandanda mula. Maganga gamakulungwa ŵagaŵisile pakwinjilila mu mbangamo, nipo gali ciŵela papopo.
Yoswa akusumula soni upande wine wa Aamoli
28Yoswa ŵajitandite ngondo ni kusumula Makeda ni mwenye jwakwe lyele lisikulyo. Ŵamwuleje jwalijose mu msindamo; pangali jumo juŵamlesile jwacijumi. Jwalakwe ŵatesile kwa mwenye jwa ku Makeda yiŵatesile kwa mwenye jwa ku Yeliko.
29Panyuma pa yeleyi, Yoswa ni ŵa ngondo ŵakwe ŵapitilisye kwawula kukuputa ngondo ku Libina kutyocela ku Makeda. 30AMBUJE ŵapundisye soni Aisalaeli pa wele msindawu ni mwenye jwakwe. Nginamleka jwa umi jwalijose, nambo ŵawuleje wosope ŵene mwelemo. Ŵatesile kwa mwenyejo mpela yiŵatesile kwa mwenye jwa Yeliko.
31Panyuma pa yeleyi, Yoswa ni ŵa ngondo ŵakwe ŵajawile ku Lakishi kutyocela ku Libina, ŵawusyungulile ni kuwutanda. 32AMBUJE ŵapundisye Aisalaeli pakuwupunda msinda wa Lakishi pa lisiku lya lyaŵili lya ngondojo. Mpela muŵatendele ku Libina, nginamleka jwa umi jwalijose, nambo ŵawuleje wosope ŵene mu msindamo. 33Mwenye Holamu jwa Gesele ŵayice kukuwukamucisya msinda wa Lakishi, nambo Yoswa ŵampundile jwalakwejo ni ŵa ngondo ŵakwe nipo nginamleka jwa cijumi ni jumo jose.
34Kaneko, Yoswa ni ŵa ngondo ŵakwe ŵajawile ku Egiloni kutyocela ku Lakishi, ŵawusyungulile ni kuwutanda msindawo. 35Ŵawusumwile lisiku lilyolyo ni kumwulaga jwalijose mwelemo, mpela muŵatendele ku Lakishi.
36Panyuma pa yeleyi, Yoswa ni ŵa ngondo ŵakwe ŵakwesile m'matumbi kwawula ku Hebuloni kutyocela ku Egiloni, ŵajile kuwutanda 37ni kuwusumula msindawo. Ŵamwuleje mwenye ni jwalijose mu msindamo nambo soni kusumula misinda jajinandi jakuŵandicila ni kwawulaga ŵandu wosope ŵene mwelemo. Yoswa ŵasalile ŵandu ŵakwe kuti, awujonanje msindawo mnope, mpela muŵawujonanjile msinda wa Egiloni pakumwulaga jwalijose mwelemo.
38Yoswa ni ŵa ngondo ŵakwe ŵawujile ulendo ku Dibili kukuwutanda msindawo. 39Ŵawusumwile, ni mwenye jwakwe ni misinda jakuŵandicila. Jemanjajo ŵamwuleje jwalijose kweleko. Yoswa ŵatesile kwa Dibili ni mwenye jwakwe yiŵayitesile ku Hebuloni ni ku Libina ni mwenye jwakwe.
40Yoswa ŵacipundile cilambo cosope cene. Ŵapundile ayimwene ŵa cilambo ca ku matumbi, mwakutuluka mwa kungopoko lyuŵa, ni mwiŵanda mwa matumbi kungapilo lyuŵa, yalumo soni ni ŵele ŵa ku cilambo ca ku matumbi kum'mwela. Nginamlecela umi jwalijose; nambo ŵawuleje wosope ŵene. Yeleyi ni yiŵalamwile AMBUJE Mlungu jwa Aisalaeli. 41Yoswa ŵapundile jemanjajo kutyocela ku Kadeshi Baneya kum'mwela mpaka ku Gasa ciŵandika ni kungulugulu nyasa, pamo ni mbali josope ja Gosheni, nipo mpaka ca kumpoto ku Gibiyoni. 42Yoswa ŵapundile ayimwene wosopeŵa ni maupande gawo mu ndaŵi jimo ligongo AMBUJE, Mlungu jwa Aisalaeli, ŵaliji mkwaputila ngondo Aisalaeli. 43Panyuma pa yeleyi, Yoswa ni ŵa ngondo ŵakwe ŵawujile kuja ku cigono ku Giligala.
Currently Selected:
Yos 10: YAWO
Highlight
Copy
Compare
Share
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
