Okubara 15

Ebindi biragiro

1MUKAMA yaagira Musa ati: 2Gambira Abaisraeli ebigambo byangye ebi ndikugamba ningira nti: Ku murihika omu nsi ei ndikubaha, ei murikuza kutuuramu, 3#Ezk 20:41; 2 Kor 2:15; Fil 4:18. mwayenda kuhongyera MUKAMA empongano z'okwotsya omumuriro, n'obu kiriba kiri ekitambo ky'okwotsya, nari ekitambo ky'okuhikiiriza eki waaraganiise noohiga, nari eky'okuhonga ahabw'okweyendera, nari eky'okuhonga aha magyenyi gaanyu agaatairweho, kuba ekisooroora kirungi ahari MUKAMA, nimukiiha omu masyo g'ente nari ag'entaama, 4#Lev 2:1. orihonga empongano ye ahongyere MUKAMA empongano y'esaano ey'ekicweka kimwe kya ikumi kya eefa y'esaano y'obunono ejwangizemu ekicweka kimwe kya kana kya hiini y'amajuta g'emizeituuni, 5kandi, oteekateekye ekicweka kimwe kya kana kya hiini ya viinyo ahabwa buri mwana gw'entaama, kuba empongano ey'eby'okunywa, ehongwe hamwe n'ekitambo ky'okwotsya nari ekindi kitambo. 6Nari ku eriba eri empaya y'entaama oteekateekye ebicweka bibiri bya ikumi bya eefa y'esaano y'obunono ejwangizemu ekicweka kimwe kya kashatu ekya hiini y'amajuta g'emizeituuni kuba empongano y'esaano y'okuhongwa n'egyo mpaya; 7kandi ohongye ekicweka kimwe kya kashatu kya hiini ya viinyo kuba empongano y'eby'okunywa ey'omugaju murungi ahari MUKAMA. 8#Lev 7:11. Kandi ku oriteekateeka enimi y'ekimasha kuba ekitambo ky'okwotsya, nari ekindi kitambo eky'okuhikiiriza eki waaraganiise noohiga, nari empongano z'okusiima ahabw'obusingye ez'okuhongyera MUKAMA, 9oriba naahonga egyo nimi, agihongye n'ebicweka bishatu bya ikumi bya eefa y'esaano y'obunono ejwangizemu ekicweka kimwe kya kabiri kya hiini y'amajuta g'emizeituuni kuba empongano y'esaano. 10Kandi oryahonga ekicweka kimwe kya kabiri kya hiini ya viinyo kuba empongano y'eby'okunywa, byona bibe empongano ey'okwotsya omu muriro ey'ekisooroora kirungi ekirikushemeza MUKAMA. 11Okwo bibe nikwo byaguma nibikorwa ahari buri nimi, nari buri mpaya, nari ahari buri mpaya nto y'entaama nari ey'embuzi. 12Nk'ebitambo ebi muriteekateeka oku birikwingana, mube nikwo mwakora ahabwa buri kimwe nk'omubaro gwabyo oku guri. 13Enzaarwa zoona ziryaguma zikore ebyo zityo, ku ziriba nizihonga empongano ez'okwotsya omu muriro ez'ekisooroora kirungi ekirikushemeza MUKAMA. 14Kandi omunyaihanga ku ariba abashuhuukiiremu nari omuntu weena oriba atwire naimwe omu busingye bwanyu bwona, yaayenda kuhonga empongano ey'okwotsya omu muriro, ey'ekisooroora kirungi ekirikushemeza MUKAMA, nk'oku mutwaza, abe nikwo yaatwaza. 15#Gal 3:28; Kol 3:11. Ahabw'eihanga haryabaho ekiragiro kimwe ekitairweho ahabwanyu n'ahabw'omunyaihanga obashuhuukiiremu, ekiragiro ekitarihwaho omu busingye bwanyu bwona; nkaimwe oku muri, n'omunyaihanga nikwo ariba omu maisho ga MUKAMA. 16Muryagira ekiragiro kimwe n'omugyenzo gumwe hamwe n'omunyaihanga obashuhuukiiremu.

17MUKAMA yaagira Musa ati: 18Gambira Abaisraeli ebigambo byangye ebi ndikugamba ningira nti: Ku murihika omu nsi ei ndikubatwaramu, 19mwarya aha by'okurya byayo, muryahongyera MUKAMA empongano. 20#Neh 10:37; Enf 3:9. Aha saano ei muribanza kusa muryahonga omugaati kuba empongano; muryagihonga kuba empongano erugire aha mbuga y'okuhuuriraho. 21Aha saano ei muribanza kusa muryaihaho empongano y'okuhongyera MUKAMA omu busingye bwanyu bwona. 22#Lev 4:2. Kwonka ku murishobya, mutaarinda biragiro ebi byona, ebi MUKAMA yaaragiire Musa, 23nibyo byona ebi MUKAMA yaabaragiriire omuri Musa, okwiha aha kiro eki MUKAMA yaaragiriireho ebiragiro okuhitsya ebiro byona omu busingye bwanyu bwona, 24#Kub 28:15. kumuriba mutakikozire nkana, kandi kitaamanywa ihanga, eihanga ryona riryahonga enimi nto kuba ekitambo ky'okwotsya, eky'ekisooroora kirungi ekihongyeirwe MUKAMA, hamwe n'empongano y'esaano yaakyo n'empongano y'eby'okunywa byakyo, nk'emigyenzo yaabyo oku eri, kandi n'empaya y'embuzi kuba ekitambo ky'ekibi. 25#Lev 4:20; Heb 10:10-12; 1 Yoh 2:1, 2. Omunyamurwa arihiirire eihanga ry'Abaisraeli ryona, kandi riryasaasirwa; ahabw'okuba baryaba batakikozire nkana, kandi baryaba bareetsire empongano yaabo, eyokiibwe omu muriro, ehongyeirwe MUKAMA, bareetsire n'ekitambo ky'ekibi omu maisho ga MUKAMA ahabw'ekyo kibi ki batarakozire nkana. 26N'ahabw'ekyo eihanga ryona ery'Abaisraeli hamwe n'omunyaihanga oriba abashuhuukiiremu, baryasaasirwa; ahakuba eihanga ryona riryaba ritakikozire nkana.

27 # Luk 12:48. Kandi omuntu omwe ku arikora ekibi atakikozire nkana, ahongye omwagazi gw'embuzi oguhikize omwaka kuba ekitambo ky'ekibi. 28Omunyamurwa arihiirire ogwo oriba ashobize, akakora ekibi omu maisho ga MUKAMA, atakikozire nkana; ku ariheza kumurihiirira, ogwo muntu aryasaasirwa. 29Muryagira ekiragiro kimwe aha bw'omuntu weena okozire ekibi, atakikozire nkana, yaaba nzaarwa y'omu Baisraeli nari omunyaihanga oriba abashuhuukiiremu. 30#Zab 19:13; Heb 10:26-28. Kwonka omuntu weena orikora ekibi nkana n'amaryo, yaaba nzaarwa nari omunyaihanga, ogwo muntu aryaba ajumire MUKAMA, kandi aryacuubwa omu ihanga rye. 31#2 Sam 12:9; Enf 13:13. Ahabw'okugaya ekigambo kya MUKAMA n'okushobya ekiragiro kye, ogwo muntu aryacwerwa kimwe, okutahikiirira kumugumeho.

32Abaisraeli ku baabaire bakiri omu ihamba, baashanga omuntu naatorotoora enku ahari sabato. 33Abaamushangire naazitorotoora, baamutwara ahari Musa na Arooni n'eihanga ryona. 34#Lev 24:12. Baamukingirana, ahabw'okuba bakaba batakagambiirwe oku baraamugire. 35#Kur 31:14, 15. MUKAMA yaagira Musa ati: Buzimazima omushaija ogwo aitwe; eihanga ryona rimuteerere amabaare aheeru y'orusiisira. 36Eihanga ryona ryamutwara aheeru y'orusiisira, ryamuteera amabaare, yaafa; nk'oku MUKAMA yaaragiire Musa.

37MUKAMA yaagira Musa ati: 38#Bir 22:12; Mat 23:5. Gambira Abaisraeli, bagume bakore ebijwengye aha mikugiro y'ebijwaro byabo omu busingye bwabo bwona, kandi babaziire aha kijwengye ky'ahari buri nshonda akenda ka bururu; 39#Ezk 6:9; Zab 106:39; Yak 4:4. kibe ekijwengye eki muraagume nimureebaho, mukaijuka ebiragiro byona ebya MUKAMA, mukabyorobera, mukareka kukuratira ebi emitima yaanyu n'amaisho gaanyu byetenga, ebi mwabaire mukurata nimuraaya; 40#Kol 1:22; 1 Pet 1:15. mubone kwijuka n'okworobera ebiragiro byangye byona, n'okuba abarikwera ahari Ruhanga waanyu. 41Niinye MUKAMA Ruhanga waanyu owaabaihire omu nsi ya Misri okuba Ruhanga waanyu. Niinye MUKAMA Ruhanga waanyu.

Currently Selected:

Okubara 15: RR64

Highlight

Copy

Compare