Abaramuzi 5
5
Ekyeshongoro kya Debora na Baraki
1Eryo izooba Debora na Baraki mwene Abinoamu baayeshongora bati:
2Muhimbise MUKAMA,
Ahabw'okuba abeebembezi beebembeire Israeli,
N'abantu baayehayo beekundiire.
3Imwe bagabe 'mwe, nimuhurire; naimwe abanyiginya, mutegye amatu.
Naaza kweshongorera MUKAMA,
Nyeshongore eby'okuhimbisa MUKAMA Ruhanga wa Israeli.
4MUKAMA obu waaruga omuri Seiri,
Obu waashohora omu nsi ya Edomu noohurura,
Ensi ekatengyeta, n'eiguru ryatengatenga,
Ebicu byatoonya amaizi.#Zab 68:7, 8; Hab 3:3-6; Isa 64:3.
5Enshozi zaahimintika amaizi omu maisho ga MUKAMA,
Nangwa na Sinai yaaba etyo omu maisho ga MUKAMA Ruhanga wa Israeli.
6Omu biro bya Shamugaari mwene Anasi, n'omu bya Yayeli,
Emihanda rugyendwa ekaba etarabwa,
Abagyenzi bakaba bashenshebuka omu tuhanda tw'omu mbaju.#Bar 3:31; Isa 33:8; Tonz 4:18.
7Obwo abategyeki bahweire omuri Israeli,
Okuhitsya obu nyowe Debora naimukire,
Nkaimuka nk'omuzaire omuri Israeli.
8Baaruhanga basya ku baatairweho,
Engamba zaatengyerwa omu marembo.
Ha ngabo, nari icumu, ebyabaireho
Omu ngabo za Israeli obukumi buna.#1 Sam 13:19, 22; Bar 4:3.
9Omutima gwangye gwona guri aha beebembezi ba Israeli
Abaayehaireyo omu bantu n'omutima gwekundiire.
Muhimbise MUKAMA.
10Imwe abagyendera aha ndogoya za kisa, nimukibuzye,
Naimwe abashutama aha mikyeeka y'ekikama,
Kandi naimwe abagyendesa ebigyere omu mihanda.#Bar 12:14.
11Hare ei enduuru z'abarikurashana zirikureetwa,
Ei bataha amaizi,
Okwo niyo bariguma nibagambira eby'okuhikiirira ebi MUKAMA yaakozire,
Eby'okuhikiirira kw'omu butegyeki bwe omuri Israeli.
Nibwo abantu ba MUKAMA baashuuma, bakataaha omu marembo.
12Sisiimuka, sisiimuka, Debora!
Sisiimuka, sisiimuka, oyeshongore ekyeshongoro.
Imuka, Baraki, abaabaire bakukwatsire obatware bari enkwatwa,
Iwe mutabani wa Abinoamu.
13Haashuuma ab'ekitiinisa abaabaire batsigaireho;
Abantu ba MUKAMA baashuuma kumurwanira n'ab'amaani.
14Baaruga Efuraimu, baaza omu ruhanga,
Bakukuratiire, iwe Benyamiini, na beene waanyu;
Abakuru b'engabo baashuuma nibaruga Makiri,
N'omuri Zebuluuni haarugayo abaabaire batwara enkoni y'omukuru w'engabo.#Bar 3:27; 4:5, 6.
15Abanyiginya ba Isakaari baija na Debora,
N'abandi ba Isakaari abaabaire bari abeesigwa ahari Baraki;
Bairukira omu ruhanga, bamuri omu ntegye.
Aha migyera ya Reubeeni
Baagiriraho enaama ehamire.
16N'enki ekikugumize omu bibuga by'entaama,
Kuhurira emikuri ei barikuziteerera?
Aha migyera ya Reubeeni
Haabaho okwebuuza kuhango munonga.#Kub 32:1.
17Abagileadi beegumiire obuseeri bwa Yorudani;
Abadaani batsigaziibwe ki omu meeri?
Abaasheri bagumire beeshutamiire aha nyambukiro,
Baayegumira omu mikono y'enyanja.
18Abazebuluuni n'abantu aboogire amagara gaabo,
Tibatiinire kufa.
N'Abanafutaali bagiire omu kaso k'orugamba.#Bar 4:10; Kush 12:11.
19Abagabe baizire, baarwana,
Abagabe ba Kanaani baarwanira Tanaki
Aha migyera ya Megido;
Kwonka tibaine feeza zi banyagire.#Bar 4:16.
20Eiguru rihurwire;
Enyonyoozi omu ngyendo zaazo zaarwanisa Sisera.#Yos 10:12-14; Bar 4:15.
21Omugyera Kishoni gwabatwara,
Ogwo mugyera gwa ira Kishoni.
Iwe magara gangye, oribatiriire ab'amaani.#1 Bag 18:40.
22Obwo embaraasi zaabo zairuka nizishaayaguza,
Nizishaayaguza n'amaani.
23Mukyeene Merozi, nikwo maraika wa MUKAMA arikugira;
Mukyeene munonga abatwireyo,
Ahakuba tibaizire kuha MUKAMA emikono,
Kumuha emikono kurwanisa ab'amaani.#Bar 21:8, 9; Kub 32:6.
24Yayeli aheebwe omugisha okukira abakazi boona,
Muka Heberi Omukeeni aheebwe omugisha okukira abakazi abatuura omu mahema.#Luk 1:28.
25Ashabire amaizi, yaamuha amate;
Yaamureetera amate g'amakamo omu nkongooro y'ekitiinisa.
26Yaatayo omukono, yaihayo enkondo,
N'omukono gwe ogwa buryo yaihayo enyondo y'abakozi;
Yaamuteera enkondo omu mutwe n'enyondo,
Yaagimuteera omu kanenero, yaayogamu.
27Sisera yaayefunya, yaagwa;
Yaagangarama aha bigyere bye;
Ahu yaagwa, niho yaafeera.
28Nyina wa Sisera yaaringuririza omu dirisa,
Yaarabya amaisho omu tuhengyere, naagira ati:
Ahabw'enki ekigaari kye kyasiibayo munonga?
N'enki ekizibiire enyamuziga z'ebigaari bye kwija?
29Abaranga be b'obwengye baamugarukamu,
Eki yaaba naateekateeka, bati:
30Ebyo tibaabona eminyago?
Tibarikugibagana
Buri muntu omuzaana omwe nari babiri?
Sisera tarikubagana omunyago gw'emyenda y'ebicwererane by'amabara maingi;
N'emyenda y'amabara maingi agacwereraine embaju zombi
Ey'okukujweka omu bitsya?#Kur 15:9.
31Ai MUKAMA, abazigu baawe boona bacwekyerere batyo,
Kwonka abarikukukunda babe nk'oku eizooba rituruka n'amaani.
Okuruga aho ensi yaahuumura okumara emyaka makumi ana.#Zab 48:4, 5; Kush 6:10; Mat 13:43; Zab 19:5.
Currently Selected:
Abaramuzi 5: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964