Yos 19

Upande uŵapelecedwe ku lukosyo lwa Simiyoni

1Lukosyo lwa Simiyoni lwaliji lwaŵili kupocela cilambo. Upande wakwe wajendelecele mpaka mcilambo cicapelecedwe ku lukosyo lwa Yuda. 2Upandewo wapwatice Belesheba, Sheba, Molada,#1 Mbi 4:28-33 3Hasala Shuwala, Bala, Esemu, 4Eletoladi, Betuli, Holoma, 5Sikilagi, Beti Makaboti, Hasala Susa, 6Beti Lebayoti, ni Shaluheni: misinda likumi ni jitatu, yalumo ni misi jijasyungulile jemanjajo.

7Kwapali soni Aini, Limoni, Eteli, ni Ashani: misinda mcece, yalumo ni misi jijasyungulile jemanjajo. 8Upandewo wapwatice misi josope jakusyungulila jele misindaji mpaka ku Balati Beele (kapena Lama), kum'mwela. Aci caliji cilambo cigapocele maŵasa ga lukosyo lwa Simiyoni kuŵa cawocawope. 9Pakuŵa upande uŵapocele Yuda wakusile mnope, mbali jine ŵajipelece ku lukosyo lwa Simiyoni.

Upande uŵapelecedwe ku lukosyo lwa Sebuloni

10Upande watatu uwagaŵidwe waliji wa maŵasa ga lukosyo lwa Sebuloni. Cilambo ciŵapocele cayice mpaka ku Salidi. 11Kutyocela kwele malile gajinjilile kungapilo lyuŵa ku Maleyali, ni kuja kugunda Dabesheti ni lusulo kungopoko lyuŵa kwa Yokinimu. 12Pa mbali jine ja Salidi gapite kungopoko lyuŵa ku malile ga Kisiloti Taboli, kaneko ku Dabelati ni kwela ku Yafiya. 13Kutyocela kwele gapelengenye kungopoko lyuŵa kuja ku Gati Hefala ni Etikasini, gajinjilile ku mbali ja Neya pakwawula ku Limoni. 14Ku mpoto malile gajinjilile ku Hanatoni, ni kumalila ku Ciŵata ca Ifitaheli. 15Gapwatice Katatu, Nahalali, Shimuloni, Idala, ni Betelehemu: misinda likumi ni jiŵili, yalumo ni misi jijasyungulile jemanjajo. 16Jele misindaji ni misi jakwe jaliji mcilambo cigapocele maŵasa ga lukosyo lwa Sebuloni kuŵa cawocawope.

Upande uŵapelecedwe ku lukosyo lwa Isakala

17Upande wamcece uwagaŵidwe waliji wa maŵasa ga lukosyo lwa Isakala. 18Cilambo cakwe capwatice Yesilele, Kesuloti, Shunemu, 19Hafalaimu, Shiyoni, Anahalati, 20Labiti, Kishoni, Ebesi, 21Lemeti, Enganimu, Enihada, ni Beti Pasesi. 22Malilego gagundile soni Taboli, Shahasuma, ni Beti Shemeshi, ni kumalila ku Yolodani. Gapwatice misinda likumi ni msano ni umo yalumo ni misinda jijasyungulile jemanjajo. 23Jele misindaji pamo ni misi jakweji yaliji mcilambo cigapocele maŵasa ga lukosyo lwa Isakala kuŵa gawogawope.

Upande uŵapelecedwe ku lukosyo lwa Asha

24Upande wamsano uwagaŵidwe waliji wa maŵasa ga lukosyo lwa Asha. 25Cilambo cakwe capwatice Helikati, Hali, Beteni, Akishafu, 26Alamu Meleki, Amadi, ni Mishali. Ku ngapilo lyuŵa cagundile Kalimeli ni Shiholi Libinati. 27Pigapindicile ca kungopoko lyuŵa, malile gajile ku Beti Dagoni, kuja kugunda Sebuloni ni Ciŵata ca Ifitaheli pakwawula kumpoto ku Beti Emeki ni Neyiyeli. Gapelengenye kuja kumpoto ku Kabu, 28Ebuloni, Lehobu, Hamoni, ni Kana, mpaka ku Sidoni. 29Kaneko malile gasyungulile ku Lama, kuja kwika ku msinda wa lipupa lyakucinjilicisya wa Taya; ni ŵasyungulile kuja ku Hosa ni wamalile ku Nyasa ja Mediteleniyani. Gapwatice Mahalabu, Akisibi, 30Uma, Afeki, ni Lehobu: misinda 22, yalumo ni misi jijasyungulile jemanjajo. 31Jele misindaji ni misi jakwe ni jijaliji mcilambo cigapocele maŵasa ga lukosyo lwa Asha kuŵa cawocawope.

Upande uŵapelecedwe ku lukosyo lwa Nafutali

32Upande wa msano ni umo uwagaŵidwe waliji wa maŵasa ga lukosyo lwa Nafutali. 33Malile gakwe gatyocele ku Helefu kuja ku citela ca lukosyo lwa ku Sananimu, mpaka ku Adami Nekebu ni ku Yabinele, mpaka ku Lakumu, ni malilega ku Yolodani. 34Kwele malile gapindile kungapilo lyuŵa kuja ku Asinoti Taboli, kutyocela kwele kuja ku Hukoki, kujigunda Sebuloni kum'mwela, Asha ca kungapilo lyuŵa, ni Yolodani kungopoko lyuŵa. 35Misinda jecinjilicisye ni mapupa jaliji Sidimu, Seli, Hamati, Lakati, Kineleti, 36Adama, Lama, Hasoli, 37Kedeshi, Edileyi, Enihasoli, 38Yiloni, Migidaleli, Holemu, Beti Anati, ni Beti Shemeshi: misinda 19, yalumo ni misi jijasyungulile jemanjajo. 39Jele misindaji ni misi jakwe jaliji mcilambo cigapocele maŵasa ga lukosyo lwa Nafutali kuŵa cawocawo.

Upande uŵapelecedwe ku lukosyo lwa Dani

40Upande wa msano ni jiŵili uwagaŵidwe waliji wa maŵasa ga lukosyo lwa Dani. 41Cilambo cakwe capwatice Sola, Eshitawoli, Ilishemeshi, 42Shalibimu, Aiyaloni, Itila, 43Eloni, Timuna, Ekiloni, 44Eleteke, Gibitoni, Balati, 45Yehudi, Benebelaki, Gati Limoni, 46Mejalikoni, ni Lakoni, soni ni upande wakusyungulila ku Yopa. 47Ŵandu ŵa Dani piŵasumwile cilambo cawo, ŵajawile ku msinda wa Laishi ni kuja kukuwutanda. Ŵawusumwile, kwawulaga ŵandu ŵakwe, ni kuwusandusya wawo. Ŵatemi mcilambomo ni kulityosya lina lya msinda lyakuti Laishi kuŵa Dani, ŵawupele lina lya nangolo jwawo Dani.#Ŵak 18:27-29 48Jele misindaji ni misi jakwe jaliji mcilambo cigapocele maŵasa ga lukosyo lwa Dani kuŵa cawocawope.

Kupeleka cilambo kwambesi

49Ŵandu ŵa ku Isalaeli piŵamalisisye kugaŵanya cilambo, ŵampele Yoswa mwanace jwa Nuni mbali jine ja cilambo kuŵa cakwe. 50Mpela muŵalamulile AMBUJE,* jemanjajo ŵampele msinda uŵaŵendile: Timunati Sela, mcilambo ca kwitumbi ca Efelemu. Jwalakwe ŵawutaŵile soni msindawo ni kutama kukoko.

51Ŵandu wosope ŵa ku Isalaeli ŵasongene pakwinjilila pa Tenti ja kumalo gakuwonegana ni AMBUJE ku Shilo. Ŵasongene kweleko kuti jwakutaga mbopesi Eliyesa, Yoswa mwanace jwa Nuni ni ŵakulongolela ŵa mitundu ja Isalaeli agaŵanye cilambo cosope ca kungapilo lyuŵa kwa Lusulo lwa Yolodani. Ŵatesile yisango kuti amanyilile yiŵasosaga AMBUJE pagaŵanya cilambo.

Currently Selected:

Yos 19: YAWO

Highlight

Copy

Compare