Okubara 16
16
Okugoma kw'aba Koora n'okufa kwabo
1 #
Yud 1:11. Koora mwene Izuhaari, mwijukuru wa Kohasi mwene Leevi, na Dasani na Abiraamu beene Eliabu, na Oni mwene Pelesi, beene Reubeeni, bakatwara abantu; 2baimuka omu maisho ga Musa, bakwataniise n'abamwe omu Baisraeli, abeebembezi b'eihanga magana abiri na makumi ataano, abashaija rugambwa abaatoorainwe omu mutwe gw'abateeraine, 3#Zab 106:16-18; Kur 19:6. baayeteerana hamwe kugomera Musa na Arooni, baabagira bati: Mwekurize mwahingurana; ahakuba abantu b'eihanga ryona n'abarikwera, buri omwe omuribo, kandi MUKAMA ari omuribo. Mbwenu nimwekuriza ki aha ihanga rya MUKAMA? 4#Kub 20:6. Musa ku yaakihuriire, yaajuumara ahansi; 5#2 Tim 2:19; Kur 28:11; Zab 105:26; Lev 10:3. yaagambira Koora n'omutwe gwe gwona, naagira ati: Omu kasheeshe MUKAMA naija kworeka ori owe, kandi n'ori orikwera, amwirize haihi; ogwo ou araatoorane, niwe arayeiririze haihi. 6Mukore muti; iwe Koora n'omutwe gwawe gwona, mutware ebyoterero, 7mubiiteho omuriro, kandi omu kasheeshe mubiteho obubaane omu maisho ga MUKAMA; bwanyima omuntu ou MUKAMA araatoorane, niwe araabe orikwera. Imwe beene Leevi, mwekurize mwahingurana. 8Musa yaagaruka yaagira Koora ati: Imwe beene Leevi, muhurire! 9#Bir 10:8. Imwe nimugira ngu n'ekigambo kikye Ruhanga wa Israeli okubashoroora omu ihanga rya Israeli, akabeehitsya haihi kukora omurimo gw'omu Butaaho bwa MUKAMA, n'okuguma nimwemerera omu maisho g'eihanga ryona okuriheereza, 10kandi naiwe okukwiriza haihi hamwe na bagyenzi baawe boona beene Leevi; mbwenu nimwenda n'obunyamurwa? 11#Kur 16:8; 1 Kor 3:5. N'ahabw'ekyo mumanye ngu iwe n'omutwe gwawe gwona, ou mweteeraine kurwanisa ni MUKAMA; kandi Arooni niwe oha, imwe kumwetomboitera?
12Bwanyima Musa yaatuma kweta Dasani na Abiraamu, beene Eliabu; baagira bati: Titurikwija kwinamukayo; 13#Kur 2:14; Byak 7:27, 35. noogira ngu n'ekintu kikye iwe okutwiha omu nsi y'amate n'obwoki, okatwinamura omu ihamba kutwitiramu, haza n'okwehindura okatwehinduraho omukama? 14Kandi otatureetsire omu nsi y'amate n'obwoki, n'obu kwakuba okutuha obuhunguzi bw'obutaka n'emisiri y'emizaabibu. Nooyenda kwihamu abantu aba amaisho? Titurikwija kwinamukayo.
15 #
1 Sam 12:3; Byak 20:33; 2 Kor 7:2. Musa yaagira ekiniga kingi, yaagambira MUKAMA ati: Otaikiriza empongano yaabo. Tinkabanyagaga n'obu yaakuba endogoya n'emwe; kandi tihariho n'omwe muribo ou ndakozire kubi. 16Musa yaagira Koora ati: Nyencakare iwe n'omutwe gwawe gwona mwije na Arooni, muhikye omu maisho ga MUKAMA. 17buri muntu omuriimwe areete ekyoterero kye, akiteho obubaane, mubireete omu maisho ga MUKAMA, buri muntu ayereetere ekye, ebyoterero byona magana abiri na makumi ataano; naiwe na Arooni mureete ebyanyu. 18Buri muntu omuribo yaatwara ekyoterero kye, boona baabitaho omuriro, baataho n'obubaane, baayemerera aha muryango gw'Eihema ry'okubugaabuganiramu hamwe na Musa na Arooni. 19#Kur 16:10; Lev 9:23. Koora yaateerana abantu b'eihanga ryona, baabaza omumaisho aha muryango gw'Eihema ry'okubugaabuganiramu; ekitiinisa kya MUKAMA kyabonekyera eihanga ryona.
20MUKAMA yaagira Musa na Arooni ati: 21#Yer 51:6; Byak 2:40; Kush 18:4; Kur 32:10. Mwetaanise n'omutwe ogu, mbone kubacwekyereza omuri aka kaanya. 22#Yob 12:10; 2 Sam 24:17; Ezk 18:20. Baajuumara ahansi nibagira bati: Ai Ruhanga, Ruhanga w'emyoyo y'abantu boona, omuntu omwe ku araashiishe, noogirira ekiniga eihanga ryona? 23MUKAMA yaagira Musa ati: 24Gambira abantu oti: Mwimukye, murugye aha mahema g'aba Koora, Dasani na Abiraamu. 25Musa yaimuka, yaaza owa Dasani na Abiraamu; abakuru b'Abaisraeli baagyenda bamukuratiire. 26#Kut 19:12; 2 Kor 6:17. Yaagambira omutwe gwona ati: Nimbeeshengyereza, murugye aha mahema g'aba bantu babi, kandi mutagira ekintu kyabo kyona eki mwakoraho, mutakaacwekyerezibwa nabo omu kifubiro ky'ebibi byabo. 27#Yob 9:4. Abantu nikwo kwimuka, bakaruga aha mbaju zoona ez'amahema g'aba Koora, Dasani na Abiraamu. Bwanyima Dasani na Abiraamu baashohora, baayemerera aha miryango y'amahema gaabo hamwe n'abakazi baabo na batabani baabo n'abaana baabo abato. 28#Kur 3:12; Bir 18:22. Musa yaagira ati: Aha niho muraamanyire MUKAMA ku niwe yantumire kukora emirimo egi yoona; kandi ku ntaragikozire ahabwangye. 29Abantu aba ku baraafe orufu orwita abandi boona, nari shi ku baraaguubweho ebigwa aha bandi boona, biri MUKAMA tarantumire. 30#Zab 55:15; Kush 9:2. Kwonka MUKAMA ku araakore ekitakareebwaga, eitaka okwashama, rikabamira hamwe n'ebyabo byona, bakashuuma okuzimu bahuriire, niho muraamanyire abantu aba ku bagayire MUKAMA.
31 #
Zab 106:17. Ku yaabaire naakiheza kugamba ebigambo ebyo byona, eitaka eri beemereireho ryagangabuka; 32ensi yaayashama, yaabamira n'amaka gaabo, hamwe n'aba Koora boona n'ebintu byabo byona. 33Batyo bo n'abaabo boona baashuuma okuzimu bahuriire, eitaka ryabashweka, baacwekyerera, baihwa omu ihanga. 34Abaisraeli boona abaabaire babeehinguririize baahunga ahabw'okuborooga kwabo, nibagira bati: Tuhungye, naitwe ensi etakaatumira. 35#Lev 10:2; Zab 106:18. Ahonaaho omuriro gwaruga ahari MUKAMA, gwayokyeza kimwe abo bashaija magana abiri na makumi ataano abaabaire nibootera obubaane.
36Bwanyima MUKAMA yaagira Musa ati: 37Gambira Eleazaari mwene Arooni omunyamurwa ashahure ebyo byoterero omu muriro, kandi naiwe ogutaataanise, ahabw'okuba n'ebirikwera. 38#Ezk 14:8; 1 Kor 10:11. Ebyoterero by'abo basiisi, abasiisire bakafa, babiheeshemu ebyoma eby'okushweka eitambiro; ahakuba babihongyeire MUKAMA, n'ahabw'ekyo n'ebirikwera; kandi biryaguma biri eky'okureeberaho aha Baisraeli. 39Eleazaari omunyamurwa nikwo kutwara ebyo byoterero by'emiringa, ebi abookiibwe babaire bahongire, bakabiheeshamu eky'okushweka eitambiro, 40#Kub 18:4-7; 1 Bag 13:1. kandi n'okuba ekiijutsyo aha Baisraeli, ngu hatarigira omuntu otari w'omu ruzaaro rwa Arooni owairira haihi kwotera obubaane omu maisho ga MUKAMA, akaba nka Koora n'ab'ekigombe kye; yaabikora nk'oku MUKAMA yaamugambiire naaraba omuri Musa.
41 #
Zab 106:13, 26; Mat 5:11; 2 Kor 6:8. Kwonka omu kasheeshe eihanga ry'Abaisraeli ryona ryayetomboitera Musa na Arooni riti: Mwitsire abantu ba MUKAMA. 42#Kub 14:10. Abantu ku baayeteeraine kugomera Musa na Arooni, baanaga amaisho ei Eihema ry'okubugaabuganiramu riri, baareeba ekicu kiri kirishwekire, kandi ekitiinisa kya MUKAMA kyareebeka. 43Musa na Arooni baaza omu maisho g'Eihema ry'okubugaabuganiramu. 44MUKAMA yaagambira Musa ati: 45#1 Bus 21:16. Mwimukye murugye omuri aba bantu, mbone kubacwekyereza omuri aka kaanya. Baajuumara ahansi. 46#Kub 1:53; 11:33; Yos 7:1; 1 Bus 27:24. Musa yaagira Arooni ati: Twara ekyoterero kyawe, okiteho omuriro ogw'aha itambiro, oteho n'obubaane, okitware ahonaaho omu bantu, obarihiirire; ahabw'okuba ekiniga kyaruga ahari MUKAMA, orufu rwatandika. 47Arooni yaakitwara nk'oku Musa yaamuragiire, yairuka yaaza ahagati y'abantu abaabaire beeteeraine, yaashanga orufu rwatandikire omu bantu; yaakitaho obubaane, yaarihiirira abantu. 48Yaayemerera ahagati y'abafiire n'abahuriire; orufu rwazibirwa. 49#2 Sam 24:16, 25; Yob 33:24; Zab 106:30; Heb 7:24. Abaitsirwe orwo rufu bakaba bari abantu kakumi n'enkumi ina na magana mushanju, otabariiremu abafiire ahabw'ebya Koora. 50Arooni yaagaruka ahari Musa aha muryango gw'Eihema ry'okubugaabuganiramu, orufu rwaheza kuzibirwa.
Currently Selected:
Okubara 16: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
