Isaaya 25

Okuhimbisa Ruhanga ahabw'eby'oburyo bye n'okujuna kwe

1 # Kur 15:2; Zab 107:31, 32. Ai MUKAMA, niwe Ruhanga wangye;

Ndyakuhimbisa, nsingize eiziina ryawe,

ahabw'okuba okozire eby'okutangaaza,

Ebi waateekateekire ira kukora omu bwesigwa n'amazima.

2 # Isa 17:1; Yer 51:37. Ahakuba orurembo oruhindwire orubungo,

Orurembo orwehinguririziibwe orugo rw'amabaare oruhindwire amatongo.

Ekikaari ky'abanyamahanga tikikiba rurembo,

Kandi tikirigaruka kwombekwa bundi.

3Nikyo eihanga ry'amaani ririkuheera ekitiinisa,

Endembo z'amahanga agataine saasi zikakutiina.

4 # Isa 4:6; 32:2; Nah 1:7. Omworo n'omukyene okababeera ekigo kigumire omu kushoberwa kwabo,

Waababeera obwegamo bw'eihunga n'ekicuucu ky'okubatambira omushana;

ahabw'okuba abataine saasi babateera, nk'oku eihunga riteera orugo,

Nari nk'omushana gw'amaani omu nsi eyomire.

5Niiwe ocureeza enduuru z'abanyamahanga,

Okahunamya ebyevugo by'abataine saasi,

Nk'oku omushana gwikaikanisibwa ekibunda ky'ekicu.

6 # Isa 2:2, 3; Zab 63:5. MUKAMA ow'amahe aryateekyera amahanga goona obugyenyi bw'eby'ebishaju ahari oru rushozi, na viinyo y'omurera, eby'ebishaju ebirimu omushokooro, na viinyo y'omurera egyegyeinwe gye. 7#Isa 22:8; 2 Kor 3:15. Kandi ahari oru rushozi aryamariraho kimwe ekirikushweka ekishwekire enganda zoona, n'eky'okwetwekyerera ekisangiire amahanga goona. 8#Isa 1:20; 30:19; Hos 13:14; 1 Kor 15:54; Kush 7:17. Kandi Mukama RUHANGA aryamirira kimwe rufu, aragaze amarira aha maisho goona, n'ekijumo eki barikujuma abantu be akiihe aha nsi yoona; ahakuba MUKAMA niwe akigambire.

9 # Kut 49:18; Zab 9:14. Eryo izooba baryagira bati: Reeba, Ogu niwe Ruhanga waitu, tutuura tumutegyereize, ngu atujune; Ogu niwe MUKAMA tutuura tumutegyereize; ka tushemererwe, twesiimire okujuna kwe; 10#Isa 15:1; Yob 40:12. ahakuba omukono gwa MUKAMA guryaguma ahari oru rushozi, kandi Moabu eryaribatiiririrwa omu mwanya gwayo, nk'oku baribatiirira embuba omu kiina ky'amasha. 11Kandi Moabu eryanagiramu emikono, nk'oku orikuziha anaga emikono naaziha; kwonka MUKAMA aryamucwa amaryo, amumaremu obuhangu bw'engaro ze, 12#Isa 26:5. kandi ebigo bye by'eminaara ebyombekirwe aha ngo z'amabaare ez'endembo ze, aryabisheenya, abihigure, abikumbagaze ahansi, bihikire kimwe omu mucuucu.

Currently Selected:

Isaaya 25: RR64

Highlight

Copy

Compare