Yakobo 1

1 # 1 Pet 1:1. Yakobo, omuhuuku wa Ruhanga na Mukama waitu Yesu Kristo, naabahandiikira nimbaramutsya, imwe enganda ikumi na ibiri ezaataataine.

Okugumisiriza okugyezibwa n'okwohibwa

2 # 1 Pet 1:6, 7. Beishe-emwe, ku muraagume mwahikwaho okugyezibwa kw'emiringo etari emwe, mukutwara nk'okushemererwa buzima; 3ahakuba nimumanya ngu okugyezibwa omu kwikiriza kwanyu kurugamu okugumisiriza. 4Kandi murekye okugumisiriza kuhitsye omurimo gwakwo, naimwe mubone kuba abahikire omuri byona, mutaine ki mubuzirweho.

5 # Enf 2:3-6. Kwonka omuriimwe ku haraabe harimu obuzirwe obwengye, abushabe Ruhanga, oha boona n'omutima ogutarikwima, n'obu kwakuba okweshaamya, kandi aryabuheebwa. 6#Mak 11:24. Kwonka ashabe aine okwikiriza, atarikubanganisa, ahakuba orikubanganisa naashusha nk'ekingonzi ky'enyanja ekirikutwarwa omuyaga oku n'oku. 7Kandi omuntu ogwo arekye kuteekateeka ngu Mukama naija kumuha ekintu kyona; 8ahakuba aine emitima ebiri, kandi omu mihanda ye taine hu ahamiire.

9 # Yak 2:5. Ow'eishe-emwe omworo ayehimbise. Ahabw'okutunguurwa kwe; 10#1 Pet 1:24. kandi n'omutungi ayehimbise ahabw'okugarurwa ahansi, ahakuba aryahunduuka nk'orurabyo rw'obunyaatsi. 11#Isa 40:6, 7. Nimumanya ngu omu kasheeshe eizooba riija n'omushana gurigwotsya, guhonzya obunyaatsi, orurabyo rwabwo ruragara, n'oburungi bwabwo buhwaho. Nikwo n'omuntungi arihunduuka omu mihanda ye.

Emiizire y'ekibi n'omuheru gwakyo

12 # 1 Pet 5:4; Kush 3:11. Omuntu orikugumisiriza omu kugyezibwa aine omugisha; ahakuba ku arisingura, aryaheebwa ekirunga ky'amagara, eki Ruhanga yaaraganiise abarikumukunda. 13Omuntu weena ku araayohibwe, arekye kugira ati: Naayohibwa Ruhanga; ahakuba Ruhanga tabaasa kwohibwa kibi, kandi nawe tayosya muntu; 14#Rom 7:7-10. kwonka omuntu weena ayohibwa, yaabeihwabeihwa okwetenga kwe, kwamwosyosya. 15Bwanyima okwetenga okwo, ku kuheza kutwara enda, kuzaara ekibi; n'ekibi ku kikura, kizaara okufa.

16B'eishe-emwe abarikukundwa, mutabeihwabeihwa; 17#1 Yoh 1:5. engabirano yoona enungi n'ekiconco kyona ekihikire biruga omu iguru, nibishuuma okuruga ahari Isheboona, Omuhangi w'ebirikwaka, otahindahinduka na kakye, n'obu kwakuba okugira ekicuucu ekireetwa okuhinduka. 18#1 Pet 1:23. Ahabw'okukunda kwe akatuzaaza ekigambo ky'amazima, ngu tube nk'emijigaijo y'ebi yaahangire.

19Eki nimukimanya, B'eishe-emwe abarikukundwa; omuntu weena arahukye kuhurira, kwonka atarahukiiriza kugamba, n'okugira ekiniga; 20ahakuba ekiniga ky'omuntu tikikora by'okuhikiirira kwa Ruhanga. 21#Kol 3:8. N'ahabw'ekyo mwiheho ekihagaro kyona n'obubi oburengyesereize; mwakiire n'obucureezi ekigambo ekibyairwe omuriimwe, ekirikubaasa kujuna amagara gaanyu.

22 # Mat 7:26; Rom 2:13. Kandi mube abarikworobera Ekigambo, beitu ti kukihurira kwonka, mukeebeiha. 23Ahakuba omuntu weena ku aba omuhurizi w'Ekigambo, ataakyorobera, ashusha nk'omuntu orikwereebera omu ndeeberwamu oku arikushusha ahamaisho; 24akiheza kwereeba, yaagyenda, ahonaaho akeebwa oku arikushusha. 25#Yak 2:12; Rom 8:2. Kwonka ogwo orikwetegyereza ebiragiro ebihikire eby'obusingye, akabyezirikira, atari orikubihurira kaeebwa, kureka ari omukozi orikubyorobera, omuntu ogo aryaheebwa omugisha omu kukora kwe.

26 # Zab 34:13. Omuntu weena ku ayeteekateekaho kuba omunyadiini, ataarinda rurimi rwe, yaayebeiha omu mutima gwe, ediini y'omuntu ogwo n'eya busha. 27Ediini eshemeire, etaine kamogo omu maisho ga Ruhanga Isheboona niyo egi: okutaayaayira efuuzi n'abafaakazi omu busaasi bwabo, n'okwerinda okugira amabara g'ensi.

Currently Selected:

Yakobo 1: RR64

Highlight

Copy

Compare