Yos 7
7
Ulemwa wa Akani
1Lilamusi lya AMBUJE* kwa Aisalaeli kuti ku Yeliko akajigalako cilicose cicaliji cakuti acijonanje nganalipikanila. Mundu jwine lina lyakwe Akani nginalipikanila lyele lilamusilyo, myoyo AMBUJE ŵatumbilile Aisalaeli. (Akani ŵaliji mwanace jwa Kalimi soni ŵaliji cisukulu ca Sabidi, nipo ŵaliji jwa mtundu wawunondi wa Sela, jwa lukosyo lwa Yuda).
2Yoswa ŵatumisye acalume ŵane kutyocela ku Yeliko kwawula ku Ai, msinda wa kungopoko lyuŵa kwa Beteli, ciŵandika ni Beti Afeni, ni malamusi gakuti ajawule ni akacijendelele cilamboco. Piŵatesile myoyo, 3jemanjajo ŵajile kukulondesya kwa Yoswa: “Pangali cakwawulila jwalijose kukuwutanda msinda wa Ai. Kwamba kutumisya acalume 2,000 kapena 3,000 basi. Ngatumisya asilikali wosope ŵene kukuputa ngondo iyayi; pakuti uli msinda wawunandi.” 4Myoyo Aisalaeli ciŵandika 3,000 ni ŵiŵajile kukuwutanda msindawo, nambo ŵatisile. 5Acalume ŵa ku Ai ŵatopwesye kutyocela pa cipata ca msindawo ulendo nawo kwakuselelecela litumbi kuŵawuleje Aisalaeli 36 mpaka kwika nawo ku Sebalimu ku malo kwakasila maganga. Kulimba mtima kwa Aisalaeli kwamalile papopo nipo wakamwile woga. 6Yoswa ni acimlongola wosope wa Aisalaeli ŵapapwile yakuwala yawo mwa canasa, ŵaligwisisye pasi pasogolo pa Libokosi lya Cilanga lya AMBUJE, ni ŵagonile pelepo mpaka cilo, ali alitasile luwundu m'mitwe mwawo kulosya canasa cawo. 7Nipo Yoswa ŵatite, “AMBUJE jwa ŵandu wosope! Ligongo cici mtujombwecesye Lusulo lwa Yolodani? Ana akutupeleka myala mwa Aamoli kuti atujonanje camti myiyi? Uli ngagamba kutuleka kuti tutame lisi lila lila lya Lusulo lwa Yolodani? 8O! AMBUJE, tinapakombole kuŵeceta cici, pakuŵa Aisalaeli atoposyedwe ni amagongo ŵawo? 9Akenani ni jwalijose mcilambo muno jutapikana yeleyi, tacitusyungulila uwe ni kutuwulaga jwalijose jwa uwe! Nipo tacitenda uli AMBUJE kuti awucinjilicisye ucimbicimbi wawo?”
10AMBUJE ŵatite kwa Yoswa, “Jimukani! Ligongo cici mkugona pasi camti myiyi? 11Aisalaeli atesile ulemwa!* Akasile cilanga* ciŵatesile ni une cinalamwile kuti acisunje. Ajigele yine mwa yindu yakusakala yakuti ayijonanje. Ŵayijiŵile, ŵalambwisye pa yeleyo, ni kuyiwanganya pamo ni yindu yawo. 12Ali ni ligongo lyakwe Aisalaeli ngaŵa mkupakombola kwima pameso pa amagongo ŵawo. Akwatila amagongo ŵawo ligongo jemanjajo atesile yakusakala yakuŵajilwa konanjidwa! Ngisimba ni jemanja soni mpaka mli mjonasile yindu yimwalamulidwe kuti mkayijigala! 13Jimukani! Mwaswejesye ŵanduwo soni alilinganye cile kuti ayice pasogolo pangu. Mwasalile kuti taŵe cile malaŵi, ligongo une, AMBUJE Mlungu jwa Aisalaeli, ngwete ayi yakuti mbecete: ‘Aisalaeli, mu katundu jwenu mkwete yindu yine yinamlamwile kuti myijonanje! Jemanja ngaŵa mkupakombola kwima mwakusisyana ni amagongo ŵenu akaŵe mli mtyosisye yele yinduyi!’ 14Ni mwasalile kuti kundaŵi tasongane ciŵandika ni malo gakulambila. Timyiceje pasogolo lukosyo ni lukosyo nipo AMBUJE tacisala lukosyo lutesile ulemwa. Kaneko maŵasa ga mlukosyo lwelelo gakwenela kwika pasogolo nipo AMBUJE tacisala liŵele litesile ulemwalyo. Maŵasa gakutyocela m'maŵele gelego gakusosekwa kwika pasogolo, nipo AMBUJE tacisala ulemwa wa liŵasalyo. Kaneko acalume ŵa mwiŵasa lyelelo akwenela kwika, 15nipo AMBUJE tacisala juŵajiŵile katundu jwakaŵajilwe konasika tacijocedwa, pamo ni liŵasa lyakwe ni cilicose cakwete, pakuŵa ŵatesisye soni syakogoya Aisalaeli nipo akasile cilanga cangu.”
16Kundaŵi kwakwe Yoswa ŵayice nawo Aisalaeli peswela mwakulaŵilila, mtundu ni mtundu, nipo lukosyo lwa Yuda lwajigelwe. 17Jwalakwe ŵayice nalo lukosyo lwa Yuda kwa AMBUJE, AMBUJE ŵalosisye kuti mtundu wa Sela watesile ulemwa. Kaneko ŵayice najo mlongola jumo jumo kwa AMBUJE nipo AMBUJE ŵalosisye kuti liŵasa lya Sabidi lyatesile ulemwa. 18Pambesi pakwe Yoswa ŵayice ni jwamlume jwalijose mwiŵasa lya Sabidi, nipo AMBUJE ŵalosisye kuti Akani mwanace jwa Kalimi ŵiŵaliji ŵakulemwa mnope. 19Yoswa ŵatite kwa jwalakwe, “Mwanangu, salani yakuwona apano pameso pa AMBUJE, Mlungu jwa Aisalaeli, nipo ŵecetani. Musalile une sambano yimtesile m'mwejo. Mkalinga kusisila une.” 20Akani ŵajiticisye kuti, “Yakuwona, ndesile ulemwa mwakusisyana ni AMBUJE, Mlungu jwa Aisalaeli, nipo yeleyi ni yinatesile. 21Mwa yindu yitwasumwile nawuweni mkanjo wakusalala wa ku Babiloniya, ni makilogalamu gaŵili ga silifa,* ni mtinda wa golidi* wakusitopa kupunda litika lya kilogalamu jimo. Nayisakaga mnope mwakuti nayijigele. Takombolece kuja kuyisima na mkati mwa tenti jangu mwele munayisisile. Pasi pa yindu yineyo, takasimanemo soni silifa.”
22Ni Yoswa ŵatumisye acalume ŵane, ŵiŵawutucile ku tentiko kuŵajile kusimana kuti yindu yakonasikayo ŵayisilile mwelemo, ni silifa pasi pakwe. 23Ŵayikopwesye mu tentimo, ni kwawula nayo kwa Yoswa ni Aisalaeli wosope, nipo ŵayiŵisile pasi pameso pa AMBUJE. 24Yoswa, pamo ni Aisalaeli wosope, ŵamkamwile Akani, silifajo, mkanjowo, ni mtinda wa golidiwo, yalumo ni ŵanace ŵa Akani ŵacalume ni ŵacakongwe ŵakwe, ng'ombe syakwe, acibulu ŵakwe, ni ngondolo, tenti jakwe, ni yosope yene yiŵakwete; ni ŵayijigalile ku Ciŵata ca Yisawusyo. 25Nipo Yoswa ŵatite kuti, “Ligongo cici m'mwejo mtujigalile uwe yisawusyo? AMBUJE sambano tacimjigalila m'mwejo yisawusyoyi!” Myoyo ŵandu wosope ŵene ŵamsomile Akani ni maganga mpaka kuwa; ŵalisomile soni liŵasa lyakwe ni kuyijoca yindu yawo yosope. 26Ŵawunjice liwunjili lyalikulungwa lya maganga pa Akaniwo, liwunjili lili kweleko mpaka sambano jino. Ni ligongo lyakwe gele malogo gakusakolanjidwa kuti Ciŵata ca Yisawusyo.
Kaneko AMBUJE ŵalesile kutumbila.
Currently Selected:
Yos 7: YAWO
Highlight
Copy
Compare
Share
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
