Yos 16

Upande uwapelecedwe kwa ngosyo sya Efelemu ni Manase

1Malile ga kum'mwela kwa cilambo gigapelecedwe kwa yisukulu ya Yosefe gatyocele ku Lusulo lwa Yolodani ciŵandika ni Yeliko, pa malo ga kungopoko lyuŵa kwa matanda ga ku Yeliko, ni gajesile mpaka mcipululu. Gajesile kutyocela ku Yeliko mpaka ku cilambo ca kwitumbi kuja kwika ku Beteli. 2Kutyocela ku Beteli gapite ku Lusi, kwendelecela kuja ku Ataloti Adala, kuŵatamaga Aaliki. 3Ni gajesile ca kungapilo lyuŵa ku malo ga Ayafileti, mpaka ku malo ga kwiŵanda kwa Beti Holoni. Gapitilisye kutyocela kweleko kuja ku Gesele ni kuja kumalile ku Nyasa ja Mediteleniyani.

4Yisukulu ya Yosefe, mitundu ja Efelemu ni kungapilo lyuŵa kwa Manase, ŵapocele cele cilamboci kuŵa cawocawope.

Efelemu

5Awu ni upande wa maŵasa ga Efelemu: malile gawo gajesile kutyocela ku Ataloti Adala kwawulaga ca kungopoko lyuŵa mpaka ku Mkuli kwa Beti Holoni, 6nipo kutyocela kwele mpaka ku Nyasa ja Mediteleniyani. Mikimetati waliji ca kumpoto kwawo. Malile gapindile ca pelepo kwawula ca ku Tanati Shilo ni gapite kupapeleta pelepo ca kungopoko lyuŵa kuja ku Yanowa. 7Ni gatulwice kutyocela ku Yanowa kuja ku Ataloti ni Naala, kuja kwika ku Yeliko ni kumalila ku Yolodani. 8Malile gajesile ca kungapilo lyuŵa kutyocela ku Tapuwa mpaka ku Lusulo lwa Kana ni lwamalile ku Nyasa ja Mediteleniyani. Aci ni cilambo cicapelecedwe kwa maŵasa ga lukosyo lwa Efelemu mpela cawocawo, 9yalumo ni misinda ni misi jijaliji m'malile ga Manase, nambo gapelecedwe ku lukosyo lwa Efelemu. 10Nambo nginiŵatoposya Akenani ŵiŵatamaga ku Gesele, myoyo Akenani aŵele mkutama pasikati pa lukosyo lwa Efelemu mpaka lelo, nambo ŵacisyaga kuti akamuleje masengo mpela acikapolo.#Ŵak 1:29

Currently Selected:

Yos 16: YAWO

Highlight

Copy

Compare