Yos 21

Misinda ja Alefi

1Ŵakulongolela ŵa maŵasa ga Alefi ŵajawile kwa Eliyesa jwakutaga mbopesi, Yoswa mwanace jwa Nuni, ni kwa ŵakulongolela ŵa maŵasa ga mitundu josope ja Isalaeli. 2Ku Shilo mcilambo ca Kenani ŵakulongolela ŵa maŵasa ga Alefi ŵatite kwa jemanjajo, “AMBUJE* ŵalamwile kupitila kwa Mose* kuti uwe tukuŵajilwa kupegwa misinda mwakutamamo, yalumo ni malo ga mopo kusyungulila misindajo ga yilangwa yetu.”#Num 35:1-8 3Myoyo malinga ni kulamula kwa AMBUJE ŵandu ŵa ku Isalaeli ŵapikanile ni ŵapele Alefi jine mwa misinda jawo ni malo ga mopo.

4Maŵasa ga Alefi ga mtundu wa Akohati ni gigaliji gandanda kugapa misinda. Maŵasa gigaliji yisukulu ya jwakutaga mbopesi Aloni ŵayipele misinda 13 kutyocela ku ma upande ga Yuda, Simiyoni ni Benjamini. 5Ŵiŵasigele wa mtundu wa Kohati ŵapele misinda 10 kutyocela ku ma upande ga Efelemu, Dani, ni kungapilo lyuŵa kwa Manase.

6Mtundu wa Geleshoni ŵawupele misinda likumi ni jitatu kutyocela ku ma upande ga Isakala, Asha, Nafutali, ni kungopoko lyuŵa kwa Manase.

7Maŵasa ga mtundu wa Melali ŵagapele misinda likumi ni jiŵili kutyocela ku ma upande Lubeni, Gadi, ni Sebuloni.

8Ŵandu ŵa ku Isalaeli ŵapelekaga jele misindaji ni malo gawo ga mopo kwa Alefi, mwakulondola yisango mpela muŵalamulile AMBUJE kupitila mwa Mose.

9Aga ni mena ga misinda kutyocela ku ma upande ga Yuda ni Simiyoni 10gigapelecedwe kwa yisukulu ya Aloni* yiyaliji ya liŵasa lya Kohati, uŵaji Alefi. Upande wawo ni wuwaliji wandanda kugaŵidwa. 11Jemanjajo ŵapele msinda wa Alaba (Alaba ŵaliji baba ŵawo Anaki), sambano ukolanjidwa Hebuloni, mcilambo ca kwitumbi ca Yuda, yalumo ni malo ga mopo gakuwusyungulila msindawo. 12Myoyo, migunda ja mu msinda yalumo ni misi jakwe, yaliji yili yipelecedwe kala kwa Kalebu mwanace jwa Yefune kuti yiŵe yakwe.

13Konjecesya pa Hebuloni (umo wa misinda jakutilila), misinda jakuyisyaji japelecedwe kwa yisukulu ya Aloni jwakutaga mbopesi: Libina, 14Yatili, Eshitemowa, 15Holoni, Dibili, 16Aini, Yuta, ni Beti Shemeshi, ni malo gakwe ga mopo: misinda msano ni mcece kutyocela ku mitundu ja Yuda ni Bashani. 17Ŵapele misinda mcece kutyocela ku upande wa Benjamini. Misindaji jaliji: Gibiyoni, Geba, 18Anatoti, ni Alimoni, pamo ni malo gakwe ga mopo. 19Pamo jaliji misinda likumi ni jitatu, ni malo gakwe ga mopo, gapelecedwe kwa ŵakutaga mbopesi, yisukulu ya Aloni.

20Maŵasa gane ga lukosyo lwa Kohati ŵa mwiŵasa lya Alefi ŵagapele misinda jine kutyocela ku upande wa Efelemu. 21Jemanjajo ŵapele misinda mcece: Shekemu ni malo gakwe ga mopo ku cilambo ca kwitumbi ca Efelemu (umo wa misinda jakutilila), Gesele, 22Kibusaimu, ni Beti Holoni, ni malo gakwe ga mopo. 23Jemanjajo ŵapele misinda mcece kutyocela ku upande wa Dani: Eleteke, Gibitoni, 24Aiyaloni, ni Gati Limoni, pamo ni malo gakwe ga mopo. 25Kutyocela ku upande wa kungapilo lyuŵa kwa Manase ŵapele misinda jiŵili. Misinda ja Tanaki ni Gati limoni, ni malo gakwe ga mopo. 26Aga maŵasa ga mtundu wa Kohati gapocele pamo misinda likumi, ni malo gakwe ga mopo.

27Likuga line lya Alefi lya mtundu wa Geleshoni lyapocele misinda jiŵili ja Golani ku Bashani (umo mwa misinda jakutililamo) ni Beshitela ni malo gakwe ga mopo. 28Ku upande wa Isakala jemanjajo ŵapocele misinda mcece: Kishoni, Dabelati, 29Yalamuti, ni Enganimu, ni malo gakwe ga mopo. 30Kutyocela ku upande wa Asha ŵapocele misinda mcece: Mishali, Abidoni, 31Helikati, ni Lehobu, ni malo gakwe ga mopo. 32Kutyocela ku upande wa Nafutali ŵapocele misinda jitatu: Kedeshi ku Galileya, ni malo gakwe ga mopo (umo wa misinda jakutilila), Hamoti Dolo, ni Kalitani, ni malo gakwe ga mopo. 33Maŵasa gakulekangana ga mtundu wa Geleshoni gapocele pamo misinda likumi ni jitatu pamo ni malo gakwe ga mopo.

34Alefi ŵakusigala ŵa mtundu wa Amelali, ŵapocele kutyocela ku upande wa Sebuloni misinda mcece: Yokinimu, Kalita, 35Dimina, ni Nahalali, ni malo gakwe ga mopo. 36Kutyocela ku upande wa Lubeni ŵapocele misinda mcece: Besala, Yahasi, 37Kedemoti, ni Mefati, ni malo gakwe ga mopo. 38Kutyocela ku lukosyo lwa Gadi ŵapocele misinda mcece: Lamoti m'Giliyadi, ni malo gakwe ga mopo (umo wa misinda jakutilila), Mahanaimu, 39Heshiboni, ni Yasa, ni malo gakwe ga mopo. 40Myoyo mtundu wa Melali ŵawupele pamo misinda likumi ni jiŵili.

41-42Kutyocela ku cilambo ciŵakwete ŵandu ŵa ku Isalaeli, misinda jakwanila 48, pamo ni malo ga mopo gakujisyungulila misindajo japelecedwe kwa Alefi.

Aisalaeli akujigala cilambo

43Myoyo AMBUJE ŵapelece kwa Aisalaeli cilambo cosope cene ciŵalangene mwakulumbila acinangolo ŵawo kuti tacapa jemanjajo. Piŵacipocele, ŵatemi kweleko. 44AMBUJE ŵapele jemanjajo mtendele mcilambomo, mpela muŵalanganile ni acinangolo ŵawo. Pangali jumo mwa amagongo ŵawo wosope juŵapakombwele kusisyana nawo ni kupunda, ligongo AMBUJE ŵapundisye Aisalaeli pakwapunda amagongo ŵawo wosope. 45AMBUJE ŵasunjile lililyose lya yilanga yosope yiŵayitesile kwa ŵandu ŵa ku Isalaeli.

Currently Selected:

Yos 21: YAWO

Highlight

Copy

Compare