Zaaburi 66
66
Okusiima Ruhanga ahabw'eby'okutangaaza ebi yaatukoreire
Aha Mukuru w'abeeshongozi. Zaaburi y'okweshongorwa
1 #
Zab 98:4. Iwe ensi yoona, teerera Ruhanga akaari k'okushemererwa;
2 #
Isa 42:12. Oyeshongore eby'okuhimbisa eiziina rye,
N'okuhimbisibwa kwe okuhe ekitiinisa.
3 #
Zab 18:44; 65:5. Ogire Ruhanga oti: Emirimo yaawe ka n'ey'okutiinisa!
Ahabw'amaani gaawe maingi abazigu baawe bayrakugomokyera.
4Ab'ensi yoona baryakuramya, bakweshongorere,
Beeshongore eby'okuhimbisa eiziina ryawe.
5 #
Zab 46:8. Mwija mureebe emirimo ya Ruhanga;
N'ow'okutiinisa omu bi akorera abantu.
6 #
Kur 14:21; Yos 3:17; 4:23; Isa 63:12. Akahindura enyanja ensi eyomire,
Abantu baaraba omu mugyera n'ebigyere;
Okwo niyo twamusiimiire munonga.
7Ategyekyesa obushoboorozi ebiro byona;
Amaisho ge agatuuza aha mahanga.
Abagomi beerinde, barekye kwetunguura.
8Imwe mahanga 'mwe, muhe Ruhanga waitu ekitiinisa,
Amaraka agarikumuhimbisa gahurirwe;
9 #
Zab 121:3. Ahakuba aturinda tuguma turi abahuriire,
Kandi taikiriza bigyere byaitu kuterera.
10 #
Yob 23:10; Zek 13:9. Iwe Ruhanga, okatugyeza,
Waaturabya omu iziiko, nk'oku bagira efeeza.
11 #
Tonz 1:13; Ezk 12:13. Okatutooza ekigoye;
Waatuhatisa ebirikutusaasa omu manyaanya.
12 #
Isa 43:2; 51:23. Waikiriza abantu kuturibatiirira, batembire embaraasi;
Tukaraba omu muriro n'omu maizi,
Kwonka waatuhitsya omu mwanya ogwine obweshanziro.
13 #
Zab 50:14. Niinyija kutaaha omu nju yaawe n'ebitambo ebyokize,
Mpikiirize ebi naaraganiise nindahira,
14 #
Zab 18:6. Ebi eminwa yangye yaagambire,
N'ebi akanwa kangye kaaraganiise, obu naareeba enaku.
15Niinyija kukuha ebitambo byokize eby'ebishaju,
N'ekisooroora ky'ebitambo by'empaya y'entaama,
Nkuhongyere enimi n'embuzi.
16Imwe abatiina Ruhanga, mwije muhurire,
Mbagambire ebi yaakoreire amagara gangye.
17Nkamutakira munonga n'akanwa kangye,
N'orurimi rwangye rwamuhimbisa.
18 #
Enf 28:9; Isa 1:15; 59:2; Yoh 9:31. Kuri naataire omutima aha by'okutahikiirira,
Mukama takumpuriire.
19 #
Zab 116:1, 2. Kwonka buzima Ruhanga akahurira,
Yaata omutima aha iraka ry'okushaba kwangye.
20Ruhanga asiimwe, ahakuba tayangire kuhurira kushaba kwangye,
Kandi taanyihireho kukunda kwe.
Currently Selected:
Zaaburi 66: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
