Isaaya 35
35
Omuhanda gw'abacungwirwe
1Eihamba n'ensi eyomire biryashemererwa,
Eihamba ry'omusheenyi riryashemererwa, rirabye ebirabyo nk'esheko y'ensi.
2Riryarabya ebirabyo bingi munonga,
Ryesiime, rishemererwe, ryeshongore.
Riryaheebwa ekitiinisa kya Lebanooni,
N'oburungi bwa Karumeeli na Sharooni.
Baryareeba ekitiinisa kya MUKAMA,
Oburungi bwa Ruhanga waitu.
3 #
Yob 4:3, 4; Heb 12:12. Mugumye emikono etaine maani,
Muhamye amaju agatahamire,
4Mugambire ab'omutima gw'obwoba muti:
Mugume, murekye kutiina!
Reeba Ruhanga waanyu naija kuhoora enzigu,
Nikwo kuzimuura kwe;
Aryaija, abajune.
5 #
Isa 32:3, 4; 48:21; Mat 11:5; Yoh 5:8, 9; 9:6, 7. Obwo amaisho g'empumi garyahumuurwa,
N'amatu g'ebifa-matu garyaigurwa;
6Ekirema kiryaguruka nk'empara,
N'orurimi rw'ekiteta rweshongore ahabw'okushemererwa;
Ahabw'okuba amaizi garyafumuka omu ihamba
N'emigyera omu ihamba ry'omusheenyi;
7Omusheenyi gurikwotsya guryahinduka ekiyanja,
N'ensi ekarangataine ehindukye ey'enshuro z'amaizi;
Eikobezo rya zaamuha riryaba ekisharara,
N'obunyaatsi bwaho buhindukye ekibingo n'omubimbiri.
8 #
Isa 40:3; 52:1. Kandi haryabaho omuhanda rugyendwa,
Gwetwe Omuhanda ogurikwera.
Abatashemeire tibarigurabamu,
Kureka guryaba ogw'abagyenzi;
N'obu bariba bari abashema,
Tibariguhabiramu.
9 #
Lev 26:6. Tiharibayo ntare,
Kandi enyamaishwa yoona enshaarizi teriguzamu;
Tizirishangwayo,
Kureka abacungwirwe nibo barigugyenderamu.
10 #
Isa 51:11; 65:19. N'abacungwirwe MUKAMA baryagaruka,
Baije Saayuuni nibeeshongora,
Okushemererwa okutahwaho kuri aha maisho gaabo;
Baryagira okushemererwa n'okunanuka,
Kandi obusaasi n'okutsinda biryakwata akakiro.
Currently Selected:
Isaaya 35: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
