Yeremia 32
32
Yeremia okuragiirwa okugura omusiri Anatoosi
1 #
Yer 39:1, 2; 52:4, 12. Omu mwaka gwa ikumi ogw'omu bisingye bwa Zedekia omugabe wa Yuda, nigwo mwaka gwa ikumi na munaana gwa Nebukadeneeza, ekigambo kikaruga ahari MUKAMA, kyaija ahari Yeremia. 2#Yer 3:1; 37:21; 38:6, 13; 39:14; Zab 88:8. Omu bunaku obwo eihe ry'omguabe wa Babulooni rikaba rigootsire Yerusaalemu, kandi nabi Yeremia akaba akomeirwe omu kibuga ky'abarinzi ekiri omu kikaari ky'omugabe wa Yuda. 3#Yer 21:10. Ahakuba Zedekia omugabe wa Yuda akaba amutaire omu kihome, naamugira ati: Ahabw'enki noohanuura, okagira oti: Oku nikwo MUKAMA arikugamba naagira ati: Reeba, oru rurembo niinyija kuruhayo omu mikono y'omugabe wa Babulooni, arukwate; 4na Zedekia omugabe wa Yuda tarikira Bakaludaaya, kureka buzimazima aryaheebwayo omu mikono y'omugabe wa Babulooni, bagambe hamwe nibareebana; 5#Yer 21:4; 39:7. bwanyima aryatwara Zedekia Babulooni; okwo niyo ariguma okuhitsya obu ndimutaayaayira; nikwo MUKAMA arikugira. N'obu murirwanisa Abakaludaaya, timuribabaasa.
6Yeremia yaagira ati: Ekigambo kya MUKAMA kiinyizireho nikigira kiti: 7#Yer 35:4; Lev 25:25; Rus 4:4. Reeba, Hanameeli, mwene Shalumu shwento, naija kukwijaho akugire ati: Gura ekibanja kyangye ekiri Anatoosi; ahabw'okuba niiwe oine obushoboorozi bw'okukicungura, okakigura. 8Bwanyima Hanameeli mwene tatento yanshanga omu kibuga ky'abarinzi, nk'oku ekigambo kya MUKAMA kyabaire kiri, yangira ati: Ninkweshengyereza, gura ekibanja kyangye ekiri Anatoosi omu ishaza rya Benyamiini; ahabw'okuba niiwe oine obushoboorozi bw'okukihungura n'okukicungura; mbwenu okyegurire. Ntyo naamanyira aho ku ekyo kigambo kirugire ahari MUKAMA.
9 #
Kut 23:16; Zek 11:12; Mat 26:15. Bwnayima naagura ekyo kibanja ekyabaire kiri Anatoosi hari Hanameeli mwene tatento, naamupimira obuguzi bwakyo, shekeli z'efeeza ikumi na mushanju. 10Naata omukono aha ndagaano, naagitaho akamanyiso, naareeta baakareebi, naapima efeeza aha minzaani. 11Bwanyima naatwara endagaano y'okugura eitairweho akamanyiso, hamwen na kopi yaayo etakubire, nk'ebiragiro n'emigyenzo byabyo oku byabaire biri; 12#Yer 36:4; Isa 8:2. egyo ndagaano naagiheera Baruki mwene Neria, mwijukuru wa Maaseya, omu maisho ga Hanameeli mwene tatento, n'omu maisho ga baakareebi abataire emikono aha ndagaano, kandi n'omu maisho g'Abaydaaya boona abaabaire bashutami omu kibuga ky'abarinzi. 13Naayehanangiririza Baruki omu maisho gaabo nti: 14Oku nikwo MUKAMA ow'amahe, Ruhanga wa Israeli, arikugamba naagira ati: Twara ezi ndagaano z'okugura, egi etairweho akamanyiso n'etakubire, ozite omu nyungu y'eibumba, zibone kumara ebiro bingi. 15Ahabw'okuba oku nikwo MUKAMA ow'amahe, Ruhanga wa Israeli, arikugamba naagira ati: Amaju n'emisiri n'emisiri y'emizaabibu, biryagaruka bigurwe omu nsi egi.
16Ku naaherize kuha Baruki mwene Neria egyo ndagaano y'okugura, naashaba MUKAMA ningira nti: 17#Kut 18:14; Isa 37:16. Ai Mukama RUHANGA, niiwe waahangiise eiguru n'ensi obushoboorozi bwawe n'omukono gwawe ogugoroire. Tihariho kintu na kimwe ekikurema. 18#Yer 10:16; Kur 20:6; 34:7; Zab 79:12; Isa 9:6. Iwe ogirira embabazi abantu enkumi n'enkumi. Kwonka ohoora abaana noobatura ebibi bya baihsenkurubo. Ori Ruhanga omukuru; MUKAMA ow'amahe niryo iziina ryawe. 19#Yer 16:17; 17:10; Zab 66:3, 5; Isa 28:29. Ori rugambwa omu naama, kandi omu kukora ori ow'amaani; amaisho gaawe gareeba emitwarize y'abantu yoona, noozimuurira buri muntu nk'emitwarize ye n'ebirugire omu bi akaozire oku biri. 20#2 Sam 7:23; Neh 9:10; Zab 135:9. Niiwe waayorekire obumanyiso n'eby'okutangaaza omu nsi ya Misri, okaguma noobyoreka omu Baisraeli n'omu bantu boona n'okuhitysa hati, kandi okeetungira eiziina, nk'oku kiri hati. 21#Kur 6:6. Okaiha abantu baawe Abaisraeli omuri Misri, waabaihisayo obumanyiso n'eby'okutangaaza n'omukono gw'amaani ogubangire n'okutiinsia kwingi; 22#Kur 3:8. waabaha ensi egi, ei waarahiire kuha baishenkurubo, ensi y'amate n'obwoki, 23#Yer 11:8. baagizamu, baagikubuura; kwonak tibaayorobera iraka ryawe, n'obu kwakuba okugyendera omu biragiro byawe; tibaagira kintu na kimwe eki baakora omu bi waabaragiire byona. Nikyo waabareeteireho akabi aka koona. 24#Yer 6:6; 14:12. Reeba eby'okutemberaho bigootsire orurembo; baahikire aha rurembo kurukwata; kandi orurembo ruhairweyo omu mikono y'Abakaludaaya, abarikururwanisa, ahabwa rurara n'enjara n'orufu. Ebi waagambire byona bihikiriire; naiwe nookireeba. 25Kwonka ai Mukama RUHANGA, n'obu orurembo ruraabe ruhairweyo omu mikono y'Abakaludaaya, ongizire oti: Gura ekyo kibanja n'efeeza, kandi ogire baakareebi.
26Bwanyima ekigambo kya MUKAMA kyagaruka kyaija ahari Yeremia nikigira kiti: 27#Kut 18:14; Kub 16:22. Reeba, ndi MUKAMA, Ruhanga w'ebiine omubiri byona; hariho ekirikundema? 28N'ahabw'ekyo, oku nikwo MUKAMA arikugamba naagira ati: Reeba, naaza kuhayo oru rurembo omu mikono y'Abakaludaaya n'omu mikono ya Nebukadeneeza omugabe wa Babulooni, arukwate. 29#Yer 7:18; 19:13; 21:10. Abakaludaaya abarikururwanisa nibaija kwija, barutwekyemu omuriro, barwotsye, hamwe n'amaju agu batuura nibootererera aha mitwe yaago Baali obubaane, bakashukiriraho baaruhanga abandi empongano z'eby'okunywa, kungwisa kubi. 30#Yer 3:25; 25:6, 7. Ahakuba Abaisraeli n'Abayuda, okwiha omu buto bwabo, tibaine kindi eki barakozire omu maisho gangye kureka ebibi byonka; kandi Abaisraeli tibaine kindi eki barakozire kureka okungwisa kubi n'ebi bakora; nikwo MUKAMA arikugira. 31#2 Bag 23:27. Oru rurembo rukanyitsa ekiniga, rwangwisa kubi, okwiha aha izooba eri rwayombekyeirweho n'okuhitsya hati; n'ahabw'ekyo niinyija kurwiha omu maisho gangye, 32nintura Abaisraeli n'Abayuda ebibi byona ebi baakozire kungwisa kubi, abagabe baabo, abanyiginya baabo, abanyamurwa baabo, baanabi baabo, abantu ba Yuda n'abatuuzi ba Yerusaalemu. 33#Yer 2:26, 27; 7:24; Ezk 8:16. Omu mwanya gw'okuntaho amaisho bakanteera omugongo; kandi n'obu ndaabe ntuura nimbegyesa, tibakategaga matu kuhurira okwegyesibwa. 34#Yer 7:30, 31. Bakata ebirikunugwa byabo omu nju erikwetererwa eiziina ryangye kugihagara. 35#Lev 18:21; 1 Bag 16:19. Bakombekyera Baali emyanya mikuru y'okuramizamu omu ruhanga rwa mwene Hinoomu, kuhongyererayo Moleki abaana baabo b'aboojo n'ab'abaishiki, eki ntarabaragiire, kandi ekitakaijaga mu biteekateeko byangye, ngu bakore ekirikunugwa ekyo okusiisisa Yuda.
Yeremia okuhanuura aha ndagaano nsya n'embabazi za Ruhanga
36N'ahabw'ekyo oku nikwo MUKAMA, Ruhanga wa Israeli, arikugamba ahari oru rurembo oru orikugira ngu ruhairweyo omu mikono y'omugabe wa Babulooni kwitwa rurara, enjara n'orufu, 37#Yer 21:5; 23:3; 33:16; Bir 29:28; Ezk 34:25. naagira ati: Reeba, ndyabataaruura, mbaihe omu nsi zoona ezi naababingiiremu, ngwirwe kubi, nyine ekiniga, kandi nyine ekiniga kingi, mbagarure omuri ogu mwanya, mbatuuzemu buhooro. 38#Yer 30:22; 31:33. Kandi baryaba abantu bangye, naanye mbe Ruhanga waabo. 39#Ezk 11:19, 20. Ndyabaha omutima gumwe n'emitwarize emwe, babone kuntiina ebiro byona, babe gye, bo n'abaana baabo abarikurataho. 40#Isa 55:3; Ezk 16:60. Ndyaragaana nabo endagaano etarihwaho, ku ntarireka kubakorera gye, kandi ndyata okuntiina omu mitima yaabo, ngu barekye kundugaho. 41#Yer 24:6. Ndyashemerererwa okubakora gye, mbabyare omuri egi nsi omu mazima n'omutima gwangye gwona n'amagara gangye goona.
42 #
Yer 31:28. Ahakuba oku nikwo MUKAMA arikugamba naagira ati: Nk'oku naareetsire ako kabi kahango koona ahari aba bantu, nikwo ndibareetaho ntyo ebirungi byona ebi ndikubaraganisa. 43#Yer 33:10. Bwnayima egi nsi, ei murikugirangu n'amatongo, etarimu bantu nari amatungo, kureka ehairweyo omu mikono y'Abakaludaaya, niyo muriguramu ebibanja. 44#Yer 17:26; 30:3. Abantu baryagura ebibanja n'empiiha, bahandiikye endagaano z'okugura, baziteho emikono n'akamanyiso kandi zigire na baakareebi, omu ishaza rya Benyamiini, omu myanya eyehinguririize Yerusaalemu, omu ndembo za Yuda, omu ndembo z'omu nsi y'ebibungo, omu z'omu mpita n'omu ndembo z'omuri Negebu; ahabw'okuba ndyagarura abantu baabo abaatwairwe omu bukwatwa.
Currently Selected:
Yeremia 32: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
