Yos 18

Yoswa akugaŵanya cilambo cicasigele

1Panyuma pakwe ŵandu ŵa ku Isalaeli ali acipunde cilamboco, likuga lyosope lya Aisalaeli lyasongene ku Shilo nipo ŵalinganyisye Tenti muŵawoneganaga AMBUJE* ni ŵandu ŵa ku Isalaeli. 2Japalipe mitundu msano ni jiŵili ja ŵandu ŵa ku Isalaeli ŵiŵaliji mkaniŵape cilambo cawo. 3Ni Yoswa ŵatite kwa ŵandu ŵa ku Isalaeli, “Ana tajembecele mpaka cakaci kuti akajinjile mcilambomo ciŵapele AMBUJE, Mlungu jwa acinangolo ŵawo? 4Ambe acalume ŵatatu kutyocela ku mtundu uliwose. Tinjatumisya jemanjajo ku cilambo cosope kuti akajambule upande utawusose kuti uŵe wawowawope. Nipo kaneko akayice soni kwa une. 5Cilambo ticicigaŵidwa kwa jemanjajo m'ma upande msano ni gaŵili; Yuda tacitama mu upande wakwe wa kum'mwela, nipo Yosefe mu upande wakwe wa kumpoto. 6Alembe mlundelunde wa ma upande msano ni gaŵiliga nipo ayice najo kwangune. Pelepo une tinjalondolela yisango kuti situmanyilile yakusosa AMBUJE Mlungu pa yeleyi. 7Alefi ngisapocela cilambo yalumo ni jemanja, ligongo mbali jawo ni jakutumicila mpela wa mbopesi wa AMBUJE. Nipo nditu, mitundu ja Gadi, Lubeni, ni Manase jwa kungopoko lyuŵa apocele kala cilambo cawo kungopoko lyuŵa kwa Yolodani, ciŵapele Mose,* jwakutumicila jwa AMBUJE.”

8Acalumewo ŵawutandite ulendo kukwambula cilambo panyuma pakupocela yiŵalanjisye Yoswa kuti: “Ajawule ku cilambo cosope ni akacijambule, ni akayice soni kwa une. Ku Shilo kuno tinjilondola yisango pakusosa kuti citumanyilile yakuti AMBUJE.” 9Ni Acalumewo ŵapite kosope ku cilamboko ni ŵalembile m'buku muŵagaŵile mwakwe cilamboco m'ma upande msano ni gaŵili, ŵapanganyisye mlundelunde wa misinda. Ni ŵawujile kwa Yoswa ku cigono ca ku Shilo. 10Yoswa ŵalondwele yisango kuti amanyilile yiŵasosaga AMBUJE pa jemanjajo, nipo ŵapelece kwa jwalijose jwa mitundu jijasigele ja Isalaeli upande wine wa cilamboco.

Upande uwapelecedwe ku lukosyo lwa Benjamini

11Lukosyo lwandanda lulwapocele upande kutyocela kwa Yoswa lwaliji lukosyo lwa Benjamini. Jwalakwe ŵapele cilambo jemanjajo cicaliji pasikati pa mitundu ja Yuda ni Yosefe. 12Kumpoto malile gawo gatandite ku Yolodani ni gapite kwela cikwesya ca kumpoto kwa Yeliko ni kwinjilila kungapilo lyuŵa kupeleta cilambo ca litumbi mpaka ku cipululu ca Beti Afeni. 13Malilego ni gapite ku cikwesya ca ku mbali ja kum'mwela kwa Lusi (jakolanjidwa soni Beteli), ni kutuluka kuja ku Ataloti Adala, petumbi kum'mwela ca kwiŵanda kwa Beti Holoni. 14Malilego ni gapite mbali jine, kusyungulila ca kum'mwela kutyocela ku mbali ja kungapilo lyuŵa kwa lyele litumbili, mwakulolegana ni Beti Holoni, ni kwawulaga mpaka ku Kiliyati Baala (kapena Kiliyati Yelimu), msinda wawuli wa mbali ja lukosyo lwa Yuda. Gelega galiji malile ga kungapilo lyuŵa. 15Malile ga kum'mwela gatandilile ku Kiliyati Yelimu ni gajesile mpaka ku matanda ga ku Nefitowa. 16Kaneka gatulucile kwiŵanda kwa litumbi ku mbali ja kumpoto kwa Ciŵata ca Lefayimu, kucikutandila Ciŵata ca Hinomu. Kutyocela kwele gajesile ca kum'mwela kupeleta Ciŵata ca Hinomu kwawula ku cikwesya ca kum'mwela kwa Ayebusi nipo kaneko kuja ku litanda lya Enilogeli. 17Malilego gajile kwika kumpoto mpaka kuja kwika ku Enishemeshi ni kupeletela ku Geliloti, jakulolegana ni Mpata wa Adumimu. Kaneko gatulucile ku Liganga lya Bohani (Bohani ŵaliji mwanace jwa Lubeni) 18nipo gapitilile kumpoto kwa cikwesya cakulolegana ni Ciŵata ca Yolodani. Kaneko gatulucile m'ciŵatamo. 19Gajesile ca kumpoto kwa cikwesya ca Beti Hogila, ni kumalila kumpoto kugakwinjilila mesi mu Nyasa ja Njete, mulukwinjila Lusulo lwa Yolodani. Gelega galiji malile ga kum'mwela. 20Lusulo lwa Yolodani ni lwaliji malile ga kungopoko lyuŵa. Gelega ni galiji malile ga cilambo cigapocele maŵasa ga lukosyo lwa Benjamini kuŵa cawocawo.

21Misinda jijaliji ja maŵasa ga lukosyo lwa Benjamini jaliji Yeliko, Beti Hogila, Emeki Kesisi, 22Beti Alaba, Shemalayimu, Beteli, 23Afimu, Pala, Ofula, 24Kefalamoni, Ofini, ni Geba: misinda likumi ni jiŵili, pamo ni misi jijasyungulile jemanjajo. 25Jine jaliji Gibiyoni, Lama, Beeloti, 26Misipa, Kefila, Mosa, 27Lekemu, Ilipeli, Talalahi, 28Sela, Helefi, Yebusi (kapena Yelusalemu), Gibeya, ni Kiliyati Yelimu: misinda likumi ni mcece, yalumo ni misi jijasyungulile jemanjajo. Aci ni cilambo cigapocele maŵasa ga lukosyo lwa Benjamini kuŵa cawocawope.

Currently Selected:

Yos 18: YAWO

Highlight

Copy

Compare