Yeremia 4
4
Ruhanga okumanyisa Abayuda ebifubiro ebiribabaho
1 #
Yoel 2:12. MUKAMA naagira ati:
Iwe Israeli, ku oraikirize kugaruka,
Obe niinye waagarukira;
Kandi ku oraiheho ebihagaro byawe, byanduga omumasiho,
Otarikubangaanisa,
2 #
Bir 6:13; Zab 72:17; Isa 65:16; 1 Kor 1:31; 2 Kor 10:17. Ku oraarahire oti: Nindahira MUKAMA ohuriire,
Waarahira omu mazima, omu buryo n'omu kuhikiirira,
Obwo amahanga garyayeshabira omugisha omuriwe,
Kandi omuriwe nimwo garyesiimira.
3 #
Hos 10:12; Mat 13:7, 22. Ahakuba oku nikwo MUKAMA arikugambira abantu ba Yuda n'abatuuzi ba Yerusaalemu, ati:
Mutabire endaara zaanyu,
Kandi mutabiba omu mahwa;
4 #
Yer 9:26; Bir 10:16; 28:20; Rom 2:28, 29. Mweshare, mube aba MUKAMA,
Mwiheho ekishushu ekiri aha mitima yaanyu,
Imwe aba Yuda n'abatuuzi ba Yerusaalemu,
Ekiniga kyangye kitakaija nk'omuriro,
Kikabuguma, hakabura owaakiraaza,
Ahabw'obubi bw'ebi murikukora.
5 #
Yer 6:1; 8:14; Hos 5:8; Yoel 2:1. Mukimanyise omuri Yuda, mukirangye omuri Yerusaalemu nimugira muti:
Muteere enzamba omu nsi yoona,
Mugambe n'eiraka rihango nimugira muti:
Muteerane, tuze omu ndembo ezeehinguririziibwe engo z'amabaare;
6 #
Yer 1:13. Mwimutsye orurango, nimureeba Saayuuni,
Muhungye, musherure obukiriro muteeziringa;
Ahabw'okuba naaza kureeta akabi karugye aha bukiizi-bwa-bumosho,
Ndeete n'okucwekyerera kw'amaani.
7 #
Yer 2:15; 33:10; Zef 2:5; Isa 5:9. Entare erugire omu kishaka kyayo,
Omuhwerekyerezi w'amahanga ari omu muhanda;
Arugire owe, naija kucwekyereza ensi yaawe,
Endembo zaawe zibe amatongo, zibure ab'okuzituuramu.
8 #
Zab 78:49; Isa 13:9-13; 22:12; Tonz 2:10. N'ahabw'ekyo mwezirikye ebiguniya,
Mucure, muboroogye,
Ahabw'okuba ekiniga kya MUKAMA tikikaturugireho.
9 #
Zab 48:4, 5. Kandi MUKAMA yaagira ati: Ahari eryo izooba omutima gw'omugabe, n'ey'abategyeki, eryayehwa amatsiko; abanyamurwa baryayekwata aha munwa, na baanabi bashoberwe. 10#1 Bag 22:22; Ezk 14:9. Bwanyima naagira nti: Ai bambe, Mukama RUHANGA, buzimazima obeiheire kimwe eri ihanga n'aba Yerusaalemu, noogira oti: Muryaba gye; haza kunu rurara ehikiire kimwe aha magara gaabo.
11Omu biro ebyo baryagira eri ihanga n'aba Yerusaalemu bati: Omuyaga ogurikwotsya kuhuuha abantu bangye, ogurireetwa omu bibungo by'emparamaata eby'omu ihamba, gutari gw'okuheheeza nari okushemeza, 12#Yer 1:16. kureka ogw'amaani okukira aho, niinye gurikwizira. Mbwenu niinye ndikugamba nimbacwera orubanja.
13 #
Isa 5:28; Tonz 4:19. Reeba, naija nk'ebicu,
Ebigaari bye by'orugamba biri nk'akasoorora,
N'embaraasi ze nizirahuka okukira amashamba.
Tutoore hi? Ka twaza kuhwaho!
14 #
Yer 9:19; Isa 1:16; Zab 51:2, 7; Yak 4:8. Iwe Yerusaalemu, yoozya obubi aha mutima gwawe,
Obone kujunwa.
Ebiteekateeko byawe bibi biryahitsya hi
Kuguma omuriiwe!
15 #
Yer 8:16. Ahabw'okuba eiraka eririkuruga Daani nirigamba,
Niriranga obubi niryema omu bibungo bya Efuraimu.
16 #
Yer 5:15. Mugambire amahanga, ku arikwija;
Mumanyise aba Yerusaalemu nimugira muti:
Abagotsi nibaija nibaruga omu nsi ya hare,
Nibateerera endembo za Yuda orwari.
17 #
Yer 6:3; 2 Bag 25:1-4. Bagyehinguririize nk'abarinzi b'omusiri kugiteera,
Ahabw'okuba ekangomera; nikwo MUKAMA arikugira.
18 #
Yer 2:19; Isa 50:1. Emitwarize yaawe n'ebi orikukora
Nibyo bikureeteire ebyo.
Ekyo nikyo kifubiro kyawe, kandi nikishaarira,
Ahabw'okuba kikuhikiire kimwe aha mutima.
Yeremia okusaasibwa Abayuda ahabw'okwanga kweteisa
19 #
Yer 9:1; Hab 3:16. Ai bambe! Ai bambe! Nyine obusaasi bwingi;
Omutima gwangye tigwine buhuumure.
Tindikubaasa kuhunama,
Ahabw'okuba nimpurira eiraka ry'enzamba,
N'enduuru y'orugamba.
20 #
Yer 10:20; Ezk 7:26. Ebihikiirizi nibiihaihana,
Ensi yoona ehindwirwe amatongo;
Amahema gangye nigacwekyerezibwa kitaraariirwe,
Emikingo yangye neecwekyerezibwa omu kaanya kakye.
21Niinyija kuheerera hi n'okureeba orurango,
N'okuhurira eiraka ry'enzamba?
22 #
Zab 36:3; Isa 1:3, 16, 17; Rom 16:19. Ahabw'okuba abantu bangye n'abashema,
Tibarikummanya;
N'abaana bataine bwengye,
Kandi abatarikwetegyereza.
Omu kukora ebibi n'abanyabwengye,
Kwonka omu kukora ebirungi tibaine ki barikumanya.
23 #
Kut 1:2; Isa 5:30. Ku naayetegyereize ensi, naareeba eri amatongo, kandi erimu busha,
N'eiguru ritarimu kashana.
24 #
Nah 1:5. Ku naayetegyereize enshozi, naareeba nzitengyeta,
N'ebibungo byona nibizonga.
25 #
Zef 1:3. Ku naayetegyereize, naareeba hatariho muntu,
N'ebirikuguruka omu mwanya byona byahungire.
26 #
Zab 107:34. Ku naayetegyereize, naareeba ensi, eyaabaire eyeza, yaabaire eihamba,
N'endembo zaayo zoona zaasheenyeirwe
omu maisho ga MUKAMA, omu maisho g'ekiniga kye kingi.
27 #
Yer 46:28; Neh 9:31. Ahakuba oku nikwo MUKAMA arikugamba naagira ati: Ensi yoona eryaba amatongo; kwonak tindigimariraho kimwe.
28 #
Kub 23:19; Isa 50:3; Hos 4:3. Nikyo ensi ericurira,
N'eiguru rikairagura,
Ahabw'okuba nkakigamba, naakimariirira,
Tindikyefuuza, kandi tindikireka.
29Ab'omuri buri rurembo baryahunga
Ahabw'okuhurira endigito y'ab'aha mbaraasi n'ab'amata,
Bashenshere omu bishaka, bataahe omu nkiri,
Endembo zoona zitsigweho,
Habure owaazituuramu.
30 #
2 Bag 9:30; Tonz 1:2, 19; Ezk 23:22. Mbwenu iwe nshoberwa 'we,
N'enki ekirikukujwaza karari,
Okeehunda eby'ezaabu,
Okahangusya amaisho gaawe n'erangi?
Nooyeshemereza busha,
Nkunzi zaawe nizikugaya,
Kandi nizihiiga amagara gaawe.
31 #
Isa 1:15; 13:8; Tonz 1:17. Ahabw'okuba mpuriire eiraka nk'ery'omukazi orikurumwa,
Obusaasi nk'obw'omukazi orikujigaija,
Eiraka rya Saayuuni orikusheemeeka,
Akanaga emikono, naagira ati:
Ai bambe! naagwa omu maisho g'abaitsi.
Currently Selected:
Yeremia 4: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
