Yos 6
6
Kugwa kwa msinda wa Yeliko
1Acalume ŵa mu Yeliko ŵawugele yipata ya msinda ni kulondelaga kwamti Aisalaeli ngimkinajinjila kose. Pangali jwalijose jwakajinjile kapena kukopoka mu msindawo. 2AMBUJE* ŵatite kwa Yoswa, “Ngupeleka m'myala mwenu msinda wa Yeliko, ni mwenye jwakwe ni acalume ŵakwe ŵa ngondo. 3M'mwejo ni asilikali ŵenu mjendeje kuwusyungulila msindawo kamo lisiku lililyose kwa masiku msano ni limo. 4Ŵakutaga mbopesi msano ni ŵaŵili, jwalijose ali anyakwile lipenga, tajawule pasogolo pa Libokosi lya Cilanga. Pa lisiku lya msano ni gaŵiligo m'mwejo ni asilikali ŵenu timjendeje kuwusyungulila msindawo kakwanila kasano ni kaŵili aku ŵakutaga mbopesi ŵala ali mkugomba malipenga gala. 5Kaneka tagombe maloŵe gamo ndaŵi jelewu. Pitimcigamba kugapikanapo, ŵandu wosope tagumile yakulimba, nipo lipupa lya msinda tilicigwa. Myoyo ŵandu wosope tacijawula kukwinjila mu msindamo.” 6Yoswa ŵasonganyisye ŵakutaga mbopesi wosope ni ŵasalile kuti, “Ajigale Libokosi lya Cilanga, nipo msano ni ŵaŵili ŵa jemanja ajawule pasogolo pakwe, ali anyakwile malipenga.” 7Ni ŵalamwile ŵanduwo kuti atande kwenda mwakuwusyungulila msindawo, nipo ŵakundile acalume ŵa ngondo kuti ajawule pasogolo pa Libokosi lya Cilanga ca AMBUJE.
8-9Myoyo, mpela muŵalamulile Yoswa, acalume ŵa ngondowo ŵatandite kwawula pasogolo pa ŵakutaga mbopesi, ŵiŵagombaga malipenga; ku nyuma kwawo kwayice ŵakutaga mbopesi ŵakunyakula Libokosi lya Cilanga, ŵiŵakuyisye asilikali ŵa ku nyuma. Ndaŵi josopeji ŵaliji ali mkugomba malipenga. 10Nambo Yoswa ŵalamwile ŵandu ŵala kuti akagumila, akaŵeceta atamose liloŵe mpaka jwalakwe ali alamwile. 11Myoyo ŵalisalile lyele likuga lya acalumeli kuti ajigale Libokosi lya Cilanga ni kusyungulila nalyo msinda kamo. Kaneko ŵawujile ku cigono ni ŵagonile kukoko.
12-13Yoswa ŵalaŵile kwimuka kundaŵi kwakwe, nipo ŵakutaga mbopesi ni asilikali ŵala ŵajesile kuwusyungulila msinda kwa ndaŵi jaŵili mwakulandana ni muŵatendele lisiku lyandanda: pandanda asilikali; kaŵili ŵakutaga mbopesi msano ni ŵaŵili ŵagomba malipenga msano ni waŵili; kaneko, ŵakutaga mbopesi ŵakunyakula Libokosi lya Cilanga ca AMBUJE; nipo pakumalisya asilikali ŵakukuya panyuma. Jele ndaŵi josopeji ŵaliji ali mkugomba malipenga. 14Pa lisiku lyaŵilili ŵajesile soni mwakuwusyungulila msindawo kamo nipo ŵawujile ku cigono. Ŵayitesile yeleyi kwa masiku msano ni limo. 15Naga piŵaliji umi Pa lisiku lya msano ni gaŵili, ŵajimwice kundaŵi pikwacele ni ŵajesile kakwana kasano ni kaŵili ali mkusyungulila msindawo mwakulandana, lyeleli lyaliji lisiku lilyolyo pelyo liŵajesile mwakuwusyungulila kasano ni kaŵili. 16Ndaŵi jiŵasyungulile kamsano ni kaŵili, ali asigele panandi ŵakutaga mbopesi kuti agombe malipenga, Yoswa ŵalamwile ŵandu ŵala kuti agumile, nipo ŵatite, “AMBUJE ampele jemanja msinda! 17Msinda ni yosope yene yili mwelemo ŵandu ni yinyama yakwe yikuŵajilwa konasika mpela mbopesi ja kwa AMBUJE. Nambo Lahabu jwa cigwagwa pamo ni liŵasa lyakwe takulupusidwe, ligongo jwalakwe ŵasisile ŵandu ŵetu ŵakusonda. 18Nambo mkasajigala cilicose cakuti ticijonasice; naga mkutenda myoyo, timyicisye yisawusyo ni conasiko pa cigono ca Aisalaeli. 19Cilicose ciŵacipanganyisye ni silifa,* golidi,* bulonsi, kapena cisyano ca ayiloni yiŵicidwe pa mbali kuyisagula pakuŵa yili ya AMBUJE. Yijawule mu msaku wa cipanje ca AMBUJE.”
20Ŵakutaga mbopesi ŵagombile malipenga, nipo ŵanduwo piŵagambile kupikana, ŵagumisile, nipo lipupa lyagwile. Myoyo ŵandu wosope ŵajile kukwela litumbi mu msindamo nipo ŵawusumwile.#Aheb 11:30 21Ŵamwuleje jwalijose mu msindamo ni mawupanga gawo, acalume ni acakongwe, ŵanace ni ŵacekulupe ŵakwe. Ŵawuleje soni ng'ombe, ngondolo ni acibulu.
22Yoswa ŵasalile ŵandu ŵaŵili ŵiŵatumicile mpela ŵakusonda ŵala kuti, “Mjawule ku nyumba kwa jwa cigwagwa jula mkamjigale pamo ni liŵasa lyakwe ni mkalikoposye mu msindamo, mpela mumwatendele cilanga* mula.” 23Myoyo ŵajawile kukumkoposya ni kwika najo Lahabu, pamo baba ni mamagwe, acalumbugwe, ni wosope ŵa mwiŵasa lyakwe. Ŵajigele wosope ŵene, ŵa liŵasa lyakwe kukwasunga ku malo gaciŵandika ni ku cigono ca Aisalaeli. 24Kaneko ŵawupambile moto msindawo ni ŵawujocile wosope wene, ni yosope yene yiyaliji mwelemo, kwamba kutyosya yindu yiŵapanganyisye ni golidi, silifa, bulonsi, ni ayiloni, yiŵayijigele ni kuja kukuyiŵika mu msaku wa cipanje ca AMBUJE. 25Nambo Yoswa ŵawukulupwisye umi wa Lahabu jwa cigwagwa ni acalongo acimjakwe wosope ŵene, ligongo ŵasisile ŵandu ŵaŵili ŵakusonda ŵiŵatumisye ku Yeliko. (Ŵandu ŵa mtundu ŵakwe aŵele ali mkutama mu Isalaeli mpaka lelo jino).#Aheb 11:31
26Pa jele ndaŵijo Yoswa ŵaŵecete maloŵe gakulumbila kwa jemanjajo gakuti: “Jwalijose jutaciwanicisya kuwutaŵa soni msinda wa Yeliko taciŵa jwakulweseka pameso pa AMBUJE.#1 Ayi 16:34
Jwalijose jutaciŵika yilimbilimbi taciwulajisya mwanace jwakwe jwandanda kupagwa;
Jutacitaŵa yipata taciwulajisya mwanace jwakwe jwakumalicisya kupagwa.”
27Nipo AMBUJE ŵaliji ni Yoswa, nipo kupikanika kwakwe kwajenele cilambo cosope.
Currently Selected:
Yos 6: YAWO
Highlight
Copy
Compare
Share
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
