Isaaya 8

Akamanyiso ka Maheri-shalali-hashibaazi

1 # Hab 2:2. Kandi MUKAMA yangira ati: Twara ekishate kihango ky'eibaare, okihandiikyeho omu nyuguta mpango oti: Ebya Maheri-shalali-hashibaazi. 2#2 Bag 16:10. Bwanyima naatunga baakareebi abarikwesigwa kubihamya, Uriya omunyamurwa na Zekaria mwene Yeberekia. 3Ntyo naaza owa nabikazi, yaagira enda, yaazaara omwana w'omwojo. Bwanyima MUKAMA yangira ati: Mwete eiziina Mahari-shalali-hashibaazi; 4#Isa 7:16. ahabw'okuba ogwo mwana ku ariba atakamanyire kugamba “taata” nari “maama”, obutungi bwa Damasiko n'eminyago ya Samaria biryatwarwa omugabe wa Asiria, agyende abyebembeize.

5MUKAMA yaagaruka yangira ati: 6#Yoh 9:7. Aba bantu obu baayanga amaizi ga Shiloa agarikugyenda mpora, bakatiina Rezini na mwene Ramalia, 7#Isa 7:20. Mukama naija kubarwanisa n'amaizi maingi g'amaani ag'omugyera Furaati, niwe mugabe wa Asiria n'ekitiinisa kye kyona; amaizi ago garyaijura, gashwekye emikura yoona, garengyere n'aha nkungu zaagwo zoona; 8#Isa 7:14. kandi garyahimintika, gahikye Yuda, gashandaare, gaijure, gahikye omu bitsya, kandi n'amapapa gaago agashashaanwire garyabuga ensi yaawe yoona, Emanueli.

9Imwe mahanga 'mwe, mweteerane, kwonka muryahendagurika;

Kandi naimwe ab'omu nsi za hare, mutegye amatu mwena;

Mwezirikye, kwonka muryahendagurika;

Mutyo mwezirikye, kwona muryahendagurika.

10Muhanuure hamwe, kwonka enaama zaanyu ziryafa busha,

Mugambe ekigambo, kwonka tikirihama,

Ahabw'okuba Ruhanga ari hamwe naitwe.

11MUKAMA antaireho omukono gwe gw'amaani, yanteisa okutagyendera omu mitwarize y'eihanga eri nagira ati: 12#Isa 7:2; 1 Pet 3:14. Eki ab'eihanga eri barikweta obugomi, murekye kukyeta obugomi, kandi mutaritiina eki barikutiina, n'obu kwakuba okwitwa obwoba; 13#Kub 20:12. kureka MUKAMA ow'amahe mube niwe mwaha ekitiinisa ahabw'okwera kwe, mube niwe mwatiina, akabaitsa obwoba. 14#Ezk 11:16; Rom 9:33; 1 Pet 2:8. Kandi niwe aribabeera Omwanya ogurikwera; kwonka aryabeera amaju ga Israeli gombi eibaare eririkuteeza entsibo n'orukiri orurikugwisa, abeere abatuuzi ba Yerusaalemu obusya n'omutego. 15#Isa 28:13; Mat 21:44. Baingi baryamuteeraho entsibo, bagwe, bahendekye, bakwatwe omutego, batwarwe.

16 # Isa 8:1, 2. Komera kimwe ebirikuhamya, ohamye n'akamanyiso ebiragiro omu beegi bangye. 17#Isa 1:15; Hab 2:3. MUKAMA orikwima enju ya Yakobo amaisho ndyamutegyereza, mmwineho amatsiko. 18#Isa 7:3; 8:3; Heb 2:13. Reeba, nyowe n'abaana abu MUKAMA ampaire turi akamanyiso n'eky'okutangaarira ahari Israeli, ebirikuruga ahari MUKAMA ow'amahe, otuura aha rushozi Saayuuni. 19#Isa 19:3; Lev 19:31; 1 Sam 28:11-14; 2 Bag 23:24. Kandi ku baraabagire ngu, muraguze aha barikugambisa emizimu n'aha bafumu, abarikuviigiira, n'abarikuhuhuma, timurikumanya ngu abantu bashemereire kwehanuuza ahari Ruhanga waabo? Nimugira ngu eby'abahuriire bishemereire kwehanuuzibwa aha baafiire? 20Ebiragiro n'ebirikuhamya mube nibyo mwayehanuuzaho! Ku baraabe batarikugamba nk'oku ekigambo eki kiri, buzimazima omushekye tiguribajugutira. 21Kureka baryaraba omu nsi, baine obusaasi bwingi n'enjara; kandi ku barigira enjara, bayragira ekiniga kingi, bakyeene omugabe waabo na Ruhanga waabo, baimutsye amaisho, bagahangye eiguru, 22#Isa 5:30; Nah 1:8. kandi bagahangye ensi, babure eki baareeba, kureka obusaasi n'omwirima n'enaku eziri nk'obwire; bwanyima banagwe omu mwirima ndindindi.

Currently Selected:

Isaaya 8: RR64

Highlight

Copy

Compare