Zaaburi 104
104
Ekitiinisa kya Ruhanga ekirikureeberwa omu bi yaahangire
1 #
Zab 103:1, 2; 2 Sam 7:22; Yob 40:10. Singiza MUKAMA, iwe magara gangye!
Ai MUKAMA Ruhanga wangye, ori mukuru munonga;
Ojwaire ekitiinisa n'obukuru.
2 #
Yob 9:8; Isa 40:22. Ojwara okumurinkana nk'ekijwaro;
Okabamba eiguru nk'eihema.
3 #
Zab 18:19; Isa 19:1; Amo 9:6. Waataho enyomyo z'ekishengye kyawe omu maizi;
Ebicu waabigira ekigaari kyawe,
Noogyenda aha mapapa g'omuyaga.
4 #
2 Bag 1:10; 6:17; Heb 1:7. Emiyaga ogigira entumwa zaawe,
# 104:4 Nari, Omuriro n'endimi zaagwo obigira abaheereza baawe. N'abaheereza baawe baba omuriro ogurikwaka.
5 #
Yob 38:4; Mub 1:4. Okata ensi aha misingi yaayo,
Ngu etaritengyetsibwa ebiro byona.
6 #
Kut 7:19. Waagishweka enyanja nk'ekijwaro;
amaizi gaashweka enshozi.
7 #
Zab 18:15; 77:18. Ku waagakabukiire, gaahunga;
ahabw'eiraka ry'okuhinda kwawe, gairukira kimwe.
8 #
Yob 38:8. Enshozi zimuka, empanga zaagaruka ahansi
Omu mwanya ogu waaziteekateekyeire.
9 #
Kut 9:11; Yob 38:11; Yer 5:22. Waataho emyatano ei gatashemereire kurenga,
Ngu gatagaruka kushweka ensi.
10Ku oragiira, enshuro zifumuka omu mpanga;
Emigyera ehimintika ahagati y'ebibungo;
11Enywaisa enyamaishwa zoona;
Kandi enturegye zihweraho eiriho.
12Aha rubaju rwayo enyonyi n'amahungu niho byarika,
Bikeeshongorera omu mataagi g'ebiti.
13 #
Zab 65:9; Yob 5:10. Ogwisiza ebibungo enjura, neeruga omu iguru,
Ensi ehaaga ebyana by'omurimo gwawe.
14 #
Zab 136:25; 147:8; Yob 28:5; Kut 1:29, 30. Omereza ente obunyaatsi,
N'abantu obaha eby'okubyara,
Ngu babone kwiha eby'okurya omu itaka,
15 #
Kut 18:5; Bar 9:9, 13; Enf 31:6, 7; Mub 10:19. Na viinyo ey'okugwisa gye emitima yaabo,
N'amajuta g'okuyagayagisa ahamaisho gaabo,
N'eby'okurya by'okugumya emitima yaabo.
16 #
Kub 24:6. Emiti ya MUKAMA ehaagire amaizi,
Emyereezi ya Lebanooni ei yaabyaire.
17Omuriyo nimwo enyonyi zaarika,
Oruyongoyongo rwine enju yaarwo omu miberooshi.
18 #
Yob 39:1; Enf 30:26. omu nshozi ndaingwa enzaza nimwo ziba,
N'enkiri n'obweshereko bw'endirira.
19 #
Kut 1:14. Okataho okwezi kumanyisa obunaku,
N'eizooba rimanya obunaku obu rirengyeraho.
20 #
Isa 45:7. Oreeta omwirima, kiba ekiro;
Enyamaishwa zoona ez'omu ihamba zibona kushohora nizishooba.
21 #
Yob 38:39. Ebitsigazi by'entare biboorogyera eki biraarye,
Nibisherura eby'okurya byabyo ahari Ruhanga.
22Eizooba ku rirasha, zigyenda,
Zibyama omu maaya gaazo.
23 #
Kut 3:19. Abantu bashohora, baza aha mirimo yaabo,
Basiiba nibafa kubi okuhitsya omu mwabazyo.
24 #
Kut 1:20, 21, 24, 25; Enf 3:19. Ai MUKAMA, emirimo yaawe ka n'ey'emiringo mingi!
Ebyo byona okabikoresa obwengye.
N'ensi eijwire ebihangirwe byawe.
25Reeba, eriya nyanja ndaingwa kandi empango,
Ebamu ebintu ebitarikubarwa,
Ebiine amagara ebikye n'ebihango.
26 #
Zab 74:14; Yob 41:1; Isa 27:1. Nimwo emeeri ziraba,
Na Leviasaani ei waahangire kuguma neezaniramu.
27 #
Zab 145:15. Ebyo byona bikuhanga amaisho
Ngu obigaburire omu bunaku bwabyo.
28 #
Zab 145:16. Ebi obiha, nibyo bitorotoora;
Ku oshashaanura engaro zaawe, biiguta ebirungi.
29 #
Zab 30:7; Yob 34:14, 15. Ku obiima amaisho, bishoberwa;
Ku obiihamu omwitsyo, bifa.
Bigaruka omu mucuucu omu byarugire.
30 #
Yob 33:4; Isa 32:15. Ku oyohereza Omwoyo waawe, bihangwa,
Ohindura eitaka, rigaruka riba risya.
31 #
Zab 72:17; Kut 1:31. Ekitiinisa kya MUKAMA kigumeho ebiro byona,
Mukama ashemerererwa emirimo ye,
32 #
Zab 144:5; Kur 19:18. Oreeba ensi ekatetema,
Akikora aha nshozi, zikacumba omwika.
33 #
Zab 63:4. Ndayeshongorera MUKAMA, nkiri ohuriire,
Nyeshongorere Ruhanga wangye, nkiriho.
34Okuteekateeka kwangye kugume kumugwise gye;
Ahakuba nshemerererwa omuri MUKAMA.
35 #
Zab 37:38; 104:1; 105:45. K'abasiisi bahwerekyerezibwe, barugye omu nsi,
N'ababi batarirangwa omu nsi.
Singiza MUKAMA iwe magara gangye!
Haleluya.
Currently Selected:
Zaaburi 104: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
