Abaheburaayo 13

1 # 2 Pet 1:7. Okukundana kugumeho. 2#Rom 12:13; 1 Pet 4:9; Kut 18:3. Mutarireka kukunira abagyenyi; ahakuba omu muringo nk'ogwo hariho abaakuniire baamaraika batakimanyire. 3#Mat 25:36. Mwijukye abari omu bihome, nk'ababohirwe nabo; kandi mwijukye n'abarikwitwa kubi, ahakuba naimwe mwine emibiri. 4Obushwere mwena mubuhe ekitiinisa; kandi ekitabo ky'obushwere kirekye kushiishwa, ahakuba abashambani Ruhanga aryabacwera orubanja. 5#Bir 31:6, 8. Mutarigira omutima ogurikukunda empiiha, ebi mwine bibe nibyo byabamara; ahakuba We akagira ati: Tindikutsigaho, kandi tindikuhemukaho na kakye. 6#Zab 118:6. Nikyo turikugambira, tutarikubanganisa, tuti:

Mukama niwe muhwezi wangye,

Tinditiina;

Omuntu naabaasa kungira ata?

Okushanga Yesu aheeru y'orurembo

7Mwijukye abeebembezi baanyu, abaabagambiire ekigambo kya Ruhanga; mwetegyereze omuheru gw'amagara gaabo, mutooreze okwikiriza kwabo. 8#Kush 1:17. Yesu Kristo tahinduka; oku abaire ari nyomwabazyo, n'eri izooba nikwo ari, kandi nikwo ariguma ebiro byona. 9#Efe 4:14. Mutahabisibwa enyegyesa ezihangire ez'emiringo mingi; ahakuba ni kirungi omutima kuhamibwa embabazi za Ruhanga, kunu ti migyenzo y'eby'okurya etaragasiire baagiikiriize. 10Twine eitambiro eri abaheereza b'omu Ihema bataikirizibwa kurya ebiritambiirweho. 11#Lev 16:27. Ahakuba enyamaishwa, ezi omunyamurwa omukuru atwara eshagama yaazo omu Mwanya ogurikwera okuba ebitambo by'ebibi, emitumbi yaazo bagyokyeza aheeru y'orusiisira. 12Nikwo na Yesu yaabonaboneire aheeru y'eirembo, ngu abone kweza abantu n'eshagama ye. 13#Heb 12:2. N'ahabw'ekyo naitwe ka tushohore, tumushangye aheeru y'orusiisira, twekoreire ekijumo ahabwe. 14#Heb 11:10. Ahabw'okuba aha titwineho rurembo orurikugumaho, kureka nitusherura orundi oruriija. 15#Hos 14:2. Mbwenu ahabw'Ogwo ka tugume tutambe ekitambo ky'okusiima Ruhanga, nikyo kyana ky'eminwa erikuhimbisa eiziina rye. 16#Fil 4:18. Mutarireka kukorera abantu ebirungi, n'okukwatanisa omu bi mwine; ahakuba ebhitambo nk'ebyo nibyo bishemeza Ruhanga.

17 # 1 Tes 5:12; Ezk 3:17. Muhurire abeebembezi baanyu, muboorobere; ahakuba nibo barinda amagara gaanyu, nk'abarikumanya ngu baryagabuuzibwa. Nabo babone kukora ekyo bashemereirwe, batagwirwe kubi; ahabw'okuba ekyo naimwe tikikaabagasira. 18#2 Kor 1:12. Mutushabire, ahakuba nituhamya ngu twine omutima ogutarikweshinja, nitwetenga kutwaza gye omuri byona. 19Kandi nimbeeshengyereza munonga, mwezirikye kutushabira, mbone kurahuka kubagarurirwa juba.

20 # Zek 9:11; Yer 32:40; Yoh 10:11. Kandi Ruhanga ow'obusingye, owaagarwire Mukama waitu Yesu Kristo okuruga omu bafu, Omuriisa w'entaama omukuru, ahabw'eshagama y'endagaano etahwaho, 21abahe ebirungi byona, mubone kukora ebi akunda, naakorera omuriimwe ebirikusiimwa omu maisho ge, ahabwa Yesu Kristo; aheebwe ekitiinisa ebiro byona. Amiina.

22B'eshe-emwe, nimbeeshengyereza, mwikirize ekigambo eki naabahabura, ahakuba naabahandiikira nincwera hagufu. 23Mumanye ngu ow'eishe-emwe Timoseo akarekurwa; ku ariija juba, turyabareebera hamwe. 24Mundamukize abeebembezi baanyu boona n'abarikwera boona. Aba Italia baabaramutsya. 25Embabazi zigume naimwe mwena. Amiina.

Currently Selected:

Abaheburaayo 13: RR64

Highlight

Copy

Compare