Yeremia 3

Ruhanga okweshengyereza Yuda na Israeli kumugarukira

1 # Bir 24:1-4; Zab 106:38. Omushaija ku ashenda omukazi we,

Ogwo mukazi yaamurugaho

Yaaba muka ondiijo,

Iba aryagaruka amushwere?

Egyo nsi tekaasiisikara munonga?

Iwe okaraaya na bashambane baawe baingi,

Ebyo nookingarukira? nikwo MUKAMA arikugira.

2 # Kub 23:3; Ezk 16:25. Naga amaisho gaawe aha bibungo by'emparamaata, oreebe;

Ahu otarashambaniire ni nkahi?

Okaba oshutama aha rubaju rw'omuhanda, otegyereize bashambane baawe

Nk'Omuharabu omu ihamba.

Oshiisha ensi n'ebihagaro by'obwamaraaya bwawe.

3 # Yer 6:15; 9:12; 14:22; Bir 28:24. Nikyo kyazibiire enjura kugwa,

Enjura ya katumba ekabura;

N'obu kiraabe kyabaire kityo, okaguma oyomire aha maisho nka maraaya,

Tiwaagira kashoni.

4Na hati tokantakiire, oti:

Taata, niiwe mugyenzi wangye omu buhangare bwangye;

5 # Zab 103:9. Kandi oti: Aryaguma n'ekiniga ebiro byona?

Aryaguubwa kubi okuhitsya aha muheru?

Reeba okwo nikwo waagizire,

Kwonka okakora ebibi byona nk'oku orikwenda.

6 # Yer 2:20. Kandi omu biro by'omugabe Yosia, MUKAMA akangira ati: Oreebire eki Israeli owaagarukire enyima yaakozire? Akatemba ekibungo kyona ekiraingwa, yaaza ahansi ya buri kiti kibisi ekyetwa omurinzi, yaashambanirayo. 7#Ezk 16:46; 23:4. Naateekateeka nti: Bwanyima y'okukora ebyo byona, naija kungarukira. Kwonka tiyaagaruka; kandi omurumuna Yuda endeebya yaakireeba. 8#2 Bag 17:18; Hos 1:6, 9; Mat 19:7. Kandi egyo ndeebya Yuda, n'obu araabe yaareebire oku naabinga mukuru we Israeli, nkamuha ebaruha y'okumushenda nimmutura obushambani bwe bwona, taratiinire, kureka nawe akagyenda, yaaza kuraaya. 9#Yer 2:27. Ahabw'okwo kuraaya kumurahukira, yaashiisha ensi, naashambana n'amabaare n'ebiti. 10Ebyo byona n'obu biraabe byabaire bityo, egyo ndeebya Yuda tarangarukiire n'omutima gwe gwona, kureka omu kuryarya; nikwo MUKAMA arikugira.

11 # Ezk 16:51, 52. Kandi MUKAMA yaagaruka yangira ati: Israeli owaagarukire enyima, ayeyorekire ku ataine rubanja nk'orwa Yuda endeebya. 12#Yer 2:18; Zab 86:5, 15; 103:9; Bir 30:1-10. Irooko, orangire ebi bigambo aharikureeba aha bukiizi-bwa-bumosho noogira oti: Oku nikwo MUKAMA arikugamba naagira ati:

Garuka, iwe Israeli owaagarukire enyima,

Tindikwija kukureebesa kiniga,

Ahabw'okuba ndi ow'embabazi;

Tindiguma na kiniga ebiro byona;

Nikwo MUKAMA arikugira.

13Kwonka oyemere ekibi kyawe,

Ku waagomeire MUKAMA Ruhanga waawe,

Okayabatikana n'abanyamahanga

Ahansi ya buri kiti kibisi ekyetwa omurinzi,

Kandi otoorobere iraka ryangye;

Nikwo MUKAMA arikugira.

14 # Isa 54:5; 62:5; Hos 14:1; Mal 2:11. Imwe baana abaagarukire enyima 'mwe,

Nimugarukye; nikwo MUKAMA arikugira;

Ahabw'okuba niinye mukama waanyu.

Ndyabatwara niinyiha omwe-omwe omu rurembo,

Babiri-babiri omu ruganda,

Mbahitsye Saayuuni.

15 # Yer 23:4; Ezk 34:23; Yoh 10:11; Byak 20:28. Kandi ndyabaha abariisa abarikunshusha omutima, babariise n'obwengye n'okwetegyereza. 16Omu biro ebyo ku muriheza kukanya, mwaba baingi omu nsi, tibarigaruka kugamba ha by'eshenduukye y'endagaano ya MUKAMA; teriteekateekwaho, teriijukwa, kandi tibarigyefuuza n'obu kwakuba okugaruka kugikora. 17#Yer 7:24; 9:14; 11:8; Isa 2:2, 3; 60:9. Omu bunaku obwo Yerusaalemu eryayetwa ekitebe kya MUKAMA eky'obukama, amahanga goona garyakiteeraniraho, ei MUKAMA ariomuri Yerusaalemu, kandi tibarigaruka kukuratira obugangaazi bw'emitima yaabo emibi. 18#Yer 16:15; 23:8; 31:8; 50:4; Isa 11:13; Ezk 37:21, 22; Hos 1:11; Amo 9:15. Omuri ebyo biro enju ya Yuda eryakwatanisa n'eya Israeli, bombi barugye omu nsi y'omu bukiizi-bwa-bumosho, bataahe omu nsi ei naahaire baashwenkuriimwe kuba obuhunguzi bwabo.

19 # Isa 63:16. Nkagira nti: Ka nkubarire omuri batabani bangye,

Nkuhe ensi nungi,

Obuhunguzi burungi munonga okukira obw'amahanga goona.

Kandi naagira nti: Oryanyeta Sho, torindugaho.

20Kwonka iwe nju ya Israeli 'we, otuura nondeebya,

Nk'oku omukazi endeebya atsigaho iba.

Nkwo MUKAMA arikugira.

21 # Yer 31:9. Eiraka nirihuririrwa omu bibungo by'emparamaata,

Okurira n'okweshengyereza kw'abaana ba Israeli

Ahabw'okushiisha emitwarize yaabo,

Bakeebwa MUKAMA Ruhanga waabo.

22 # Yer 30:17. Imwe baana baagarukire enyima 'mwe, nimugarukye;

Niinyija kubatambira okugaruka enyima kwanyu.

Reeba, twaija ahariiwe, Ahabw'okuba ori MUKAMA Ruhanga waitu.

23 # Zab 3:8; 121:1, 2. Buzimazima okuteerera omuhira aha bibungo

N'okubandirwa aha nshozi n'ebya busha;

Buzimazima okujunwa kwa Israeli

Kuri omuri MUKAMA Ruhanga waitu.

24Kwonka okwiha omu buto bwaitu ekirikwitsa enshoni kimazireho byona ebi baatatenkuriitwe baahendekyeire, amasyo gaabo ag'entaama n'ag'ente, kandi na batabani baabo na bahara baabo. 25#Ezr 9:6, 7; Ezk 2:3. Ka tubyame n'enshoni zaitu, okuhemuka kwaitu kutushwekye, ahabw'okuba tukacumura ahari MUKAMA Ruhanga waitu, itwe na baatatenkuriitwe, okwiha omu buto bwaitu n'okuhitsya eri izooba, kandi titukooroberaga iraka rya MUKAMA Ruhanga waitu.

Currently Selected:

Yeremia 3: RR64

Highlight

Copy

Compare