Isaaya 36

Senakaribu omugabe wa Asiria okuteera Yuda

1 # 2 Bag 18:13, 17-37. Omu mwaka gwa ikumi n'ena gw'omu busingye bw'omugabe Hezekia, Senakeribu omugabe wa Asiria akainamuka, yaateera endembo zoona eza Yuda, ezaabaire zeehinguririziibwe engo z'amabaare, yaazikwata.#2 Bus 32:1. 2#Isa 7:3; 2 Bus 32:9. Bwanyima omugabe wa Asiria, ku yaabaire akiri Lakishi, yaatuma omutware Rabushaake n'eihe rihango aha mugabe Hezekia omuri Yerusaalemu. Rabushaake ku yaahikireyo, yaayemerera aha mukura gw'ekiyanja kya ruguru, ekiri aha muhanda rugyendwa ogurikuza aha kibanja ky'omwozi. 3#Isa 22:15-20. Okwo yaashangwayo Eliakimu mwene Hilukia, owaabaire ari omukuru w'ekikaari, Shebuna omuhandiiki na Yoa mwene Asafu omuhandiiki w'ebirikubaho. 4Omutware Rabushaake yaabagira ati: Mugambire Hezekia muti: oku nikwo omugabe rugambwa, omugabe wa Asira, arikugamba naagira ati: Mbwenu ou orikwesiga n'oha? 5Noogira ngu ebigambo bugambo nibyo naama n'amaani by'okurwanisa? Hari ou oyegamiire hati n'oha, waaza kungomera? 6#Ezk 29:6, 7. Reeba, hati oyegamiire Misri, orubango oruri nk'ekibingo ekihendekire, ekirikwija kucumita ekiganja ky'omuntu weena orikukihimbagiriraho. Okwo nikwo na Faraho omugabe wa Misri ari ahari boona abarikumwesiga. 7#2 Bag 18:4. Kandi ku murangire muti: Nitwesiga MUKAMA Ruhanga waitu, tiwe Ogwo ou Hezekia yaihireho emyanya ye mikuru ey'okuramizamu, n'amatambiro ge, naagira Abayuda n'aba Yerusaalemu ati: Mushemereire kuramiza omu maisho g'eri eitambiro eriri Yerusaalemu? 8Mbwenu, ija okwatirizane na mukama wangye omugabe wa Asiria, nkuhe embaraasi enkumi ibiri; ku oraabone ab'okuzitemba, ongire kwo!

9 # Isa 31:1. Noija kubaasa ota kubinga omwe aha bakuru bangye b'engabo ab'amaani makye okukira abandi, ku oraabe oyesigire Misri kuba nibo baakuha ebigaari n'ab'aha mbaraasi? 10#Isa 10:5, 6. Kandi noogira ngu nyizire kuteera ensi egi n'okugicwekyereza, ntaragiirwe MUKAMA? Omanye ngu MUKAMA niwe angizire ati: Inamuka oteere egyo nsi, ogicwekyereze.

11 # Ezr 4:7. Bwanyima Eliakimu, Shebuna na Yoa baagira omutware Rabushaake bati: Twakweshengyereza, gamba n'abairu baawe omu rurimi rw'Abasiria; ahakuba itwe niturumanya; reka kugamba omu rurimi rw'Abayuda, abantu abari aha rugo rw'amabaare bakabihurira. 12Kwonka omutware Rabushaake yaabagarukamu ati: Nimugira ngu mukama wangye antumire ahari mukama waanyu naimwe, kuba niimwe naagambira ebigambo ebi mwenka? Tantumire kubigambira n'abashaija bariya abashutami aha rugo, abarikwija kurya naimwe amazi gaabo n'okunywa naimwe enkari yaabo?

13Ahonaaho omutware Rabushaake yaayemerera, yaagamba n'eiraka rihango omu rurimi rw'Abayuda, naagira ati: Muhurire obutumwa bw'omugabe rugambwa, omugabe wa Asiria. 14#Isa 37:10. Oku nikwo omugabe arikugamba naagira ati: Mutaikiriza Hezekia kubabeihabeiha; ahabw'okuba tarikwija kubaasa kubajuna. 15Mutaikiriza Hezekia kubeesigisa MUKAMA naabagira ati: Buzimazima MUKAMA naija kutujuna, kandi orurembo oru tirurikwija kuheebwayo mu mikono y'omugabe wa Asiria. 16Kandi mutahurira Hezekia; ahakuba oku nikwo omugabe wa Asiria arikugamba naagira ati: Mugarukane naanye, mwije munshangye aha; obwo buri omwe omuriimwe nibwo araarye omuzaabibu gwe n'omutiini gwe, kandi akanywa amaizi g'omu iziba rye, 17#2 Bag 18:11. okuhitsya obu ndiija nkabatwara omu nsi erikushushana n'eyaanyu, ensi y'engano na viinyo, n'ey'emigaati n'emizaabibu. 18#Isa 37:12, 13. Mwerinde, Hezekia atakaababeihabeiha naagira ati: MUKAMA naija kutujuna. Nimugira ngu hariho ruhanga omuri baaruhanga b'abanyamahanga orajunire ensi ye omu mikono y'omugabe wa Asiria? 19Mbwenu baaruhanga ba Hamasi na Arupaadi barahi? Na baaruhanga ba Sefavaimu barahi? Barajunire Samaria omu mikono yangye? 20#2 Bus 32:15. Nibaahi omuri baaruhanga boona ab'ezo nsi abarajunire ensi yaabo omu mikono yangye, mukabona kwesiga ku MUKAMA arikwija kwiha Yerusaalemu omu mikono yangye?

21Kwonka abantu boona baahunama, tibaagira ki baamugarukamu, ahabw'okuba ekiragiro ky'omugabe kikaba nikigira kiti: Mutamugarukamu. 22#Isa 33:7. Bwanyima Eliakimu mwene Hilukia, owaabaire ari mukuru w'ekikaari, Shebuna omuhandiiki, na Yoa mwene Asafu, omuhandiiki w'ebirikubaho, baija ahari Hezekia, bataagwire ebijwaro byabo, baamuteekyerereza ebigambo by'omutware Rabushaake.

Currently Selected:

Isaaya 36: RR64

Highlight

Copy

Compare