Yos 17

Kungapilo lyuŵa kwa upande wa Manase

1Mbali ja cilambo ca kungapilo lyuŵa kwa Yolodani japelecedwe kwa gane mwa maŵasa gigakopwece mwa Manase mwanace jwamkulungwa jwa Yosefe. Makili, baba ŵa Giliyadi, ŵaliji mwanace jwandanda kupagwa jwa Manase soni msilikali jwa ngondo jwakulimba mtima, myoyo Giliyadi ni Bashani, kungopoko lyuŵa kwa Yolodani, yapelecedwe kwa jwalakwe. 2Cilambo ca kungapilo lyuŵa kwa Yolodani capelecedwe kwa maŵasa gigasigele ga Manase: Abiyesa, Heleki, Asilieli, Shekemu, Hefele, ni Shemida. Yeleyi yaliji yisukulu yayilume ya Manase mwanace jwa Yosefe, nipo ŵele acalume wosopeŵa ni ŵaliji ŵakulongolela ngosyo. 3Selofehadi, mwanace jwa Hefele, mwanace jwa Giliyadi, mwanace jwa Makili, mwanace jwa Manase, nginakola ŵanace ŵacalume ŵaliwose, nambo ŵacakongwepe basi. Mena gawo galiji Mala, Nowa, Hogila, Milika, ni Tilisa. 4Jemanjajo ŵajawile kwa Eliyesa jwambopesi ni kwa Yoswa mwanace jwa Nuni ni kwa ŵakulongolela, ni ŵatite kuti, “AMBUJE* ŵamlamwile Mose* kuti atupe uwe, pamo ni acalumbu ŵetu, mbali jine ja cilambo kuti ciŵe cetucetupe.” Myoyo, mpela muŵalamulile AMBUJE, ŵapele cilambo yalumo ni acalumbu ŵawo.#Num 27:1-7 5Ni ligongo lyakwe Manase ŵapocele magawo likumi gakonjecesya pa Giliyadi ni Bashani ku mbali ja kungopoko lyuŵa kwa Yolodani, 6pakuŵa yisukulu yakwe yayikongwe pamo ni yayilume yakwe yapocele cilambo. Cilambo ca Giliyadi capelecedwe kwa yisukulu yiyasigele ya Manase.

7Upande wa Manase kutyocela ku Asha mpaka ku Mikimetati, kungopoko lyuŵa kwa Shekemu. Ni malilego gajawile kum'mwela kupwaticila ŵandu ŵa ku Enitapuwa. 8Cilambo cakusyungulila Tapuwa caliji ca Manase, nambo tawuni ja Tapuwa, ku malile, kwaliji kwa yisukulu ya Efelemu. 9Malilego ni gajesile kutulucila ku Lusulo lwa Kana. Misinda ja kum'mwela kwa lusulo jaliji ja Efelemu, namuno kuti walijipe upande wa Manase. Malile ga Manase gapitilisye ku mbali ja kumpoto kwa lusulo ni kumalila ku Nyasa ja Mediteleniyani. 10Efelemu ŵaliji kum'mwela, nipo Manase ŵaliji kumpoto, ni Nyasa ja Mediteleniyani kuŵa mpela malile gawo ga kungapilo lyuŵa. Asha ŵaliji kumpoto ca kungapilo lyuŵa, nipo Isakala kumpoto ca kungopoko lyuŵa. 11Mkati mwa maupande ga Isakala ni Asha, Manase ŵakwete malo gane gakolanjidwa Beti Shani ni Ibuleyamu, yalumo ni misi jakwe ja jakusyungulila, pamo ni Doli (jijili mu ngulugulu nyasa), Endoli, Tanaki, Megido, ni misi jakwe jakusyungulila. 12Nambope, ŵandu ŵa Manase, nginapakombola kwakoposya ŵandu ŵiŵatamaga mwele m'misindamo, myoyo Akenani ŵapitilisye kutama mwelemo.#Ŵak 1:27-28 13Namuno Aisalaeli piŵaŵele ŵamacili, nganiŵakoposya Akenani wosope ŵene, nambo ŵakanganicisye kuti ŵapanganyicisyeje masengo.

Efelemu ni Manase jwa kungapilo lyuŵa akuŵenda kuti ŵajonjecesye cilambo

14Yisukulu ya Yosefe yatite kwa Yoswa, “Ligongo cici agambile kutupa uwe mbali jimope ja cilambo kuti ciŵe cetu? Tukuŵajilwa kuti atujonjecesye cilambo cine, pakuŵa AMBUJE atupele upile nipo tupali ŵajinji.”

15Yoswa ŵajanjile kuti, “Naga apali ŵandu ŵajinji mwa jemanja nipo cilambo ca kwitumbi ca Efelemu canandipile jemanjajo, ni ajawule ku yipululu akagwisye yitela ni kulilinganyicisya malo acimsyene ku cilambo ca Apelesi ni Alefayimu.”

16Jemanjajo ŵajanjile kuti, “Cilambo ca kwitumbi ngaŵa mkutukwanila uwe, nambo soni Akenani akutama m'malambo ni m'yiŵata. Nipo wosopewo ŵana mageleta ga yisyano ya ayiloni yakwenda ni mahaci ga ngondo. Pamo ni ŵele ŵakutama ku Beti Shani ni malo gosope gakusyungulila ni ŵele ŵakutama m'Ciŵata ca Yesilele.”

17Yoswa ŵatite kwa mitundu ja Efelemu ni Manase jwa kungapilo lyuŵa kuti, “Jemanja apali ŵajinji, ni pa ligongo lyeleli, mli ŵamacili mnope. Une tinjajonjecesya mbali jimo ja cilambo. 18Cilambo ca kwitumbi ticiciŵa cawo. Namuno cili cacipululu, taciswejesyako ni kujigala kuŵa cawo kutyocela ku mbesi jimo mpaka ku mbesi jine. Kwamba ya Akenani, tacatoposya cenenepe, namuno akwete mageleta ga yisyano ya ayiloni yakwenda ni mahaci nipo ali ŵandu ŵamacili.”

Currently Selected:

Yos 17: YAWO

Highlight

Copy

Compare