Yos 20

Yoswa akusagula misinda jakutilila mundu jwawuleje mjakwe mwangosi

(Num 35:9-34)

1Kaneko AMBUJE* ŵatite kwa Yoswa,#Num 35:9-34; Det 4:41-43; 19:1-13 2“Ŵecetani kwa ŵandu ŵa ku Isalaeli, ‘Asagule misinda jakutilila, jinamlamwile Mose* kuti amsalile jemanja. 3Mundu jwawuleje mjakwe mwa ngosi akukomboleka kwawula kweleko ni kumtila jwele jwakumsosa kuti amwucisyejo. 4Kanga jwamlume kapena jwamkongwe akukomboleka kutilila ku umo wa jele misindaji, ajawule ku malo gakulamulila magambo pa cipata cakwinjilila mu msinda, ni mkalongosole magambo gakwego kwa acakulungwa ŵa mu msindamo; ni jemanjajo tacimjigala jwalakwejo kwawulaje najo mu msinda, nipo tacimpa malo, ni kutamaga najo mu msindamo. 5Naga jwakusosa kuwucisya akwakuya jemanjajo kukoko, ŵandu ŵa mu msindawo ngakuŵajilwa kwapeleka jemanjajo kwa ŵelewo. Nambo akuŵajilwa kwacinjilicisya ligongo ŵawuleje mundujo mwangosi ngaŵa mwakupsya mtima. 6Atame mu msindamo mpaka ali alamulidwe panganya soni mpaka pa ndaŵi ja ciwa ca jwali jwamkulungwa jwa ŵakutaga mbopesi* jwa jele ndaŵijo: ni jwakuwulagajo akukomboleka kwawula soni kumangwakwe, ni ku musi kuŵatyosile mwakutila kula.’ ”

7Myoyo, ku mbali ja kungapilo lyuŵa kwa Lusulo lwa Yolodani Aisalaeli ŵatyosisye Kedeshi ku Galileya, mcilambo ca kwitumbi ca Nafutali; nipo Shekemu, mcilambo ca kwitumbi ca Efelemu, ni Kiliyati Alaba (jijili Hebuloni) mcilambo ca kwitumbi ca Yuda. 8Nipo kungopoko lyuŵa kwa Yolodani, pa cawe ca mcipululu Aisalaeli ŵasagwile Besala, kungopoko lyuŵa kwa Yeliko mu upande wa Lubeni; nipo Lamoti ku Giliyadi, mu upande wa Gadi; ni Golani ku Bashani, mu upande wa Manase. 9Jeleji ni misinda jakutilila jiŵasagulile Aisalaeli wosope ŵene pamo ni mlendo jwalijose jwakutama pasikati pawo. Jwalijose juŵawuleje mundu mwangosi ngaŵaga mwa mele akukomboleka kutilila kweleko, kuti akasawulajidwa ni mundu jwakusosa kuwucisya, mpaka ali alamulidwe panganya.

Currently Selected:

Yos 20: YAWO

Highlight

Copy

Compare