Isaaya 37

Okushaba kwa Hezekia

1 # 2 Bag 19:1-37. Omugabe Hezekia ku yaakihuriire, yaataagura ebijwaro bye, yaayefubika ekiguniya, yaaza omu nju ya MUKAMA. 2Yaatuma Eliakimi omukurur w'ekikaari, Shebuna omuhandiiki n'abanyamurwa abakuru ahari nabi Isaaya mwene Amozi, bajwaire ebiguniya. 3#Isa 22:5; Hos 13:13. Baamugira bati: Oku nikwo Hezekia arikugamba naagira ati: Eri izooba n'eizooba ry'obusaasi n'okhanwa n'okuteererwa enaku; ahakuba abaana bahikire kuzaarwa, kwona amaani g'okubazaara tigariho. 4#Isa 1:9. Shana MUKAMA Ruhanga waawe ahuriire ebigambo byona ebigambirwe omutware Rabushaake, ou mukama we omugabe wa Asiria atumire kugaya Ruhanga otahwaho; obundi MUKAMA Ruhanga waawe akaamuhana ahabw'ebyo bigambo ebi ahuriire. N'ahabw'ekyo imutsya eiraka ryawe, oshabire abantu abakiriho abahonokire.

5Abaheereza b'omugabe Hezekia ku baahikire owa Isaaya, 6yaabagira ati: Mugambire mukama waanyu muti: Oku nikwo MUKAMA arikugamba naagira ati: Otatiina ebyo bigambo ebi ohuriire, ebi abaheereza b'omugabe wa Asiria banjumire. 7#Isa 19:14; 37:38. Reeba, niinyija kumutamu ogundi mutima, ahurire orukuru, agarukye omu nsi ye; kandi ku araahikyeyo, mmwitse rurara.

8Bwanyima omutware Rabushaake yaagarukayo, yaashanga omugabe wa Asiria naarwanisa Libuna; ahabw'okuba akaba ahuriire ku arugire Lakishi. 9#Isa 20:5. Omugabe yaahurira ebya Tiruhaaka omugabe wa Esiopia, nibagira bari, Reeba, aizire kukuteera. Ku yaakihuriire, yaagaruka yaatuma ahari Hezekia naagira ati: 10#Isa 36:15. Oku nikwo muraagire Hezekia omugabe wa Yuda muti: Otaikiriza Ruhanga waawe ogwo, ou orikwesiga, kukubeiha naakuraganisa ati: Yerusaalemu teriheebwayo mu mikono y'omugabe wa Asiria. 11Ohuriire oku abagabe ba Asiria baagizire ensi zoona, bakazicwekyerereza kimwe. Noogira ngu niiwe orikwija kukira? 12#Isa 36:18, 19. Amahanga aga, Gozani, Harani, Rezefu, n'ab'omuri Edeni abaabaire batwire Telasaari, agu baatatenkuru baacwekyereize, noogira ngu baaruhanga baago bakagajuna? 13Nyoreka omugabe wa Hamasi, owa Arupaadi, ow'orurembo rwa Sefavaimu, owa Hena, n'owa Iiva!

14Hezekia yaayakiira ebaruha eyaareetsirwe ezo ntumwa, yaagishoma; bwanyima yainamuka, yaaza omu nju ya MUKAMA, yaagimushashaanurira omumaisho. 15Hezekia yaashabira omu maisho ga MUKAMA naagira ati: 16#Kur 25:22. Ai MUKAMA ow'amahe, Ruhanga wa Israeli, otuura aha kitebe ky'obukama ahagati ya baakerubi, iwe wenka niiwe Ruhanga w'obugabe bwona obw'omu nsi; niiwe waahangire eiguru n'ensi. 17#Dan 9:18. Ai MUKAMA, tega okutu kwawe; igura amaisho gaawe, MUKAMA, oreebe, ohurire ebigambo ebi Senakeribu atumire kurogota ahari Ruhanga otahwaho. 18#Isa 10:13, 14. N'ekya buzima, ai MUKAMA, abagabe ba Asiria bakacwekyereza abantu b'ago mahanga n'ensi zaabo, 19baanaga baaruhanga baabo omu muriro, ahabw'okuba bakaba batari baaruhanga nyamuhanga, kureka bakaba bakozirwe engaro z'abantu, omu biti n'omu mabaare; nikyo baacwekyerereziibwe. 20N'ahabw'ekyo ahati, MUKAMA Ruhanga waitu, ninkweshengyereza otujune, otwihe omu mikono ye, obugabe bwona obw'omu nsi bumanye ku niiwe wenka oba MUKAMA.

Isaaya okuragura ebiriba aha mugabe wa Asiria

21Bwanyima Isaaya mwene Amozi yaatuma ahari Hezeki naagira ati: Oku nikwo MUKAMA Ruhanga wa Israeli arikugamba naagira ati: Ahabw'okunshaba kukuhwera aha bya Senakeribu omugabe wa Asiria, 22eki nikyo kigambo eki MUKAMA amugambireho naagira ati:

Saayuuni oshugaine naakugaya, naakushekyerera;

Na Yerusaalemu naakuzongoreza omutwe.

23N'oha ou ojumire, okarogotaho?

Kandi ou okabukiire, okateera ekitsyori n'oha?

N'Orikwera wa Israeli

24 # Isa 8:7, 8; 14:8. Ojumiise MUKAMA entumwa zaawe,

Noogira oti: Nyinamukire n'ebigaari byangye bingi

Aha mitwe y'enshozi

Hare munonga ahagati ya Lebanooni.

Niinyija kutema emyereezi yaayo emiraingwa

N'emiberooshi yaayo emirungi munonga;

Niinyija kuhika omu bweshereko bwayo hare munonga,

Omu kibira kyayo ekikwataine.

25Nkatimba amaziba, naanywa amaizi gaago;

Naaribatiirira emigyera ya Misri yoona,

Naagyomya.

26Torahuriire ku naamaririire ira kukikora?

Omu biro bya ira nkacuma enaama y'okukora

Ebi ndikuhikiiriza omu biro ebi,

Ngi ocwekyereze endembo ezeehinguririziibwe engo z'amabaare,

Ozihindure amatongo.

27Nikyo kyareeteire abazitwiremu kucweka entegye,

Bakahahaaza emitima, bakarimbagirirwa,

Bakaba nk'obunyaatsi bw'omu ishwa,

Nk'obunyaatsi buto,

Bakahotoka nk'obunyaatsi obumezire aha mutwe gw'enju,

Nk'omusiri gw'engano ezitakakuzire.

28Kwonka nimmanya emishutamire yaawe,

Emihururire yaawe n'emitabaarukire yaawe,

Kandi n'ekiniga eki wangiriire.

29 # Isa 30:28; Amo 4:2. Ahabw'okungirira ekiniga,

Kandi nkahurira eby'amaryo gaawe,

Niinyija kukuta eirobo ryangye omu nyindo,

N'ekyoma kyangye omu kanwa,

Nkugarure omuhanda gwakureetsire.

30Kandi aha karyakubeera akamanyiso; omu mwaka ogu nimwija kurya ebyemerize, omu gwa kabiri murye ebyemeize eby'emiragarika y'ebyo; bwanyima omu mwaka gwa kashatu muryabiba mugyeshe, mubyare emizzaabibu, murye ebijuma byayo. 31#Isa 27:6. Kandi abaatsigaire aha b'enju ya Yuda abaahonokireho, baryagaruka batsimbe emizi okuzimu, n'ahaiguru baane ebyana; 32#Isa 9:7. ahabw'okuba omuri Yerusaalemu haryarugamu ekicweka, ekiriba kitsigaireho, n'aha rushozi Saayuuni harugyeho omutwe gw'abaahonokireho. Obweziriki bwa MUKAMA buryakihikiiriza.

33Nikyo MUKAMA arikugambira aha mugabe wa Asiria, ati: Tarihika muri oru rurembo, nari okururashamu omwambi, nari okurwemurikira omumaisho aine engabo ye, n'obu kwakuba okurutuumaho omutuumo gw'eitaka. 34Omuhanda ogwamureetsire nigwo gurimugarurayo, kandi taritaaha muri oru rurembo, nikwo MUKAMA arikugamba. 35#Isa 31:5; 2 Bag 20:6. Ahakuba ndyarinda oru rurembo, ndujune ahabwangye n'ahabw'omwiru wangye Daudi.

Okucwekyerera kw'engabo za Senakeribu

36 # Isa 14:25; 31:8. Ekyo kiro maraika wa MUKAMA yaija, yaateera orusiisira rw'Abaasiria, yaitamu engabo zaabo akasiriira n'obukumi munaana n'enkumi itaano. Abantu ku baimukire omu kasheeshe, baashanga ezo ngabo zoona ziri emitumbi. 37Bwanyima Senakeribu omugabe wa Asiria yaarugayo, yaagaruka Nineeve, yaatuurayo. 38Ku yaabaire ari omuri nyaruju ya ruhanga we Nisirooki naamuramya, Adurameleki na Sharezeeri abatabani baija, baamwitsa rurara, baacwa, baahungira omu nsi ya Araraati. Esari-hadooni omutabani yaategyeka omu mwanya gwe.

Currently Selected:

Isaaya 37: RR64

Highlight

Copy

Compare