Isaaya 23

Okucwekyerezibwa kwa Tuuro

1 # Ezk 26:2—28:24; Yoel 3:4-8; Amo 1:9, 10; Zek 9:2-4. Ebi nabi yaahanwire ahari Tuuro.

Imwe meeri za Tarushiishi 'mwe, nimuboroogye,

Ahabw'okuba Tuuro ecwekyereziibwe, tihaatsigara nju nari nyambukiro!

Ebyo biboorekirwe nibiruga omu nsi ya Kitimu.

2Imwe abatwire aha mbaju z'enyanja,

Abaabaire batungisibwa abashuubuzi ba Sidoni,

Abarikuraba omu nyanja, nimuhuname!

3 # Yer 2:18; Ezk 27:3-23. Eby'okurya baya Shihoori, n'ebishaaruurwa bya Nailo,

Nibyo byabaire bibareetera amagoba.

Okwo niyo akatare k'amahanga kaabaire kari.

4Iwe Sidoni, gira enshoni; ahabw'okuba enyanja yaagamba,

Nikyo kigo kyayo, neegira eti:

Tinkarumwaga, tinkazaaraga,

Tinkontsyaga baana b'aboojo,

N'obu kwakuba okworora abaishiki.

5Enkuru ya Tuuro ku erihika Misri,

Baryagigirira obusaasi.

6Imwe abatwire aha mbaju z'enyanja,

Nimwambukye, muze Tarushiishi, mucure!

7Beitu shi, oru nirwo rurembo rwanyu ruri

Orwabaire rwesiima orwa ira ryona,

Oru abantu baamwo baabaire bakunda kuza hare kutuurayo?

8 # Isa 2:12. N'oha owaamaririire kukora eki,

Kurwanisa Tuuro, haza ruri orurembo orwabaire rwemeka abagabe,

N'abatuuzi baarwo bari ab'ekitiinisa omu nsi?

9MUKAMA ow'amahe niwe akimaririire,

Ngu abone kugayisa amaryo g'ekitiinisa kyona,

N'okukwatsa enshoni abanyakitiinisa boona ab'omu nsi.

10Iwe Tarushiishi 'we,

Shandaara omu nsi yaawe nk'omugyera Nailo,

Ahabw'okuba tokiine kirikukuzibira.

11MUKAMA agoroire omukono gwe aha nyanja,

Yaatengyetsa amahanga g'abagabe,

Yaagamba aha bya Kanaani naaragiira,

Ngu bacwekyereze ebigo byayo eby'amaani.

12Yaagaruka yaagira ati:

Iwe Sidoni 'we, omwishiki oshugaine orikuhatwa,

Tokigaruka kushemererwa;

Imuka, oyambukye Kitimu,

Kandi nayo, torigirirayo buhuumure.

13Mureebe ensi y'Abakaludaaya! Tekiri ihanga. Abaasiria bakagihindura ey'enyamaishwa z'omu ihamba. Bakagota Tuuro, baagyombekaho eminaara, baasheenya zaanyaruju zaayo, baagigira amatongo.

14 # Isa 23:1. Imwe meeri za Tarushiishi 'mwe, mucure ahabw'okuba ekigo kyanyu kicwekyereziibwe. 15#Yer 25:11. Omu bunaku obwo Tuuro eryayeba okumara emyaka makumi mushanju, nk'emyaka ei omugabe amara aha ngoma. Egyo myaka makumi mushanju ku erihwa, ebirihika ahari Tuuro biryaba nk'ebiri omu kyeshongoro kya maraaya, ekirikugira kiti:

16Iwe maraaya waayebire 'we,

Twara enanga, ogyendagyende omu rurembo!

Ogiteere, ogijumeeze,

Oyeshongore ebyeshongoro bingi, obone kwijukwa.

17 # Kush 17:1, 2. Bwanyima y'egyo myaka makumi mushanju MUKAMA aryataayaayira Tuuro, eryagaruka aha bushuubuzi bwayo, eshambane n'amahanga g'abagabe b'omu nsi zoona. 18Obutungi n'obushuubuzi bwayo buryayerezibwa MUKAMA; tiburibiikwa, tiburiteebwa hangahari nk'obw'engumya, kureka buryaheebwa abatuura omu maisho ga MUKAMA, ngu babone kurya n'okuhaaga, kandi babone ebijwaro ebirikuterera.

Currently Selected:

Isaaya 23: RR64

Highlight

Copy

Compare