Yeremia 22
22
Okuhanuurira abagabe ba Yuda ebiribabaho
1Oku nikwo MUKAMA arikugamba naagira ati: Shuuma oze ow'omugabe wa Yuda, ogambireyo ekigambo eki, 2noogira oti: Iwe mugabe wa Yuda 'we ori aha ngoma ya Daudi, hurira ekigambo kya MUKAMA, iwe n'abagaragwa baawe n'abantu baawe abaraba omuri aga marembo. 3#Yer 7:5, 6; 26:15; Lev 19:33; Zab 82:3; Isa 1:17. Oku nikwo MUKAMA arikugamba naagira ati: Mugume mukore eby'oburyo n'eby'okuhikiirira, abanyagirwe mubaihe omu mikono y'abarikubahata, kandi omunyaihanga n'efuuzi n'omufaakazi mutabakora kubi, n'obu kwakuba okubakorera eby'obubisha, nari okusheesha eshagama y'abataine rubanja omuri ogu mwanya. 4#Yer 17:25. Ahabw'okuba ku muraayorobere ekigambo eki omu mzaima, abagabe abari aha ngoma ya Daudi baryaguma nibataahira omu marembo g'ebikaari by'egi nju, bari omu bigaari by'orugamba n'aha mbaraasi, bo n'abaragwa baabo, n'abantu baabo. 5#Yer 25:11, 18; 44:6, 22; 49:13; 51:14; Kut 22:16; Isa 64:10; Ezk 5:14; Amo 6:8; Heb 6:13. Kwonka ku muraayangye kuta omutima ahari ebyo bigambo, niinyerahira ti: Egi nju eryahinduka omushaka; nikwo MUKAMA arikugira. 6#Yer 6:4. Ahabw'okuba oku nikwo MUKAMA arikugamba aha nju y'omugabe wa Yuda ati:
Ombeereire nka Gileadi,
N'omutwe gw'orushozi Lebanooni,
Kwonka buzimazima ndyakuhindura eihamba ry'omusheenyi,
Orurembo orutatwirwemu.
7 #
2 Bag 19:23. Ndyakuteekateekyera abahwerekyerezi b'okukirwanisa,
Buri omwe akwaitse eby'okurwanisa bye;
Baryatema emyereezi yaawe erikukira oburungi,
Baginagye omu muriro.
8 #
Yer 5:19. Amahanga maingi garyaraba ahari oru rurembo, buri muntu abuuze mugyenzi we ati: Ahabw'enki MUKAMA agizire ati oru rurembo ruhango? 9#Bir 29:25, 26. Nabo baryagarukamu bati: Ahabw'okuba bakatsigaho endagaano ya MUKAMA Ruhanga waabo, baaramya baaruhanga abandi, baabaheereza.
10 #
2 Bus 35:24, 25. Mutacurira ofiire,
N'obu kwakuba okumuboroogyera,
Kureka muririre munonga ogyenzire,
Ahabw'okuba tarigaruka bundi
Kureeba ensi ye y'obuzaarwa.
11 #
2 Bag 23:34; Ezk 19:4. Ahabw'okuba oku nikwo MUKAMA arikugamba ahari Shalumu mwene Yosia omugabe wa Yuda, owaahungwire engoma ya Yosia ishe, kandi owaagyenzire, akaruga omuri ogu mwanya, naagira ati: 12Tarigaruka aha bundi, kureka ei baamutwairwe ari enkwatwa, niyo arigwa, kandi tarigaruka kureeba egi nsi.
13 #
Lev 9:13; 25:39; Isa 5:18-23; Mik 3:10; Hab 2:12. Aryakareeba, orikwombekyesa enju ye okutahikiirira,
N'ebishengye bye akabyombekyesa obutainganisa,
Orikukoreseza mutaahi we busha,
Atamuhe bihembo bye,
14Orikugira ati: Ndyayeyombekyera enju rutaaba,
Eine ebishengye bihango by'ahaiguru,
Ngicwemu amadirisa,
Ngikiikizemu embaaho z'emyereezi,
Ngisiigye erangi erikutukura.
15 #
2 Bag 23:25; Zab 128:2; Mub 8:12; Isa 3:10. Noogira ngu okwenda kukira abandi omu kwombekyesa emyereezi
Nikyo kiraakugire omugabe?
Sho akaba atarya, akanywa,
Kandi omu biro bye taratungire, akagogyera?
16 #
Bar 2:10; Enf 31:9; Ezk 22:13. Akaba acwera abooro n'abakyene emanja.
Nabwo biba gye.
Okwo tikwo kummanya?
Nikwo MUKAMA arikugira.
17Kwonka amaisho gaawe n'omutima gwawe
Nibiruruuhira amagoba gatari g'amazima,
Kusheesha eshagama y'abataine rubanja,
N'okukora eby'okuhata n'eby'obubisha.
18 #
Yer 16:4-6; 34:5; 1 Bag 13:30. Nikwo MUKAMA arikugamba ahari Yehoyakimu mwene Yosia omugabe wa Yuda ati:
Tibarimutongyeza nibagira bati:
Ai bambe, mukuru wangye! nari shi bati, Ai bambe munyaanyazi!
Kandi tibarimutongyeza nibagira bati:
Ai bambe, mukama wangye! nari shi bati, Nangwa ndikaitwa ekyo kitiinisa kye!
19 #
Yer 8:2; 36:30. Aryaziikwa nk'oku baziika endogoya,
Akururwe, anagwe enyima y'amarembo ga Yerusaalemu.
20 #
Bir 32:49. Inamuka oze Lebanooni oteere enduuru;
Oimutsye eiraka ryawe omuri Bashani,
Oboroogye nooyema Abariimu,
Ahabw'okuba nkunzi zaawe zoona zicwekyereziibwe.
21Nkagamba naiwe obu waabaire ogogyeire,
Kwonka wangira oti: Tindikwija kukuhurira.
Egyo niyo yaabaire eri emitwarize yaawe,
okutoorobera iraka ryangye okwiha omu buto bwawe.
22 #
Yer 3:25; 23:1; Ezk 34:10. Omuyaga guryariisa abariisa baawe boona,
Nkunzi zaawe zize omu bukwatwa;
Obwo nibwo oriitwa enshoni, okabwerabwera
Ahabw'obubi bwawe bwona.
23 #
Yer 6:24; Isa 13:8. Iwe mutuuzi wa Lebanooni 'we,
Otwire omu myereezi,
Eshi oryatsinda ku orihikwaho obusaasi,
Waagira ebisha nk'omukazi orikwenda kuzaara!
24 #
1 Bag 21:8; Kyesh 8:6; Isa 49:18; Hag 2:23. MUKAMA naagira ati: Niinyerahira, iwe Konia mutabani wa Yehoyakimu omugabe wa Yuda, n'obu waakuba empeta y'akamanyiso aha rukumu rw'omukono gwangye gwa buryo, nkaakuhuruuturaho, 25#Yer 34:20; 39:17. nkuhayo omu mikono y'abarikwenda kukwita, omu mikono ya Nebukadeneeza omugabe wa Babulooni n'omu y'Abakaludaaya. 26#2 Bag 24:8, 15. Kandi iwe na nyoko kikuzaara ndyababinga, mbanagye omu ndiijo nsi, ei otarazaariirwemu; okwo niyo murigwa. 27#Yer 44:14. Kwonka ensi ei baryatenga munonga kugarukamu, tibarigigarukamu.
28 #
Yer 15:14; 48:38; Zab 31:12; Hos 8:8. Beitu ogwo mushaija Konia t'enyungu eyatikire erikugaywa,
Ei omuntu weena atarikwetaho?
Ahabw'enki we n'abaana be nibabingwa,
Kunagwa omu nsi ei batarikumanya?
29 #
Isa 1:2. Iwe nsi 'we, nsi 'we, nsi 'we,
hurira ekigambo kya MUKAMA!
30 #
Yer 36:30; 1 Bus 3:17; Mat 1:12. Oku nikwo MUKAMA arikugamba naagira ati:
Muhandiikye ogu mushaija nk'encwekye,
Omushaija otariba gye mu biro bye;
Ahabw'okuba tihariho w'omu ruzaaro rwe n'omwe oriba gye,
Akaza aha ngoma ya Daudi,
Akagaruka kutegyeka Yuda.
Currently Selected:
Yeremia 22: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
