Yos 15

Upande uŵapelece Yoswa ku lukosyo lwa Yuda

1Maŵasa ga lukosyo lwa Yuda gapocele mbali ja cilambo mpela mwakuyicisyamu:

Cilambo cayice mbali ja kum'mwela, kweleko upande wawo watesile malile ni cipululu ca Sini, cicaliji m'malile ga Edomu. 2Gele malile ga kum'mwelaga gajesile kutyocela kum'mwela kumbesi kwa Nyasa ja Njete, 3kwinjilila ca kum'mwela kutyocela pa Mpata wa Akalabimu mpaka ku Sini. Cajesile kum'mwela kwa Kadeshi Baneya, kupeleta Hesiloni mpaka ku Adala, ni ku Kalika, 4Cajendelecele ku Asimoni, ni kuya lusulo ku malile ga Iguputo mpaka ku Nyasa ja Mediteleniyani, kugamalile malilego. Gele galiji malile ga kum'mwela kwa Yuda.

5Malile ga kungopoko lyuŵa ga lukosyo lwa Yuda galiji Nyasa ja Njete mpaka kulukwitila Lusulo lwa Yolodani lwalukwitilila ku Nyasa ja Njete.

Malile ga kumpoto gakwenda kutyocela kungopoko lyuŵa (kulukutaga Lusulo lwa Yolodani); 6kwinjilila malilego ku mbali ja kumpoto ku Beti Hogila, ni kwenda mpaka ca kumpoto kwa cikwesya cakulolegana ni Ciŵata ca Yolodani. Kutyocela pele gajawile mpaka ku Liganga lya Bohani, (lilyakolanjidwe kutyocela ku lina lya Bohani, mwanace jwa Lubeni), 7Kutyocela ku Ciŵata ca yisawusyo mpaka ku Dibili, ni kugalawucila kumpoto ca ku Giligala, cicikulola ku Mpata wa Adumimu ku mbali ja kum'mwela ja ciŵata. Ni cajendelecele ku nduluko sya mesi ga Enishemeshi, kuja ku Enilogeli, 8ni kwela kupeleta Ciŵata ca Benihinomu ku mbali ja kum'mwela kwa litumbi kuŵaliji msinda wa Ayebusi wa Yelusalemu. Malilego ni gapelengenye kwela mpaka penani pa litumbi mbali ja kungapilo lyuŵa kwa Ciŵata ca Hinomu, kumbesi ca kumpoto kwa Ciŵata ca Lefayimu. 9Kutyocela kweleko gapite ku Nduluko sya mesi ku Nefitowa ni kupitilisya mpaka ku misinda jakuŵandicila ku Litumbi lya Efuloni. Kweleko gajendelecele kuja ku Baala (kapena Kiliyati Yelimu), 10kugasyungulile kungapilo lyuŵa kwa Baala kwinjilila ku cilambo ca kwitumbi ca Edomu, gapite ku mbali ja kumpoto kwa Litumbi lya Yealimu (kapena Kisaloni), kuselelecela ku Beti Shemeshi, ni ulendo kupeleta Timuna. 11Malilego ni gajile kwika kwitumbi kumpoto kwa Ekiloni, gagalawucila ku Shikeloni, kupunda Litumbi lya Baala, ni mpaka ku Yabinele. Gamalile ku Nyasa ja Mediteleniyani, 12jijaŵele malile ga kungapilo lyuŵa.

Ŵandu ŵa Yuda ŵatemi mkati mwa gele malilega.

Kalebu ŵajipundile misinda ja Hebuloni ni Dibili

(Ŵak 1:11-15)

13Mpela muŵamlamulile AMBUJE* Yoswa, mbali jine ja upande wa Yuda japelecedwe kwa Kalebu mwanace jwa Yefune, kutyocela ku lukosyo lwa Yuda. Jwalakwe ŵapocele Hebuloni, msinda uwaliji wa Alaba, atati ŵa Aanaki.#Ŵak 1:20 14Kalebu ŵatopwesye mu msindamo alukosyo ŵa Aanaki mitundu ja ku Sheshayi, Ahimani, ni ku Talimai. 15Kutyocela kweleko ŵajile kukwatanda ŵandu ŵakutama ku Dibili. (Wele msindawu pandanda ŵawukolangaga kuti Kiliyati Sefala). 16Kalebu ŵatite, “Mundu jutacipunda pakusumula msinda wa Kiliyati Sefala, tinjimpa mwanangu Akisa kuti aŵe ŵamkwakwe.” 17Otiniyele, mwanace jwa Kenasi akulu ŵawo ŵa Kalebu ŵawusumwile msindawo, myoyo Kalebu ŵampele jwalakwe mwanagwe Akisa kuŵa ŵamkwakwe. 18Pa lisiku lya ulombela Otiniyele ŵamsalile Akisa kuti ŵaŵende baba ŵawo mgunda. Jwalakwe ŵatulwice pa bulu jwakwe, nipo Kalebu ŵamwusisye ciŵasosaga. 19Jwalakwe ŵajanjile, “Ngusosa ambe mtuka; pakuŵa cilambo ciŵambele cila cili cakumula, sambano ni ngusosa ambe soni matanda ga mesi.” Myoyo Kalebu ŵampele matanda ga mesi ga kumkuli ni ga kwiŵanda.

Misinda ja Yuda

20Aji ni misinda ja upande uliwose uwapelecedwe kwa lukosyo lwa ŵanace ŵa Yuda kuŵa wawowawope. 21Misinda ja kumbesi ca kum'mwela jijaliji jawo, jele jijaŵandicile ku malile kwa Edomu, jaliji Kabisele, Eda, Jagala, 22Kina, Dimona, Adada, 23Kedeshi, Hasoli, Itinani, 24Sifi, Telemu, Biloti, 25Hasoli Hadata, Keliyoti Hesiloni (kapena Hasoli), 26Amamu, Shema, Molada, 27Hasala Gada, Heshimoni, Beti Peleti, 28Hasala Shuwala, Belesheba, Bisiyotiya, 29Baala, Limu, Esemu, 30Eletoladi, Kesili, Holoma, 31Sikilagi, Madimana, Sanisana, 32Lebayoti, Shilihimu, Aini, ni Limoni: misinda josope jene pamo 29, yalumo ni misi jijasyungulile jemanjajo.

33Misinda ja mwiŵanda mwa matumbi jaliji Eshitawoli, Sola, Ashina, 34Sanowa, Enganimu, Tapuwa, Enamu, 35Yalamuti, Adulamu, Soko, Aseka, 36Shalayimu, Aditayimu, Gedela, ni Gedelotayimu: misinda likumi ni mcece, yalumo ni misi jijasyungulile jemanjajo.

37Japali soni misinda jine ja Senani, Hadasha, Migidalagadi, 38Dileyani, Misipa, Yokotelo, 39Lakishi, Bosikati, Egiloni, 40Kaboni, Lahimamu, Kitilishi, 41Gedeloti, Beti Dagoni, Naama, ni Makeda: misinda likumi ni msano ni umo yalumo ni misi jijasyungulile jemanjajo.

42Japali soni misinda jine ja Libina, Eteli, Ashani, 43Ifita, Ashina, Nesibu, 44Keyila, Akisibi ni Malesha: misinda msano ni mcece, yalumo ni misi jijasyungulile jemanjajo.

45Papali Ekiloni ni misinda ni misi jakwe, 46ni misinda josope ni misi ciŵandika ni Ashidodi, kutyocela ku Ekiloni mpaka ku Nyasa ja Mediteleniyani.

47Japali misinda ja Ashidodi ni Gasa, ni misinda jekulungwa ni misi jakwe, jijayice ku lusulo ku malile ga Iguputo ni mungulugulu mwa Nyasa ja Mediteleniyani.

48Ku cilambo ca kwitumbi kwakuli Shamilu, Yatili, Soko, 49Dana, Kiliyati Sefala (kapena Dibili), 50Anabu, Eshitemo, Animu, 51Gosheni, Holoni, ni Gilo: misinda likumi ni umo, yalumo ni misi jijasyungulile jemanjajo.

52Paliji pana soni msinda wa Alabu, Duma, Eshanu 53Yanumu, Beti Tapuwa, Afeka, 54Humuta, Hebuloni, ni Siyoli: misinda msano ni mcece, yalumo ni misi jijasyungulile jemanjajo.

55Kwaliji kwana msinda wa Maoni, Kalimeli, Sifi, Yuta, 56Yesilele, Yokodeyamu, Sanowa, 57Kaini, Gibeya, ni Timuna: misinda likumi, yalumo ni misi jijasyungulile jemanjajo.

58Kwaliji kwana msinda wa Haluli, Beti Suli, Gedoli, 59Maalati, Beti Anoti, ni Etekoni: misinda msano ni umo, yalumo ni misi jijasyungulile jemanjajo.

60Kwaliji kwana misinda ja Kiliyati Baala (kapena Kiliyati Yelimu) ni Laba: misinda jiŵili, yalumo ni misi jijasyungulile jemanjajo.

61Ku cipululu kwakuli Beti Alaba, Midini, Sekaka, 62Nibishani, Msinda wa Njete, ni Enigedi: Misinda msano ni umo, yalumo ni misi jijasyungulile jemanjajo.

63Nambo ŵandu ŵa ku Yuda nganapakombola kwatoposya Ayebusi, mu Yelusalemu. Myoyo akutama nawo yalumo mu msindamo mpaka lelo.#Ŵak 1:21; 2 Sam 5:6; 1 Mbi 11:4

Currently Selected:

Yos 15: YAWO

Highlight

Copy

Compare